325 shlokas
- 1
अथ संप्रेषितास्थानः सचिवान् अब्रवीन्नृपः
यद्ब्रवीमि निबोधन्तु भवन्तस्तत्सचेतसः
atha saṃpreṣitāsthānaḥ sacivān abravīnnṛpaḥ
yadbravīmi nibodhantu bhavantastatsacetasaḥ
- 2
ऋणैः किल समाघ्रातः पुरुषो जायते त्रिभिः
ब्रह्मचर्येष्टिसंतानैर् ऋषिदेवस्वधाभुजाम्
ṛṇaiḥ kila samāghrātaḥ puruṣo jāyate tribhiḥ
brahmacaryeṣṭisaṃtānair ṛṣidevasvadhābhujām
- 3
तत्राधिगतवेदो ऽहम् इष्टाशेषमहाक्रतुः
अपुत्रत्वात्तु पितृभिर्गृहीतः पिण्डभोजिभिः
tatrādhigatavedo 'ham iṣṭāśeṣamahākratuḥ
aputratvāttu pitṛbhirgṛhītaḥ piṇḍabhojibhiḥ
- 4
न च पुत्राङ्गसंस्पर्शात्सुखहेतुर् अनुत्तरः
सुखिभिः स हि निर्दिष्टश्चन्दनाद् अपि शीतलः
na ca putrāṅgasaṃsparśātsukhahetur anuttaraḥ
sukhibhiḥ sa hi nirdiṣṭaścandanād api śītalaḥ
- 5
अलं चातिप्रसङ्गेन सर्वथा गृहमेधिनाम्
दृष्टादृष्टसुखप्राप्तेः पुत्राद् अन्यन्न कारणम्
alaṃ cātiprasaṅgena sarvathā gṛhamedhinām
dṛṣṭādṛṣṭasukhaprāpteḥ putrād anyanna kāraṇam
- 6
तद् अस्ति यदि वः काङ्क्षा निष्प्रजानां प्रजां प्रति
आरभध्वं मया सार्धं देवताराधनं ततः
tad asti yadi vaḥ kāṅkṣā niṣprajānāṃ prajāṃ prati
ārabhadhvaṃ mayā sārdhaṃ devatārādhanaṃ tataḥ
- 7
ते तु सप्रमदाः श्रुत्वा राज्ञः पुत्रार्थिनः कथाम्
सिद्धकल्पात्मसंकल्पाः प्रत्यूचुर्दर्शितस्मिताः
te tu sapramadāḥ śrutvā rājñaḥ putrārthinaḥ kathām
siddhakalpātmasaṃkalpāḥ pratyūcurdarśitasmitāḥ
- 8
पुत्रजन्म वणिग्वध्वा यात्रायां चित्रदर्शनम्
पिङ्गलीदर्शनं चेति प्रयोगो ऽयम् अनुष्ठितः
putrajanma vaṇigvadhvā yātrāyāṃ citradarśanam
piṅgalīdarśanaṃ ceti prayogo 'yam anuṣṭhitaḥ
- 9
अस्माभिः स च देवेन तथैव सफलीकृतः
कृतः काले प्रयोगो हि नाफलो जातु जायते
asmābhiḥ sa ca devena tathaiva saphalīkṛtaḥ
kṛtaḥ kāle prayogo hi nāphalo jātu jāyate
- 10
तेन संकल्पसदृशीम् आरभध्वं क्रियाम् इति
सचिवैर् अभ्यनुज्ञातस्तथेति प्रतिपन्नवान्
tena saṃkalpasadṛśīm ārabhadhvaṃ kriyām iti
sacivair abhyanujñātastatheti pratipannavān
- 11
स पुण्ये ऽहनि सम्पूज्य देवताग्निद्विजन्मनः
ययौ नागवनोद्यानं सदारः सह मन्त्रिभिः
sa puṇye 'hani sampūjya devatāgnidvijanmanaḥ
yayau nāgavanodyānaṃ sadāraḥ saha mantribhiḥ
- 12
मागधी तु कृतोत्साहा देव्या वासवदत्तया
अलम् आलि तवानेन खेदेनेति निवारिता
māgadhī tu kṛtotsāhā devyā vāsavadattayā
alam āli tavānena khedeneti nivāritā
- 13
उक्ता च ननु बालासि मृणालीतन्तुकोमला
अनुभूतसुखा चासि भ्रातुर्भर्तुश्च वेश्मनि
uktā ca nanu bālāsi mṛṇālītantukomalā
anubhūtasukhā cāsi bhrāturbhartuśca veśmani
- 14
दुःसहानि तु दुःखानि मया निन्दितभाग्यया
अनुभूतानि तेनाहं शक्ता दुःखम् उपासितुम्
duḥsahāni tu duḥkhāni mayā ninditabhāgyayā
anubhūtāni tenāhaṃ śaktā duḥkham upāsitum
- 15
यश्च मे भविता पुत्रः स भवत्या भविष्यति
कृत्तिकागर्भसम्भूतो भवान्या इव षण्मुखः
yaśca me bhavitā putraḥ sa bhavatyā bhaviṣyati
kṛttikāgarbhasambhūto bhavānyā iva ṣaṇmukhaḥ
