26 shlokas
- 1
अथ यजमानायतने कृष्णाजिनं प्राचीनग्रीवम् उत्तरलोमोपस्तृणाति
atha yajamānāyatane kṛṣṇājinaṃ prācīnagrīvam uttaralomopastṛṇāti
- 2
तस्य शुक्लकृष्णे संमृशति शुक्ले ऽङ्गुष्ठो भवति कृष्णे ऽङ्गुलिर् ऋक्सामयोः शिल्पे स्थस्ते वाम् आरभे ते मा पातम् आस्य यज्ञस्योदृच इति
tasya śuklakṛṣṇe saṃmṛśati śukle 'ṅguṣṭho bhavati kṛṣṇe 'ṅgulir ṛksāmayoḥ śilpe sthaste vām ārabhe te mā pātam āsya yajñasyodṛca iti
- 3
अथ दक्षिणं जान्व् आच्याभिसर्पतीमां धियं शिक्षमाणस्य देव क्रतुं दक्षं वरुण संशिशाधि
ययाति विश्वा दुरिता तरेम सुतर्माणम् अधि नावं रुहेमेति
atha dakṣiṇaṃ jānv ācyābhisarpatīmāṃ dhiyaṃ śikṣamāṇasya deva kratuṃ dakṣaṃ varuṇa saṃśiśādhi
yayāti viśvā duritā tarema sutarmāṇam adhi nāvaṃ ruhemeti
- 4
अथोपस्थं कृत्वा प्रदक्षिणं मेखलां पर्यस्यति ऊर्ग् अस्य् आङ्गिरस्य् ऊर्णम्रदा ऊर्जं मे यच्छेति
athopasthaṃ kṛtvā pradakṣiṇaṃ mekhalāṃ paryasyati ūrg asy āṅgirasy ūrṇamradā ūrjaṃ me yaccheti
- 5
पाहि मा मा मा हिंसीर् इति निष्टर्क्यं ग्रन्थिं ग्रथ्नाति
pāhi mā mā mā hiṃsīr iti niṣṭarkyaṃ granthiṃ grathnāti
- 6
एतस्मिन्काले प्रतिप्रस्थाता योक्त्रेण पत्नीं संनह्यत्य् आशासाना सौमनसं सं त्वा नह्यामीति द्वाभ्याम्
etasminkāle pratiprasthātā yoktreṇa patnīṃ saṃnahyaty āśāsānā saumanasaṃ saṃ tvā nahyāmīti dvābhyām
- 7
अथ यजमानं वाससा प्रोर्णोति विष्णोः शर्मासि शर्म यजमानस्य शर्म मे यच्छेति
atha yajamānaṃ vāsasā prorṇoti viṣṇoḥ śarmāsi śarma yajamānasya śarma me yaccheti
- 8
वसनस्यातीकाशेषु वाचयति नक्षत्राणां मातीकाशात्पाहीति
vasanasyātīkāśeṣu vācayati nakṣatrāṇāṃ mātīkāśātpāhīti
- 9
प्रतिकृष्य वसनस्यान्तान्प्रदक्षिणम् उष्णीषेण शिरो वेष्टयति श्रिया ते शिरो वेष्टयामि श्रियै यशसे ब्रह्मवर्चसायेति
pratikṛṣya vasanasyāntānpradakṣiṇam uṣṇīṣeṇa śiro veṣṭayati śriyā te śiro veṣṭayāmi śriyai yaśase brahmavarcasāyeti
- 10
एतस्मिन्काले प्रतिप्रस्थाता पत्न्यै कुम्बकुरीरम् अध्यूहति तूष्णीम्
etasminkāle pratiprasthātā patnyai kumbakurīram adhyūhati tūṣṇīm
- 11
अथास्यैषा कृष्णविषाणा त्रिवलिर्वा पञ्चवलिर्वा शाण्या रज्ज्वा परितृण्णा मण्डचरवद्विग्रथिता
