13 shlokas
- 1
अथ परिकर्मिणः संशास्त्य् अनुच्छिष्टीकुर्वन्त एतं चरुं व्युद्धृत्य प्राश्नीताथैतां चरुस्थालीं सक्षामकाषाम् एतन्मेक्षणम् एतं वेदम् एतद्बर्हिश्चतुष्टयम् उदयनीयाय निधत्ताद् इति
atha parikarmiṇaḥ saṃśāsty anucchiṣṭīkurvanta etaṃ caruṃ vyuddhṛtya prāśnītāthaitāṃ carusthālīṃ sakṣāmakāṣām etanmekṣaṇam etaṃ vedam etadbarhiścatuṣṭayam udayanīyāya nidhattād iti
- 2
शंय्वन्तः प्रायणीयः संतिष्ठते
śaṃyvantaḥ prāyaṇīyaḥ saṃtiṣṭhate
- 3
अत्रैतत्पूर्णपात्रम् अन्तर्वेदि निनयति
atraitatpūrṇapātram antarvedi ninayati
- 4
अथैतद्ध्रुवाज्यम् आप्याय्य स्रुचि चतुर्गृहीतं गृहीत्वा सूत्रेण हिरण्यं निष्टर्क्यं बद्ध्वा दर्भनाड्यां प्रग्रथ्य स्रुच्य् अवदधातीयं ते शुक्र तनूर् इदं वर्चस्तया संभव भ्राजं गच्छेति
athaitaddhruvājyam āpyāyya sruci caturgṛhītaṃ gṛhītvā sūtreṇa hiraṇyaṃ niṣṭarkyaṃ baddhvā darbhanāḍyāṃ pragrathya srucy avadadhātīyaṃ te śukra tanūr idaṃ varcastayā saṃbhava bhrājaṃ gaccheti
- 5
अत्रैतां दर्भनाडीं स्रुग्दण्ड उपसंगृह्याहवनीये जुहोत्य् अन्वारब्धे यजमाने जूर् असि धृता मनसा जुष्टा विष्णवे तस्यास्ते सत्यसवसः प्रसवे वाचो यन्त्रम् अशीय स्वाहेति
atraitāṃ darbhanāḍīṃ srugdaṇḍa upasaṃgṛhyāhavanīye juhoty anvārabdhe yajamāne jūr asi dhṛtā manasā juṣṭā viṣṇave tasyāste satyasavasaḥ prasave vāco yantram aśīya svāheti
- 6
अपरं चतुर्गृहीतं गृहीत्वाथ याचति स्फ्यम् उदपात्रं बर्हिर्हिरण्यम् इति
aparaṃ caturgṛhītaṃ gṛhītvātha yācati sphyam udapātraṃ barhirhiraṇyam iti
- 7
एतत्समादायाहैहि यजमानेति
etatsamādāyāhaihi yajamāneti
- 8
अन्वग्यजमानो ऽनूची पत्नी स्थालीं पद्धरणीम् आदाय पूर्वया द्वारोपनिष्क्रम्याग्रेण शालां तिष्ठन्यजमानम् आज्यम् अवेक्षयति शुक्रम् असि अमृतम् असि वैश्वदेवं हविर् इति
anvagyajamāno 'nūcī patnī sthālīṃ paddharaṇīm ādāya pūrvayā dvāropaniṣkramyāgreṇa śālāṃ tiṣṭhanyajamānam ājyam avekṣayati śukram asi amṛtam asi vaiśvadevaṃ havir iti
- 9
अथैनं हिरण्यम् अन्तर्धायादित्यम् उदीक्षयति सूर्यस्य चक्षुर् आरुहम् अग्नेर् अक्ष्णः कनीनिकाम्यद् एतशेभिर् ईयसे भ्राजमानो विपश्चितेति
athainaṃ hiraṇyam antardhāyādityam udīkṣayati sūryasya cakṣur āruham agner akṣṇaḥ kanīnikāmyad etaśebhir īyase bhrājamāno vipaściteti
- 10
अथैतां सोमक्रयणीम् अग्रेण शालाम् उदीचीम् अतिवित्सयन्ति
athaitāṃ somakrayaṇīm agreṇa śālām udīcīm ativitsayanti
- 11
ताम् अनुमन्त्रयते चिद् असि मनासीत्य् आन्ताद् अनुवाकस्य
tām anumantrayate cid asi manāsīty āntād anuvākasya
- 12
अथाह दक्षिणस्येर्मस्य सप्तमं पदं जोषयध्वम् इति
athāha dakṣiṇasyermasya saptamaṃ padaṃ joṣayadhvam iti
- 13
तस्यै षट्पदान्य् अनुनिष्क्रामति
tasyai ṣaṭpadāny anuniṣkrāmati

