29 shlokas
- 1
पराशर उवाच
एवं संस्तूयमाना सा देवैर्देवमधारयत्
गर्भेण पुण्डरीकाक्षं जगतां त्राणकारणम्
parāśara uvāca
evaṃ saṃstūyamānā sā devairdevamadhārayat
garbheṇa puṇḍarīkākṣaṃ jagatāṃ trāṇakāraṇam
- 2
ततो ऽखिलजगत्पद्मबोधायाच्युतभानुना
देवकीपूर्वसंध्यायाम् आविर्भूतं महात्मना
tato 'khilajagatpadmabodhāyācyutabhānunā
devakīpūrvasaṃdhyāyām āvirbhūtaṃ mahātmanā
- 3
तज्जन्मदिनमत्यर्थमाह्लाद्यमलदिङ्मुखम्
बभूव सर्वलोकस्य कौमुदी शशिनो यथा
tajjanmadinamatyarthamāhlādyamaladiṅmukham
babhūva sarvalokasya kaumudī śaśino yathā
- 4
सन्तः संतोषमधिकं प्रशमं चण्डमारुताः
प्रसादं निम्नगा याता जायमाने जनार्दने
santaḥ saṃtoṣamadhikaṃ praśamaṃ caṇḍamārutāḥ
prasādaṃ nimnagā yātā jāyamāne janārdane
- 5
सिन्धवो निजशब्देन वाद्यं चक्रुर्मनोहरम्
जगुर्गन्धर्वपतयो ननृतुश्चाप्सरोगणाः
sindhavo nijaśabdena vādyaṃ cakrurmanoharam
jagurgandharvapatayo nanṛtuścāpsarogaṇāḥ
- 6
ससृजुः पुष्पवर्षाणि देवा भुव्यन्तरिक्षगाः
जज्वलुश्चाग्नयः शान्ता जायमाने जनार्दने
sasṛjuḥ puṣpavarṣāṇi devā bhuvyantarikṣagāḥ
jajvaluścāgnayaḥ śāntā jāyamāne janārdane
- 7
मन्दं जगर्जुर्जलदाः पुष्पवृष्टिमुचो द्विज
mandaṃ jagarjurjaladāḥ puṣpavṛṣṭimuco dvija
- 8
फुल्लेन्दीवरपत्राभं चतुर्बाहुमुदीक्ष्य तम्
श्रीवत्सवक्षसं जातं तुष्टावानकदुन्दुभिः
phullendīvarapatrābhaṃ caturbāhumudīkṣya tam
śrīvatsavakṣasaṃ jātaṃ tuṣṭāvānakadundubhiḥ
- 9
अभिष्टूय च तं वाग्भिः प्रसन्नाभिर्महामतिः
विज्ञापयामास तदा कंसाद्भीतो द्विजोत्तम
abhiṣṭūya ca taṃ vāgbhiḥ prasannābhirmahāmatiḥ
vijñāpayāmāsa tadā kaṃsādbhīto dvijottama
- 10
वसुदेव उवाच
ज्ञातो ऽसि देवदेवेश शङ्खचक्रगदाधरम्
दिव्यं रूपमिदं देव प्रसादेनोपसंहर
vasudeva uvāca
jñāto 'si devadeveśa śaṅkhacakragadādharam
divyaṃ rūpamidaṃ deva prasādenopasaṃhara
- 11
अद्यैव देव कंसो ऽयं कुरुते मम यातनाम्
अवतीर्णमिति ज्ञात्वा त्वमस्मिन्मम मन्दिरे
adyaiva deva kaṃso 'yaṃ kurute mama yātanām
avatīrṇamiti jñātvā tvamasminmama mandire
- 12
देवक्युवाच
यो ऽनन्तरूपो ऽखिलविश्वरूपो गर्भे ऽपि लोकान्वपुषा बिभर्ति
प्रसीदतामेष स देवदेवः स्वमाययाविष्कृतबालरूपः
devakyuvāca
yo 'nantarūpo 'khilaviśvarūpo garbhe 'pi lokānvapuṣā bibharti
prasīdatāmeṣa sa devadevaḥ svamāyayāviṣkṛtabālarūpaḥ
- 13
उपसंहर सर्वात्मन्रूपमेतच्चतुर्भुजम्
जानातु मावतारं ते कंसो ऽयं दितिजात्मजः
upasaṃhara sarvātmanrūpametaccaturbhujam
jānātu māvatāraṃ te kaṃso 'yaṃ ditijātmajaḥ
- 14
भगवानुवाच
स्तुतो ऽहं यत्त्वया पूर्वं पुत्रार्थिन्या तदद्य ते
सफलं देवि संजातं जातो ऽहं यत्तवोदरात्
bhagavānuvāca
stuto 'haṃ yattvayā pūrvaṃ putrārthinyā tadadya te
saphalaṃ devi saṃjātaṃ jāto 'haṃ yattavodarāt
- 15
पराशर उवाच
इत्युक्त्वा भगवांस्तूष्णीं बभूव मुनिसत्तम