- 16
इति तस्यां निवृत्तायां सह वासवदत्तया
तपोभिर् अचिराद्राजा राजराजम् अतोषयत्
iti tasyāṃ nivṛttāyāṃ saha vāsavadattayā
tapobhir acirādrājā rājarājam atoṣayat
- 17
एकदा प्रतिबुद्धौ तु दंपती जातसंभ्रमौ
हा देवि हार्यपुत्रेति व्याहरन्तौ परस्परम्
ekadā pratibuddhau tu daṃpatī jātasaṃbhramau
hā devi hāryaputreti vyāharantau parasparam
- 18
अथोपस्पृश्य नृपतिर्नमस्कृत्वा धनाधिपम्
पुरः पुरोहितादीनाम् आचख्यौ स्वप्नम् आदृतः
athopaspṛśya nṛpatirnamaskṛtvā dhanādhipam
puraḥ purohitādīnām ācakhyau svapnam ādṛtaḥ
- 19
अद्य पश्याम्य् अहं स्वप्ने व्योम्नि कामपि देवताम्
प्रभाम्भःसंततिव्यस्तनभोमण्डलनीलताम्
adya paśyāmy ahaṃ svapne vyomni kāmapi devatām
prabhāmbhaḥsaṃtativyastanabhomaṇḍalanīlatām
- 20
सा माम् उक्तवती वाचा गम्भीरसुकुमारया
त्वाम् आह्वयति वित्तेशस्तदाशां गम्यताम् अतः
sā mām uktavatī vācā gambhīrasukumārayā
tvām āhvayati vitteśastadāśāṃ gamyatām ataḥ
- 21
मयौम् इति प्रतिज्ञाते संध्यारक्ततरं करम्
आरोप्य प्रस्थिता व्योम्नि दिशं वित्तेशपालिताम्
mayaum iti pratijñāte saṃdhyāraktataraṃ karam
āropya prasthitā vyomni diśaṃ vitteśapālitām
- 22
शर्वेणेह धृता गङ्गा परिणीतात्र पार्वती
इत्यादीन्दर्शयन्ती नौ प्रदेशं पार्वतीपितुः
śarveṇeha dhṛtā gaṅgā pariṇītātra pārvatī
ityādīndarśayantī nau pradeśaṃ pārvatīpituḥ
- 23
नीयमानः क्रमेणेत्थम् अथाहं दृष्टवान्पुरः
चन्द्रपाषाणनिर्माणप्राकाराम् अलकापुरीम्
nīyamānaḥ krameṇettham athāhaṃ dṛṣṭavānpuraḥ
candrapāṣāṇanirmāṇaprākārām alakāpurīm
- 24
गणानां पार्वतीभर्तुर्गणैर् अगणितैर्युतम्
यस्या बाह्यम् अदृष्टान्तं कल्पपादपकाननम्
gaṇānāṃ pārvatībharturgaṇair agaṇitairyutam
yasyā bāhyam adṛṣṭāntaṃ kalpapādapakānanam
- 25
नानामणिप्रभाजालकल्माषशिखराण्य् अपि
शुभ्रयत्य् एव हर्म्याणि यस्यां रुद्रेन्दुचन्द्रिका
nānāmaṇiprabhājālakalmāṣaśikharāṇy api
śubhrayaty eva harmyāṇi yasyāṃ rudrenducandrikā
- 26
अवतार्य तु मां द्वारे गुह्यकेश्वरवेश्मनः
वदति क्षणम् अत्रैव स्थीयताम् इति देवता
avatārya tu māṃ dvāre guhyakeśvaraveśmanaḥ
vadati kṣaṇam atraiva sthīyatām iti devatā
- 27
सा प्रविश्य प्रतीहार्या सह निर्गम्य भाषते
अनुज्ञातप्रवेशो ऽसि देवेनागम्यताम् इति
sā praviśya pratīhāryā saha nirgamya bhāṣate
anujñātapraveśo 'si devenāgamyatām iti
- 28
भवनानीव देवानां षड् अतिक्रम्य सप्तमे
कक्षान्तरे प्रकृष्टर्द्धौ पश्यामि द्रविणेश्वरम्
bhavanānīva devānāṃ ṣaḍ atikramya saptame
kakṣāntare prakṛṣṭarddhau paśyāmi draviṇeśvaram
- 29
अथ तत्राप्सराः काचित्कांचिद् आह निरीक्ष्य माम्
सखि नूनम् असाव् एष यस्यासौ भविता सुतः
atha tatrāpsarāḥ kācitkāṃcid āha nirīkṣya mām
sakhi nūnam asāv eṣa yasyāsau bhavitā sutaḥ
- 30
मया मन्त्रयमाणानाम् ऋषीणाम् अग्रतः श्रुतम्
भरतानाम् अयं वंशे विशुद्धे जायताम् इति
mayā mantrayamāṇānām ṛṣīṇām agrataḥ śrutam
bharatānām ayaṃ vaṃśe viśuddhe jāyatām iti

