18 shlokas
- 1
अग्ने त्वं सु जागृहि वयं सु मन्दिषीमहि
गोपाय नः स्वस्तये प्रबुधे नः पुनर्दद इति
agne tvaṃ su jāgṛhi vayaṃ su mandiṣīmahi
gopāya naḥ svastaye prabudhe naḥ punardada iti
- 2
दक्षिणतः शय एतद्वै यजमानस्यायतनं स्व एवायतने शये ऽग्निम् अभ्यावृत्य शये देवता एव यज्ञम् अभ्यावृत्य शय इति ब्राह्मणम्
dakṣiṇataḥ śaya etadvai yajamānasyāyatanaṃ sva evāyatane śaye 'gnim abhyāvṛtya śaye devatā eva yajñam abhyāvṛtya śaya iti brāhmaṇam
- 3
अथैषा पत्नी जघनेन गार्हपत्यं संविशति तूष्णीम्
athaiṣā patnī jaghanena gārhapatyaṃ saṃviśati tūṣṇīm
- 4
अथाध्वर्युर्मध्यरात्र आद्रुत्य प्रबुद्धयजुर्वाचयति त्वम् अग्ने व्रतपा असि देव आ मर्त्येष्व् आ
त्वं यज्ञेष्व् ईड्य इति
athādhvaryurmadhyarātra ādrutya prabuddhayajurvācayati tvam agne vratapā asi deva ā martyeṣv ā
tvaṃ yajñeṣv īḍya iti
- 5
अथाप आचामति दैवीं धियं मनामहे सुमृडीकाम् अभिष्टये
वर्चोधां यज्ञवाहसम्सुपारा नो असद्वश इति
athāpa ācāmati daivīṃ dhiyaṃ manāmahe sumṛḍīkām abhiṣṭaye
varcodhāṃ yajñavāhasamsupārā no asadvaśa iti
- 6
अथास्मै कंसे वा चमसे वा निःषिच्य व्रतं प्रयच्छति
athāsmai kaṃse vā camase vā niḥṣicya vrataṃ prayacchati
- 7
तद्दक्षिणतः परिश्रित्य व्रतयति ये देवा मनोजाता मनोयुजः सुदक्षा दक्षपितारस्ते नः पान्तु ते नो ऽवन्तु तेभ्यो नमस्तेभ्यः स्वाहेति
taddakṣiṇataḥ pariśritya vratayati ye devā manojātā manoyujaḥ sudakṣā dakṣapitāraste naḥ pāntu te no 'vantu tebhyo namastebhyaḥ svāheti
- 8
यजुषा यावन्मात्रं व्रतयित्वा तूष्णीं भूयो व्रतयति
yajuṣā yāvanmātraṃ vratayitvā tūṣṇīṃ bhūyo vratayati
- 9
एतस्मिन्काले प्रतिप्रस्थाता पत्न्यै पात्रे निःषिच्य व्रतं प्रयच्छति
etasminkāle pratiprasthātā patnyai pātre niḥṣicya vrataṃ prayacchati
- 10
तत्सा परिश्रित्य व्रतयति तूष्णीम्
tatsā pariśritya vratayati tūṣṇīm
- 11
निर्णिज्य पात्रे प्रयच्छतः
nirṇijya pātre prayacchataḥ
- 12
अथ तथैव पुरा नक्षत्राणाम् अन्तर्धानात्संप्रेष्य वाचंयमयोर्व्रते दोहयतः
atha tathaiva purā nakṣatrāṇām antardhānātsaṃpreṣya vācaṃyamayorvrate dohayataḥ
- 13
अथोदित आदित्ये यजमानः कृष्णाजिनम् आसज्य पूर्वया द्वारोपनिष्क्रम्याग्रेण शालां तिष्ठन्भूर्भुवः सुवर्व्रतं कृणुत व्रतं कृणुतेति त्रिर्वाचं विसृजते
athodita āditye yajamānaḥ kṛṣṇājinam āsajya pūrvayā dvāropaniṣkramyāgreṇa śālāṃ tiṣṭhanbhūrbhuvaḥ suvarvrataṃ kṛṇuta vrataṃ kṛṇuteti trirvācaṃ visṛjate
- 14
समानो वाचो विसर्गः समानं संवेशनयजुः समानं प्रबुद्धयजुः समानम् अपाम् आचमनं समानं व्रतनम्
samāno vāco visargaḥ samānaṃ saṃveśanayajuḥ samānaṃ prabuddhayajuḥ samānam apām ācamanaṃ samānaṃ vratanam
- 15
अथ सनीहारान्प्रहिणोति
atha sanīhārānprahiṇoti
- 16
स यं मन्यते न मा प्रत्याख्यास्यतीति तं प्रथमम् अभि प्रहिणोति विश्वे देवा अभि माम् आववृत्रन्पूषा सन्या सोमो राधसा देवः सविता वसोर्वसुदावेति
sa yaṃ manyate na mā pratyākhyāsyatīti taṃ prathamam abhi prahiṇoti viśve devā abhi mām āvavṛtranpūṣā sanyā somo rādhasā devaḥ savitā vasorvasudāveti
- 17
आहरन्तं दृष्ट्वा जपति नानाहरन्तं रास्वेयत्सोम आ भूयो भर मा पृणन्पूर्त्या वि राधि माहम् आयुषेति
āharantaṃ dṛṣṭvā japati nānāharantaṃ rāsveyatsoma ā bhūyo bhara mā pṛṇanpūrtyā vi rādhi māham āyuṣeti
- 18
स यथारूपं प्रतिगृह्णाति
sa yathārūpaṃ pratigṛhṇāti

