15 shlokas
- 1
सोमाय क्रीताय प्रोह्यमाणायानुब्रूहि सुब्रह्मण्य सुब्रह्मण्याम् आह्वय मा तु त्वम् आह्वा यजमान आह्वास्यतीति
somāya krītāya prohyamāṇāyānubrūhi subrahmaṇya subrahmaṇyām āhvaya mā tu tvam āhvā yajamāna āhvāsyatīti
- 2
यदा यजमानस्त्रिर् उपांश्व् आह्वयते ऽथैष सुब्रह्मण्यो ऽन्तरेणेषे तिष्ठन्पलाशशाखां धारयन्सुब्रह्मण्याम् आह्वयति सुब्रह्मण्यों सुब्रह्मण्योम् इति त्रिः
yadā yajamānastrir upāṃśv āhvayate 'thaiṣa subrahmaṇyo 'ntareṇeṣe tiṣṭhanpalāśaśākhāṃ dhārayansubrahmaṇyām āhvayati subrahmaṇyoṃ subrahmaṇyom iti triḥ
- 3
त्रिर् उक्तायां प्रच्यावयन्ति प्रच्यवस्व भुवस्पते विश्वान्य् अभि धामानि मा त्वा परिपरी विदन्मा त्वा परिपन्थिनो विदन्मा त्वा वृका अघायवो मा गन्धर्वो विश्वावसुर् आदघच्छ्येनो भूत्वा परापत यजमानस्य नो गृहे देवैः संस्कृतम् इति
trir uktāyāṃ pracyāvayanti pracyavasva bhuvaspate viśvāny abhi dhāmāni mā tvā pariparī vidanmā tvā paripanthino vidanmā tvā vṛkā aghāyavo mā gandharvo viśvāvasur ādaghacchyeno bhūtvā parāpata yajamānasya no gṛhe devaiḥ saṃskṛtam iti
- 4
प्रदक्षिणं राजानं परिवहन्ति
pradakṣiṇaṃ rājānaṃ parivahanti
- 5
अथैताव् अञ्जसोपसंक्रामतो ऽध्वर्युश्च यजमानश्च यजमानस्य स्वस्त्ययन्य् असि अपि पन्थाम् अगस्महि स्वस्तिगाम् अनेहसम्येन विश्वाः परि द्विषो वृणक्ति विन्दते वस्विति
athaitāv añjasopasaṃkrāmato 'dhvaryuśca yajamānaśca yajamānasya svastyayany asi api panthām agasmahi svastigām anehasamyena viśvāḥ pari dviṣo vṛṇakti vindate vasviti
- 6
अथाग्रेण शालां तिष्ठन्न् ओह्यमानं राजानं प्रतिमन्त्रयते नमो मित्रस्य वरुणस्य चक्षसे महो देवाय तद् ऋतं सपर्यत दूरेदृशे देवजाताय केतवे दिवस्पुत्राय सूर्याय शंसतेति
athāgreṇa śālāṃ tiṣṭhann ohyamānaṃ rājānaṃ pratimantrayate namo mitrasya varuṇasya cakṣase maho devāya tad ṛtaṃ saparyata dūredṛśe devajātāya ketave divasputrāya sūryāya śaṃsateti
- 7
अथैतत्सोमवाहनम् अनो ऽग्रेण शालाम् उदगीषम् उपस्थापयन्ति
athaitatsomavāhanam ano 'greṇa śālām udagīṣam upasthāpayanti
- 8
तद् उपस्तभ्नोति वरुणस्य स्कम्भनम् असीति
tad upastabhnoti varuṇasya skambhanam asīti
- 9
वरुणस्य स्कम्भसर्जनम् असीति शम्याम् उद्गूहति
varuṇasya skambhasarjanam asīti śamyām udgūhati
- 10
उन्मुक्तो वरुणस्य पाश इति योक्त्रम्
unmukto varuṇasya pāśa iti yoktram
- 11
अथ वै भवति
atha vai bhavati
- 12
विमुक्तो ऽन्यो ऽनड्वान्भवत्य् अविमुक्तो ऽन्यो ऽथातिथ्यं गृह्णाति यज्ञस्य संतत्यै पत्न्य् अन्वारभत इति ब्राह्मणम्
vimukto 'nyo 'naḍvānbhavaty avimukto 'nyo 'thātithyaṃ gṛhṇāti yajñasya saṃtatyai patny anvārabhata iti brāhmaṇam
- 13
अथाहैहि यजमानेति
athāhaihi yajamāneti
- 14
पूर्वया द्वारा शालां प्रपाद्य पृष्ठ्यां स्तीर्त्वापः प्रणीयातिथ्यं निर्वपत्य् अन्वारब्धायां पत्न्याम्
pūrvayā dvārā śālāṃ prapādya pṛṣṭhyāṃ stīrtvāpaḥ praṇīyātithyaṃ nirvapaty anvārabdhāyāṃ patnyām
- 15
अथ देवस्य त्वा सवितुः प्रसव इति प्रतिपदं कृत्वा
atha devasya tvā savituḥ prasava iti pratipadaṃ kṛtvā

