43 shlokas
- 1
नानाविधानां शल्यानां नानादेशप्रबोधिनाम्
आहर्तुम् अभ्युपायो यस्तद्यन्त्रं यच्च दर्शने
nānāvidhānāṃ śalyānāṃ nānādeśaprabodhinām
āhartum abhyupāyo yastadyantraṃ yacca darśane
- 2
अर्शोभगन्दरादीनां शस्त्रक्षाराग्नियोजने
शेषाङ्गपरिरक्षायां तथा वस्त्यादिकर्मणि
arśobhagandarādīnāṃ śastrakṣārāgniyojane
śeṣāṅgaparirakṣāyāṃ tathā vastyādikarmaṇi
- 3
घटिकालाबुशृङ्गं च जाम्बवौष्ठादिकानि च
अनेकरूपकार्याणि यन्त्राणि विविधान्यतः
ghaṭikālābuśṛṅgaṃ ca jāmbavauṣṭhādikāni ca
anekarūpakāryāṇi yantrāṇi vividhānyataḥ
- 4
विकल्प्य कल्पयेत्बुद्ध्या यथास्थूलं तु वक्ष्यते
तुल्यानि कङ्कसिंहर्क्षकाकादिमृगपक्षिणाम्
vikalpya kalpayetbuddhyā yathāsthūlaṃ tu vakṣyate
tulyāni kaṅkasiṃharkṣakākādimṛgapakṣiṇām
- 5
मुखैर्मुखानि यन्त्राणां कुर्यात्तत्संज्ञकानि च
अष्टादशाङ्गुलायामान्यायसानि च भूरिशः
mukhairmukhāni yantrāṇāṃ kuryāttatsaṃjñakāni ca
aṣṭādaśāṅgulāyāmānyāyasāni ca bhūriśaḥ
- 6
मसूराकारपर्यन्तैः कण्ठे बद्धानि कीलकैः
विद्यात्स्वस्तिकयन्त्राणि मूले ऽङ्कुशनतानि च
masūrākāraparyantaiḥ kaṇṭhe baddhāni kīlakaiḥ
vidyātsvastikayantrāṇi mūle 'ṅkuśanatāni ca
- 7
तैर्दृढैर् अस्थिसंलग्नशल्याहरणम् इष्यते
कीलबद्धविमुक्ताग्रौ संदंशौ षोडशाङ्गुलौ
tairdṛḍhair asthisaṃlagnaśalyāharaṇam iṣyate
kīlabaddhavimuktāgrau saṃdaṃśau ṣoḍaśāṅgulau
- 8
त्वक्सिरास्नायुपिशितलग्नशल्यापकर्षणौ
षडङ्गुलो ऽन्यो हरणे सूक्ष्मशल्योपपक्ष्मणाम्
tvaksirāsnāyupiśitalagnaśalyāpakarṣaṇau
ṣaḍaṅgulo 'nyo haraṇe sūkṣmaśalyopapakṣmaṇām
- 9
मुचुण्डी सूक्ष्मदन्तर्जुर्मूले रुचकभूषणा
गम्भीरव्रणमांसानाम् अर्मणः शेषितस्य च
mucuṇḍī sūkṣmadantarjurmūle rucakabhūṣaṇā
gambhīravraṇamāṃsānām armaṇaḥ śeṣitasya ca
- 10
द्वे द्वादशाङ्गुले मत्स्यतालवत्द्व्येकतालके
तालयन्त्रे स्मृते कर्णनाडीशल्यापहारिणी
dve dvādaśāṅgule matsyatālavatdvyekatālake
tālayantre smṛte karṇanāḍīśalyāpahāriṇī
- 11
नाडीयन्त्राणि सुषिराण्य् एकानेकमुखानि च
स्रोतोगतानां शल्यानाम् आमयानां च दर्शने
nāḍīyantrāṇi suṣirāṇy ekānekamukhāni ca
srotogatānāṃ śalyānām āmayānāṃ ca darśane
- 12
क्रियाणां सुकरत्वाय कुर्याद् आचूषणाय च
तद्विस्तारपरीणाहदैर्घ्यं स्रोतोऽनुरोधतः
kriyāṇāṃ sukaratvāya kuryād ācūṣaṇāya ca
tadvistāraparīṇāhadairghyaṃ sroto'nurodhataḥ
- 13
दशाङ्गुलार्धनाहान्तःकण्ठशल्यावलोकिनी
नाडी पञ्चमुखच्छिद्रा चतुष्कर्णस्य संग्रहे
daśāṅgulārdhanāhāntaḥkaṇṭhaśalyāvalokinī
nāḍī pañcamukhacchidrā catuṣkarṇasya saṃgrahe
- 14
वारङ्गस्य द्विकर्णस्य त्रिच्छिद्रा तत्प्रमाणतः
vāraṅgasya dvikarṇasya tricchidrā tatpramāṇataḥ
- 15
नाडीर् एवंविधाश्चान्या द्रष्टुं शल्यानि कारयेत्
पद्मकर्णिकया मूर्ध्नि सदृशी द्वादशाङ्गुला
nāḍīr evaṃvidhāścānyā draṣṭuṃ śalyāni kārayet
padmakarṇikayā mūrdhni sadṛśī dvādaśāṅgulā
- 16
चतुर्थसुषिरा नाडी शल्यनिर्घातिनी मता
अर्शसां गोस्तनाकारं यन्त्रकं चतुरङ्गुलम्
