25 shlokas
- 1
अग्निष्टोमेन यक्ष्यमाणो भवति
agniṣṭomena yakṣyamāṇo bhavati
- 2
स उपकल्पयते कृष्णाजिनं च कृष्णविषाणां च वासश्च मेखलां च सैषा पृथ्वी वेणीकार्या भवति त्रिवृद् एकतःपाशा द्वाविंशतिं च दर्भपुञ्जीलानि नवनीतं चाञ्जनं च सतूलां च शरेषीकाम् औदुम्बरं च दण्डं चमसं च व्रतप्रदानं स्थालीं सशिक्यां समेक्षणाम्
sa upakalpayate kṛṣṇājinaṃ ca kṛṣṇaviṣāṇāṃ ca vāsaśca mekhalāṃ ca saiṣā pṛthvī veṇīkāryā bhavati trivṛd ekataḥpāśā dvāviṃśatiṃ ca darbhapuñjīlāni navanītaṃ cāñjanaṃ ca satūlāṃ ca śareṣīkām audumbaraṃ ca daṇḍaṃ camasaṃ ca vratapradānaṃ sthālīṃ saśikyāṃ samekṣaṇām
- 3
एतानि त्रयोदश यजमानः
etāni trayodaśa yajamānaḥ
- 4
तावन्त्य् एव पत्नीम् अभितो भवन्ति कुम्बं च कुरीरं च वासश्च योक्त्रं चापरिमितानि च दर्भपुञ्जीलानि नवनीतं चाञ्जनं च सतूला च शरेषीकामृन्मयश्च पात्रः शङ्कुश्च स्थाली सशिक्या समेक्षणा
tāvanty eva patnīm abhito bhavanti kumbaṃ ca kurīraṃ ca vāsaśca yoktraṃ cāparimitāni ca darbhapuñjīlāni navanītaṃ cāñjanaṃ ca satūlā ca śareṣīkāmṛnmayaśca pātraḥ śaṅkuśca sthālī saśikyā samekṣaṇā
- 5
जुष्टे देवयजने शाला कारिता भवति
juṣṭe devayajane śālā kāritā bhavati
- 6
पुरोहविषि देवयजने याजयेद् इत्य् एतेषां यज्जोषयते
purohaviṣi devayajane yājayed ity eteṣāṃ yajjoṣayate
- 7
प्राचीनवंशा दिक्ष्वतीकाशा दक्षिणतो वर्षीयसी
prācīnavaṃśā dikṣvatīkāśā dakṣiṇato varṣīyasī
- 8
तस्यै चतस्रो द्वारः कुर्वन्ति प्राचीं दक्षिणां प्रतीचीम् उदीचीम्
tasyai catasro dvāraḥ kurvanti prācīṃ dakṣiṇāṃ pratīcīm udīcīm
- 9
दक्षिणतो व्रतश्रपणागारं कुर्वन्ति पश्चात्पत्नीशालम्
dakṣiṇato vrataśrapaṇāgāraṃ kurvanti paścātpatnīśālam
- 10
अथ यदि दूरे तीर्थं भवत्य् उत्तरेण शालां द्वौ कटपरिवारौ कुर्वन्ति पूर्वं यजमानायापरं पत्न्यै
atha yadi dūre tīrthaṃ bhavaty uttareṇa śālāṃ dvau kaṭaparivārau kurvanti pūrvaṃ yajamānāyāparaṃ patnyai
- 11
तयोः प्राची द्वारौ कुर्वन्ति
tayoḥ prācī dvārau kurvanti
- 12
तद् उदकुम्भौ निधापयति
tad udakumbhau nidhāpayati
- 13
अथामावास्येन वा हविषेष्ट्वा नक्षत्रे वारण्योर् अग्नीन्समारोह्य शालाम् अभिप्रैति
athāmāvāsyena vā haviṣeṣṭvā nakṣatre vāraṇyor agnīnsamārohya śālām abhipraiti
- 14
उत्तरेण शालां परीत्य पूर्वया द्वारा शालां प्रपाद्य गार्हपत्यस्यायतने मथित्वाग्नीन्विहृत्य मध्यमे वंशे राजानं प्रग्रथ्नन्ति
uttareṇa śālāṃ parītya pūrvayā dvārā śālāṃ prapādya gārhapatyasyāyatane mathitvāgnīnvihṛtya madhyame vaṃśe rājānaṃ pragrathnanti
- 15
परिस्तृणन्ति
paristṛṇanti
- 16
दक्षिणत उपविशतो ब्रह्मा च यजमानश्च
dakṣiṇata upaviśato brahmā ca yajamānaśca
- 17
अथ गार्हपत्य आज्यं विलाप्योत्पूय स्रुचि चतुर्गृहीतं गृहीत्वा सप्तहोतारं मनसानुद्रुत्याहवनीये जुहोत्य् अन्वारब्धे यजमाने स्वाहेति
atha gārhapatya ājyaṃ vilāpyotpūya sruci caturgṛhītaṃ gṛhītvā saptahotāraṃ manasānudrutyāhavanīye juhoty anvārabdhe yajamāne svāheti
- 18
अपरं चतुर्गृहीतं गृहीत्वा यूपाहुतिं जुहोति यद्य् अत्र जुहोति
aparaṃ caturgṛhītaṃ gṛhītvā yūpāhutiṃ juhoti yady atra juhoti
- 19
पूर्वाह्ण एवैतौ व्रतदुघयोर्वत्सौ बध्नन्ति
pūrvāhṇa evaitau vratadughayorvatsau badhnanti
- 20
अथाभ्यां व्रतोपायनीयं पाचयति
athābhyāṃ vratopāyanīyaṃ pācayati
- 21
तस्याशितौ भवतः सर्पिर्मिश्रस्य पयोमिश्रस्य
tasyāśitau bhavataḥ sarpirmiśrasya payomiśrasya
- 22
अथाध्वर्युस्तीर्थ्यान्संभारान्याचति
athādhvaryustīrthyānsaṃbhārānyācati
- 23
अथाह एहि यजमानेति
athāha ehi yajamāneti
- 24
पूर्वया द्वारोपनिष्क्रम्य यत्रापस्तद्यन्ति
pūrvayā dvāropaniṣkramya yatrāpastadyanti
- 25
अथास्य प्राङ्मुखस्य दक्षिणं गोदानम् अद्भिर् उनत्ति
athāsya prāṅmukhasya dakṣiṇaṃ godānam adbhir unatti