वसुदेवो ऽपि तं रात्रावादाय प्रययौ बहिः
parāśara uvāca
ityuktvā bhagavāṃstūṣṇīṃ babhūva munisattama
vasudevo 'pi taṃ rātrāvādāya prayayau bahiḥ
- 16
मोहिताश्चाभवंस्तत्र रक्षिणो योगनिद्रया
मथुराद्वारपालाश्च व्रजत्यानकदुन्दुभौ
mohitāścābhavaṃstatra rakṣiṇo yoganidrayā
mathurādvārapālāśca vrajatyānakadundubhau
- 17
वर्षतां जलदानां च तोयमत्युल्बणं निशि
संछाद्यानुययौ शेषः फणैरानकदुन्दुभिम्
varṣatāṃ jaladānāṃ ca toyamatyulbaṇaṃ niśi
saṃchādyānuyayau śeṣaḥ phaṇairānakadundubhim
- 18
यमुनां चातिगम्भीरां नानावर्तशताकुलाम्
वसुदेवो वहन्विष्णुं जानुमात्रवहां ययौ
yamunāṃ cātigambhīrāṃ nānāvartaśatākulām
vasudevo vahanviṣṇuṃ jānumātravahāṃ yayau
- 19
कंसस्य करमादाय तत्रैवाभ्यागतांस्तटे
नन्दादीन्गोपवृद्धांश्च यमुनायां ददर्श सः
kaṃsasya karamādāya tatraivābhyāgatāṃstaṭe
nandādīngopavṛddhāṃśca yamunāyāṃ dadarśa saḥ
- 20
तस्मिन्काले यशोदापि मोहिता योगनिद्रया
तामेव कन्यां मैत्रेय प्रसूता मोहिते जने
tasminkāle yaśodāpi mohitā yoganidrayā
tāmeva kanyāṃ maitreya prasūtā mohite jane
- 21
वसुदेवो ऽपि विन्यस्य बालमादाय दारिकाम्
यशोदाशयने तूर्णमाजगामामितद्युतिः
vasudevo 'pi vinyasya bālamādāya dārikām
yaśodāśayane tūrṇamājagāmāmitadyutiḥ
- 22
ददृशे च प्रबुद्धा सा यशोदा जातमात्मजम्
नीलोत्पलदलश्यामं ततो ऽत्यर्थं मुदं ययौ
dadṛśe ca prabuddhā sā yaśodā jātamātmajam
nīlotpaladalaśyāmaṃ tato 'tyarthaṃ mudaṃ yayau
- 23
आदाय वसुदेवो ऽपि दारिकां निजमन्दिरे
देवकीशयने न्यस्य यथापूर्वमतिष्ठत
ādāya vasudevo 'pi dārikāṃ nijamandire
devakīśayane nyasya yathāpūrvamatiṣṭhata
- 24
ततो बालध्वनिं श्रुत्वा रक्षिणः सहसोत्थिताः
कंसायावेदयामासुर्देवकीप्रसवं द्विज
tato bāladhvaniṃ śrutvā rakṣiṇaḥ sahasotthitāḥ
kaṃsāyāvedayāmāsurdevakīprasavaṃ dvija
- 25
कंसस्तूर्णम् उपेत्यैनां ततो जग्राह बालिकाम्
मुञ्च मुञ्चेति देवक्या सन्नकण्ठ्या निवारितः
kaṃsastūrṇam upetyaināṃ tato jagrāha bālikām
muñca muñceti devakyā sannakaṇṭhyā nivāritaḥ
- 26
चिक्षेप च शिलापृष्ठे सा क्षिप्ता वियति स्थितिम्
अवाप रूपं च महत्सायुधाष्टमहाभुजम्
cikṣepa ca śilāpṛṣṭhe sā kṣiptā viyati sthitim
avāpa rūpaṃ ca mahatsāyudhāṣṭamahābhujam
- 27
प्रजहास तथैवोच्चैः कंसं च रुषिताब्रवीत्
किं मया क्षिप्तया कंस जातो यस्त्वां वधिष्यति
prajahāsa tathaivoccaiḥ kaṃsaṃ ca ruṣitābravīt
kiṃ mayā kṣiptayā kaṃsa jāto yastvāṃ vadhiṣyati
- 28
सर्वस्वभूतो देवानामासीन्मृत्युः पुरा स ते
तदेतत्सम्प्रधार्याशु क्रियतां हितम् आत्मनः
sarvasvabhūto devānāmāsīnmṛtyuḥ purā sa te
tadetatsampradhāryāśu kriyatāṃ hitam ātmanaḥ
- 29
इत्युक्त्वा प्रययौ देवी दिव्यस्रग्गन्धभूषणा
पश्यतो भोजराजस्य स्तुता सिद्धैर्विहायसा
ityuktvā prayayau devī divyasraggandhabhūṣaṇā
paśyato bhojarājasya stutā siddhairvihāyasā

