204 shlokas
- 1
स्निग्धैर्दारैः सुहृद्भिश्च मैत्रीमात्रनिबन्धनैः
चम्पायां रममाणस्य कालः कश्चिद् अगान्मम
snigdhairdāraiḥ suhṛdbhiśca maitrīmātranibandhanaiḥ
campāyāṃ ramamāṇasya kālaḥ kaścid agānmama
- 2
एकदा प्रासकैः क्रीडन्सह गन्धर्वदत्तया
सहसा प्रमदावेषम् अपश्यं पुरुषं पुरः
ekadā prāsakaiḥ krīḍansaha gandharvadattayā
sahasā pramadāveṣam apaśyaṃ puruṣaṃ puraḥ
- 3
कपालशिखिपिञ्छाभ्यां विराजितकरद्वयम्
अयुक्तेन्द्रधनुश्छायशृङ्गारगलकण्ठिकम्
kapālaśikhipiñchābhyāṃ virājitakaradvayam
ayuktendradhanuśchāyaśṛṅgāragalakaṇṭhikam
- 4
गन्धर्वदत्तया चासौ दत्तस्वासनया स्वयम्
प्रक्षाल्य चरणौ भक्त्या स्वालंकारैर् अलंकृतः
gandharvadattayā cāsau dattasvāsanayā svayam
prakṣālya caraṇau bhaktyā svālaṃkārair alaṃkṛtaḥ
- 5
तच्च मे गुरुगाम्भीर्यं क्वापि नीतम् असूयया
यथा केसरिशावस्य गन्धहस्तिजिघांसया
tacca me gurugāmbhīryaṃ kvāpi nītam asūyayā
yathā kesariśāvasya gandhahastijighāṃsayā
- 6
ममासीद् इयम् एवात्र सदोषा कुलमानिनी
एष स्त्रीपुरुषः शोच्यो यो न स्त्री न पुमान् इति
mamāsīd iyam evātra sadoṣā kulamāninī
eṣa strīpuruṣaḥ śocyo yo na strī na pumān iti
- 7
माम् उद्दिश्य ततस्तेन क्रोधारुणितचक्षुषा
वदता निहतो ऽसीति विमुक्तः शिखिपिच्छकः
mām uddiśya tatastena krodhāruṇitacakṣuṣā
vadatā nihato 'sīti vimuktaḥ śikhipicchakaḥ
- 8
स मे केशकलापाग्रम् ईषद् आमृश्य यातवान्
नागेषुर् इव कर्णास्त्रः किरीटाग्रं किरीटिनः
sa me keśakalāpāgram īṣad āmṛśya yātavān
nāgeṣur iva karṇāstraḥ kirīṭāgraṃ kirīṭinaḥ
- 9
स्वयम् एव च तत्तस्य कपालम् अपतत्करात्
निःस्थाम्नः कुञ्जरस्येव विधानं विनशिष्यतः
svayam eva ca tattasya kapālam apatatkarāt
niḥsthāmnaḥ kuñjarasyeva vidhānaṃ vinaśiṣyataḥ
- 10
सो ऽथ ग्रामेयकेनेव धिया धूर्तो ऽतिसंधितः
धूम्रछायः शनैर्जल्पन्धिग्धिङ्माम् इति निर्गतः
so 'tha grāmeyakeneva dhiyā dhūrto 'tisaṃdhitaḥ
dhūmrachāyaḥ śanairjalpandhigdhiṅmām iti nirgataḥ
- 11
अथ गन्धर्वदत्ता मां दीप्तामर्षम् अशङ्किता
सवाडवम् उपासर्पन्निम्नगेव महार्णवम्
atha gandharvadattā māṃ dīptāmarṣam aśaṅkitā
savāḍavam upāsarpannimnageva mahārṇavam
- 12
मम त्व् आसीद् अहो स्त्रीणाम् अत्रासमत्रपं मनः
यत्पुरेव प्रगल्भेयम् उपसर्पति माम् इति
mama tv āsīd aho strīṇām atrāsamatrapaṃ manaḥ
yatpureva pragalbheyam upasarpati mām iti
- 13
सा माम् अवोचद्भीतेव शीतलीभवत क्षणम्
किंचिद्विज्ञापयाम्य् एष यातु वः क्रोधपावकः
sā mām avocadbhīteva śītalībhavata kṣaṇam
kiṃcidvijñāpayāmy eṣa yātu vaḥ krodhapāvakaḥ
- 14
अयं विकचिको नाम गौरीशिखरवासिनः
विद्याधरपतेर्भ्राता गौरिमुण्डस्य साधकः
ayaṃ vikaciko nāma gaurīśikharavāsinaḥ
vidyādharapaterbhrātā gaurimuṇḍasya sādhakaḥ
- 15
भूतव्रतं च नामेदं बहुविध्नं चरत्य् अयम्
समाप्ते ऽस्मिन्न् अविघ्नेन वन्ध्याः स्युर्नो मनोरथः
bhūtavrataṃ ca nāmedaṃ bahuvidhnaṃ caraty ayam
