28 shlokas
- 1
अथात्रैव तिष्ठन्याचति चन्द्रं च छागां च कृष्णबलक्ष्याव् ऊर्णास्तुके उष्णीषं द्वे वाससी द्वे कृष्णाजिने सोमक्रयणीम् इति
athātraiva tiṣṭhanyācati candraṃ ca chāgāṃ ca kṛṣṇabalakṣyāv ūrṇāstuke uṣṇīṣaṃ dve vāsasī dve kṛṣṇājine somakrayaṇīm iti
- 2
अथ पृच्छति सोमविक्रयिञ्छुद्धस्ते सोमा३ इति
atha pṛcchati somavikrayiñchuddhaste somā3 iti
- 3
शुद्ध इतीतरः प्रत्याह
śuddha itītaraḥ pratyāha
- 4
सुविचितं राजानं पुरस्ताद्भागाभिर् उपतिष्ठत एष ते गायत्रो भाग इति मे सोमाय ब्रूताद् एष ते त्रैष्टुभो भाग इति मे सोमाय ब्रूताद् एष ते जागतो भाग इति मे सोमाय ब्रूताच्छन्दोमानां साम्राज्यं गच्छेति मे सोमाय ब्रूताद् इति
suvicitaṃ rājānaṃ purastādbhāgābhir upatiṣṭhata eṣa te gāyatro bhāga iti me somāya brūtād eṣa te traiṣṭubho bhāga iti me somāya brūtād eṣa te jāgato bhāga iti me somāya brūtācchandomānāṃ sāmrājyaṃ gaccheti me somāya brūtād iti
- 5
अथैतद्रोहितं चर्मानडुहम् उत्तरलोमास्तीर्य
athaitadrohitaṃ carmānaḍuham uttaralomāstīrya
- 6
अथैतद्द्विगुणं वासः प्राचीनदशम् उत्तरार्धे चर्मण उपस्तृणाति
athaitaddviguṇaṃ vāsaḥ prācīnadaśam uttarārdhe carmaṇa upastṛṇāti
- 7
अथ हिरण्यवता पाणिना राजानम् अभिमृशत्य् अंशुना ते अंशुः पृच्यतां परुषा परुर्गन्धस्ते कामम् अवतु मदाय रसो अच्युतो ऽमात्यो ऽसि शुक्रस्ते ग्रह इति
atha hiraṇyavatā pāṇinā rājānam abhimṛśaty aṃśunā te aṃśuḥ pṛcyatāṃ paruṣā parurgandhaste kāmam avatu madāya raso acyuto 'mātyo 'si śukraste graha iti
- 8
अथैनम् अतिच्छन्दसर्चा मिमीते
athainam aticchandasarcā mimīte
- 9
एकयैकयोत्सर्गं मिमीते
ekayaikayotsargaṃ mimīte
- 10
अयातयाम्नियायातयाम्नियैवैनं मिमीते
ayātayāmniyāyātayāmniyaivainaṃ mimīte
- 11
सर्वास्व् अङ्गुष्ठम् उपनिगृह्णाति अभि त्यं देवं सवितारम् ऊण्योः कविक्रतुम् अर्चामि सत्यसवसं रत्नधाम् अभि प्रियं मतिम्
ऊर्ध्वा यस्यामतिर्भा अदिद्युतत्सवीमनि हिरण्यपाणिर् अमिमीत सुक्रतुः कृपा सुवर् इति
sarvāsv aṅguṣṭham upanigṛhṇāti abhi tyaṃ devaṃ savitāram ūṇyoḥ kavikratum arcāmi satyasavasaṃ ratnadhām abhi priyaṃ matim
ūrdhvā yasyāmatirbhā adidyutatsavīmani hiraṇyapāṇir amimīta sukratuḥ kṛpā suvar iti
- 12
पञ्चकृत्वो यजुषा पञ्चकृत्वस्तूष्णीम्
pañcakṛtvo yajuṣā pañcakṛtvastūṣṇīm
- 13
दशकृत्वो मिमानो ऽर्धवेलां राज्ञो मिमीते
daśakṛtvo mimāno 'rdhavelāṃ rājño mimīte
- 14
अथातिशिष्टं राजानम्प्रजाभ्यस्त्वेत्य् उपसमूहति
athātiśiṣṭaṃ rājānamprajābhyastvety upasamūhati
- 15
समुच्चित्य वसनस्यान्तान्प्रदक्षिणम् उष्णीषेणोपनह्यति प्राणाय त्वेति
samuccitya vasanasyāntānpradakṣiṇam uṣṇīṣeṇopanahyati prāṇāya tveti
- 16
व्यानाय त्वेत्य् अनुशृन्थति
vyānāya tvety anuśṛnthati
- 17
अथोपरिष्टादङ्गुल्यावकाशं कृत्वा यजमानम् अवेक्षयति प्रजास्त्वम् अनु प्राणिहि प्रजास्त्वाम् अनु प्राणन्त्व् इति
athopariṣṭādaṅgulyāvakāśaṃ kṛtvā yajamānam avekṣayati prajāstvam anu prāṇihi prajāstvām anu prāṇantv iti
- 18
अथैनं चर्मणि निदधाति
athainaṃ carmaṇi nidadhāti
- 19
तं ततः कौत्स आदत्ते
taṃ tataḥ kautsa ādatte
- 20
अद्भिर् अभ्युक्ष्य चर्मोदूहति
adbhir abhyukṣya carmodūhati
- 21
अथोपोत्थाय पृच्छति सोमविक्रयिन्क्रय्यस्ते सोमा३ इति
athopotthāya pṛcchati somavikrayinkrayyaste somā3 iti
- 22
क्रय्य इतीतरः प्रत्याह
krayya itītaraḥ pratyāha
- 23
मूजवता३ इति
mūjavatā3 iti
- 24
मूजवतो हीतीतरः प्रत्याह
mūjavato hītītaraḥ pratyāha
- 25
अथैनं गवा पणते गवा ते क्रीणानीति
athainaṃ gavā paṇate gavā te krīṇānīti
- 26
क्रीतः सोम इत्य् आह सोमविक्रयी वयांसि व्याचक्ष्वेति
krītaḥ soma ity āha somavikrayī vayāṃsi vyācakṣveti
- 27
एषा ते सोमक्रयणी चन्द्रं ते छागा ते वस्त्रं त इति
eṣā te somakrayaṇī candraṃ te chāgā te vastraṃ ta iti
- 28
अथैनं हिरण्येन पणते
athainaṃ hiraṇyena paṇate