athāsyaiṣā kṛṣṇaviṣāṇā trivalirvā pañcavalirvā śāṇyā rajjvā paritṛṇṇā maṇḍacaravadvigrathitā
- 12
तां यजमानाय प्रयच्छतीन्द्रस्य योनिर् असीति
tāṃ yajamānāya prayacchatīndrasya yonir asīti
- 13
मा मा हिंसीर् इति यजमानः प्रतिगृह्णाति
mā mā hiṃsīr iti yajamānaḥ pratigṛhṇāti
- 14
तां वसनस्यान्तमायां दशायां बद्ध्वा तयान्तर्वेदि लोष्टम् उद्धन्ति कृष्यै त्वा सुसस्याया इति
tāṃ vasanasyāntamāyāṃ daśāyāṃ baddhvā tayāntarvedi loṣṭam uddhanti kṛṣyai tvā susasyāyā iti
- 15
सुपिप्पलाभ्यस्त्वौषधीभ्य इति दक्षिणं गोदानं कण्डूयते
supippalābhyastvauṣadhībhya iti dakṣiṇaṃ godānaṃ kaṇḍūyate
- 16
एतस्मिन्काले प्रतिप्रस्थाता पत्न्यै शङ्कुम् आबध्नाति एतेन कण्डूयस्वेति
etasminkāle pratiprasthātā patnyai śaṅkum ābadhnāti etena kaṇḍūyasveti
- 17
अथास्मा ऊर्ध्वाग्रम् औदुम्बरं दण्डं प्रयच्छति मुखेन संमितम्सूपस्था देवो वनस्पतिर् इति
athāsmā ūrdhvāgram audumbaraṃ daṇḍaṃ prayacchati mukhena saṃmitamsūpasthā devo vanaspatir iti
- 18
ऊर्ध्वो मा पाह्य् ओदृच इति यजमानः प्रतिगृह्णाति
ūrdhvo mā pāhy odṛca iti yajamānaḥ pratigṛhṇāti
- 19
अथैनं यज्ञस्यान्वारम्भं वाचयति स्वाहा यज्ञं मनसा स्वाहा द्यावापृथिवीभ्याम्स्वाहोरोर् अन्तरिक्षात्स्वाहा यज्ञं वाताद् आरभ इति
athainaṃ yajñasyānvārambhaṃ vācayati svāhā yajñaṃ manasā svāhā dyāvāpṛthivībhyāmsvāhoror antarikṣātsvāhā yajñaṃ vātād ārabha iti
- 20
अत्र मुष्टीकरोति वाचं यच्छति
atra muṣṭīkaroti vācaṃ yacchati
- 21
अथाह अदीक्षिष्टायं ब्राह्मणो ऽसाव् इत्थंगोत्रो ऽमुष्य पुत्रो ऽमुष्य पौत्रो ऽमुष्य नप्ता तम् इन्द्रायेन्द्राग्निभ्यां वसुभ्यो रुद्रेभ्य आदित्येभ्यो विश्वेभ्यो देवेभ्यो ब्राह्मणेभ्यश्च सोमपेभ्यः प्रब्रूम इति
athāha adīkṣiṣṭāyaṃ brāhmaṇo 'sāv itthaṃgotro 'muṣya putro 'muṣya pautro 'muṣya naptā tam indrāyendrāgnibhyāṃ vasubhyo rudrebhya ādityebhyo viśvebhyo devebhyo brāhmaṇebhyaśca somapebhyaḥ prabrūma iti
- 22
त्रिर् उपांश्व् आह
trir upāṃśv āha
- 23
देवेभ्य एवैनं प्राह
devebhya evainaṃ prāha
- 24
त्रिर् उच्चैर् उपनिष्क्रम्य
trir uccair upaniṣkramya
- 25
उभयेभ्य एवैनं देवमनुष्येभ्यः प्राहेति ब्राह्मणम्
ubhayebhya evainaṃ devamanuṣyebhyaḥ prāheti brāhmaṇam
- 26
अथैनं संशास्ति
athainaṃ saṃśāsti