samāpte 'sminn avighnena vandhyāḥ syurno manorathaḥ
- 16
या च पूजयते तं स्त्री गौरीव्रतविचारिणम्
तस्यै वरं महागौरी दयते शापम् अन्यथा
yā ca pūjayate taṃ strī gaurīvratavicāriṇam
tasyai varaṃ mahāgaurī dayate śāpam anyathā
- 17
विज्ञापयामि संक्षिप्तं क्रोधाद् अन्यो महाबलः
विहन्ता सर्वसिद्धीनां नास्ति विघ्नविनायकः
vijñāpayāmi saṃkṣiptaṃ krodhād anyo mahābalaḥ
vihantā sarvasiddhīnāṃ nāsti vighnavināyakaḥ
- 18
सिद्धकल्पं च तस्येदं खण्डयत्या महाव्रतम्
तुष्टया तोषिता गौरी मया यूयं च रोषिताः
siddhakalpaṃ ca tasyedaṃ khaṇḍayatyā mahāvratam
tuṣṭayā toṣitā gaurī mayā yūyaṃ ca roṣitāḥ
- 19
तद् एतस्यास्य युष्मभ्यं क्रुद्धेभ्यः क्रुध्यतस्तथा
गौरीभ्रष्टा महाविद्या विद्येव तनुमेधसः
tad etasyāsya yuṣmabhyaṃ kruddhebhyaḥ krudhyatastathā
gaurībhraṣṭā mahāvidyā vidyeva tanumedhasaḥ
- 20
तेन युष्माकम् एवेदं कार्यं कुर्वाणया गुरु
यन्मया रोषिता यूयम् एतन्मे मृष्यताम् इति
tena yuṣmākam evedaṃ kāryaṃ kurvāṇayā guru
yanmayā roṣitā yūyam etanme mṛṣyatām iti
- 21
स च क्रोधग्रहश्चण्डः शनकैः शनकैर्मम
दयितामन्त्रवादिन्या हृदयाद् अपसर्पितः
sa ca krodhagrahaścaṇḍaḥ śanakaiḥ śanakairmama
dayitāmantravādinyā hṛdayād apasarpitaḥ
- 22
इति संजनितोत्साहस्तयाहं मन्त्रसाधनैः
आसीनः सानुदासेन कदाचिद् इति भाषितः
iti saṃjanitotsāhastayāhaṃ mantrasādhanaiḥ
āsīnaḥ sānudāsena kadācid iti bhāṣitaḥ
- 23
आसीद् इहैव चम्पायाम् इष्टभार्यो महीपतिः
तेन दोहदकं पृष्टा भार्यावोचत्त्रपावती
āsīd ihaiva campāyām iṣṭabhāryo mahīpatiḥ
tena dohadakaṃ pṛṣṭā bhāryāvocattrapāvatī
- 24
क्रीडन्मकरकुम्भीरकुलीरझषकच्छपे
क्रीडेयं सह युष्माभिर्जले जलनिधेर् इति
krīḍanmakarakumbhīrakulīrajhaṣakacchape
krīḍeyaṃ saha yuṣmābhirjale jalanidher iti
- 25
राज्ञापि मगधैर्साङ्गैर्बन्धयित्वाशु निम्नगाम्
सरः सागरविस्तारम् अवन्ध्याज्ञेन खानितम्
rājñāpi magadhairsāṅgairbandhayitvāśu nimnagām
saraḥ sāgaravistāram avandhyājñena khānitam
- 26
तत्र नक्रादिसंस्थानदारुयन्त्रनिरन्तरे
विमानाकारपोतस्थौ तौ राजानौ विचेरतुः
tatra nakrādisaṃsthānadāruyantranirantare
vimānākārapotasthau tau rājānau viceratuḥ
- 27
आरभ्य च ततः कालात्तत्र यात्रा प्रवर्तिता
आहृष्टपरपुष्टेषु दिवसेषु महीभुजा
ārabhya ca tataḥ kālāttatra yātrā pravartitā
āhṛṣṭaparapuṣṭeṣu divaseṣu mahībhujā
- 28
ते चैते दिवसाः प्राप्ताः पटुकोकिलकूजिताः
सा च यात्रेयम् आयाता रम्यामृतभुजाम् अपि
te caite divasāḥ prāptāḥ paṭukokilakūjitāḥ
sā ca yātreyam āyātā ramyāmṛtabhujām api
- 29
इष्यते यदि च द्रष्टुं सह गन्धर्वदत्तया
अस्मदादिपरीवारैस्ततः सा दृश्यताम् इति
iṣyate yadi ca draṣṭuṃ saha gandharvadattayā
asmadādiparīvāraistataḥ sā dṛśyatām iti
- 30
अभिनीय ततो रात्रिं प्रातः प्रवहणाश्रितः
निर्गच्छामि स्म चम्पायाः पौरनेत्रोत्पलार्चितः
abhinīya tato rātriṃ prātaḥ pravahaṇāśritaḥ
nirgacchāmi sma campāyāḥ pauranetrotpalārcitaḥ