caturthasuṣirā nāḍī śalyanirghātinī matā
arśasāṃ gostanākāraṃ yantrakaṃ caturaṅgulam
- 17
नाहे पञ्चाङ्गुलं पुंसां प्रमदानां षडङ्गुलम्
द्विच्छिद्रं दर्शने व्याधेर् एकच्छिद्रं तु कर्मणि
nāhe pañcāṅgulaṃ puṃsāṃ pramadānāṃ ṣaḍaṅgulam
dvicchidraṃ darśane vyādher ekacchidraṃ tu karmaṇi
- 18
मध्ये ऽस्य त्र्यङ्गुलं छिद्रम् अङ्गुष्ठोदरविस्तृतम्
अर्धाङ्गुलोच्छ्रितोद्वृत्तकर्णिकं च तदूर्ध्वतः
madhye 'sya tryaṅgulaṃ chidram aṅguṣṭhodaravistṛtam
ardhāṅgulocchritodvṛttakarṇikaṃ ca tadūrdhvataḥ
- 19
शम्याख्यं तादृग् अच्छिद्रं यन्त्रम् अर्शःप्रपीडनम्
सर्वथापनयेद् ओष्ठं छिद्राद् ऊर्ध्वं भगन्दरे
śamyākhyaṃ tādṛg acchidraṃ yantram arśaḥprapīḍanam
sarvathāpanayed oṣṭhaṃ chidrād ūrdhvaṃ bhagandare
- 20
घ्राणार्बुदार्शसाम् एकच्छिद्रा नाड्यङ्गुलद्वया
प्रदेशिनीपरीणाहा स्याद्भगन्दरयन्त्रवत्
ghrāṇārbudārśasām ekacchidrā nāḍyaṅguladvayā
pradeśinīparīṇāhā syādbhagandarayantravat
- 21
अङ्गुलीत्राणकं दान्तं वार्क्षं वा चतुरङ्गुलम्
द्विच्छिद्रं गोस्तनाकारं तद्वक्त्रविवृतौ सुखम्
aṅgulītrāṇakaṃ dāntaṃ vārkṣaṃ vā caturaṅgulam
dvicchidraṃ gostanākāraṃ tadvaktravivṛtau sukham
- 22
योनिव्रणेक्षणं मध्ये सुषिरं षोडशाङ्गुलम्
मुद्राबद्धं चतुर्भित्तम् अम्भोजमुकुलाननम्
yonivraṇekṣaṇaṃ madhye suṣiraṃ ṣoḍaśāṅgulam
mudrābaddhaṃ caturbhittam ambhojamukulānanam
- 23
चतुःशलाकम् आक्रान्तं मूले तद्विकसेन्मुखे
यन्त्रे नाडीव्रणाभ्यङ्गक्षालनाय षडङ्गुले
catuḥśalākam ākrāntaṃ mūle tadvikasenmukhe
yantre nāḍīvraṇābhyaṅgakṣālanāya ṣaḍaṅgule
- 24
वस्तियन्त्राकृती मूले मुखे ऽङ्गुष्ठकलायखे
अग्रतो ऽकर्णिके मूले निबद्धमृदुचर्मणी
vastiyantrākṛtī mūle mukhe 'ṅguṣṭhakalāyakhe
agrato 'karṇike mūle nibaddhamṛducarmaṇī
- 25
द्विद्वारा नलिका पिच्छनलिका वोदकोदरे
धूमवस्त्यादियन्त्राणि निर्दिष्टानि यथायथम्
dvidvārā nalikā picchanalikā vodakodare
dhūmavastyādiyantrāṇi nirdiṣṭāni yathāyatham
- 26
त्र्यङ्गुलास्यं भवेच्छृङ्गं चूषणे ऽष्टादशाङ्गुलम्
अग्रे सिद्धार्थकच्छिद्रं सुनद्धं चूचुकाकृति
tryaṅgulāsyaṃ bhavecchṛṅgaṃ cūṣaṇe 'ṣṭādaśāṅgulam
agre siddhārthakacchidraṃ sunaddhaṃ cūcukākṛti
- 27
स्याद्द्वादशाङ्गुलो ऽलाबुर्नाहे त्वष्टादशाङ्गुलः
चतुस्त्र्यङ्गुलवृत्तास्यो दीप्तो ऽन्तः श्लेष्मरक्तहृत्
syāddvādaśāṅgulo 'lāburnāhe tvaṣṭādaśāṅgulaḥ
catustryaṅgulavṛttāsyo dīpto 'ntaḥ śleṣmaraktahṛt
- 28
तद्वद्घटी हिता गुल्मविलयोन्नमने च सा
शलाकाख्यानि यन्त्राणि नानाकर्माकृतीनि च
tadvadghaṭī hitā gulmavilayonnamane ca sā
śalākākhyāni yantrāṇi nānākarmākṛtīni ca
- 29
यथायोगप्रमाणानि तेषाम् एषणकर्मणी
उभे गण्डूपदमुखे स्रोतोभ्यः शल्यहारिणी
yathāyogapramāṇāni teṣām eṣaṇakarmaṇī
ubhe gaṇḍūpadamukhe srotobhyaḥ śalyahāriṇī
- 30
मसूरदलवक्त्रे द्वे स्याताम् अष्टनवाङ्गुले
शङ्कवः षड् उभौ तेषां षोडशद्वादशाङ्गुलौ
masūradalavaktre dve syātām aṣṭanavāṅgule
śaṅkavaḥ ṣaḍ ubhau teṣāṃ ṣoḍaśadvādaśāṅgulau

