22 shlokas
- 1
अथात्रैव तिष्ठन्संप्रैषम् आह स्तृणीत बर्हिः प्र व्रतं यच्छत सम् अपिव्रतान्ह्वयध्वम् आस्तावं बहुलं स्तृणीत सदोहविर्धाने बहुले स्तृणीतोन्नेतर्ग्राव्णो वायव्यानि द्रोणकलशे दशापवित्रे समवधाय पत्नीशाले संसादयाग्नीद् आज्यम् अधिश्रय प्रतिप्रस्थातः स्रुचः संमृड्ढ्य् आज्येनोदेहि पृषदाज्याय दध्य् आहरेति
athātraiva tiṣṭhansaṃpraiṣam āha stṛṇīta barhiḥ pra vrataṃ yacchata sam apivratānhvayadhvam āstāvaṃ bahulaṃ stṛṇīta sadohavirdhāne bahule stṛṇītonnetargrāvṇo vāyavyāni droṇakalaśe daśāpavitre samavadhāya patnīśāle saṃsādayāgnīd ājyam adhiśraya pratiprasthātaḥ srucaḥ saṃmṛḍḍhy ājyenodehi pṛṣadājyāya dadhy āhareti
- 2
यथासंप्रैषं ते कुर्वन्ति
yathāsaṃpraiṣaṃ te kurvanti
- 3
अथ दक्षिणे वेद्यन्ते बर्हिर्मुष्टिं स्तृणाति देवबर्हिर् ऊर्णाम्रदसं त्वा स्तृणामि स्वासस्थं देवेभ्य इति
atha dakṣiṇe vedyante barhirmuṣṭiṃ stṛṇāti devabarhir ūrṇāmradasaṃ tvā stṛṇāmi svāsasthaṃ devebhya iti
- 4
तां बहुलां पुरस्तात्प्रत्यञ्च स्तृणन्तो यन्ति
tāṃ bahulāṃ purastātpratyañca stṛṇanto yanti
- 5
अथान्तःशालं पृषदाज्यवन्त्य् आज्यानि गृहीत्वा परिकर्मिभ्य उत्प्रदाय ब्रह्मणे राजानम् उत्प्रयच्छति
athāntaḥśālaṃ pṛṣadājyavanty ājyāni gṛhītvā parikarmibhya utpradāya brahmaṇe rājānam utprayacchati
- 6
तं ब्रह्मादायोत्तरतस्तिष्ठति
taṃ brahmādāyottaratastiṣṭhati
- 7
उत्तरतस्तिष्ठन्न् अग्निम् अन्वानयत्य् उद् अग्ने तिष्ठानु माम् उदेहि विश्वैर्देवैर्यज्ञियैः संविदानः
सुवर्गे लोके यजमानं हि धेहि मास्यै हास्था आहुत्यै याम् उपेम इति
uttaratastiṣṭhann agnim anvānayaty ud agne tiṣṭhānu mām udehi viśvairdevairyajñiyaiḥ saṃvidānaḥ
suvarge loke yajamānaṃ hi dhehi māsyai hāsthā āhutyai yām upema iti
- 8
अथाभ्यादधातीध्मं प्रणयनीयम्
athābhyādadhātīdhmaṃ praṇayanīyam
- 9
उपोपयमनीः कल्पयन्ति चात्वालात्
upopayamanīḥ kalpayanti cātvālāt
- 10
समन्वारब्धेष्व् अपिव्रतेषु संप्रच्छन्नेषु गार्हपत्य आज्यं विलाप्योत्पूय स्रुचि चतुर्गृहीतं गृहीत्वा शालामुखीये वैसर्जनानि जुहोति त्वं सोम तनूकृद्भ्यो द्वेषोभ्यो ऽन्यकृतेभ्य उरु यन्तासि वरूथं स्वाहेति
samanvārabdheṣv apivrateṣu saṃpracchanneṣu gārhapatya ājyaṃ vilāpyotpūya sruci caturgṛhītaṃ gṛhītvā śālāmukhīye vaisarjanāni juhoti tvaṃ soma tanūkṛdbhyo dveṣobhyo 'nyakṛtebhya uru yantāsi varūthaṃ svāheti
- 11
स्रुवेणाप्तुं प्रस्कन्दयति जुषाणो अप्तुर् आज्यस्य वेतु स्वाहेति
sruveṇāptuṃ praskandayati juṣāṇo aptur ājyasya vetu svāheti
- 12
अपरं चतुर्गृहीतं गृहीत्वा संप्रैषम् आहाग्नीषोमाभ्यां प्रणीयमानाभ्याम् अनुब्रूहीति
aparaṃ caturgṛhītaṃ gṛhītvā saṃpraiṣam āhāgnīṣomābhyāṃ praṇīyamānābhyām anubrūhīti
- 13
त्रिर् उक्तायाम् उद्यच्छन्ते
trir uktāyām udyacchante
- 14
होतुर्वशं यन्ति
hoturvaśaṃ yanti
- 15
अथ वै भवति
atha vai bhavati
- 16
प्राञ्चम् अग्निं प्रहरन्त्य् उत्पत्नीम् आनयन्त्य् अन्व् अनांसि प्रवर्तयन्तीति
prāñcam agniṃ praharanty utpatnīm ānayanty anv anāṃsi pravartayantīti
- 17
यद् अस्यात्र शस्त्रं भवति पूर्वं तेनाग्निम् अन्ववस्यन्ति
yad asyātra śastraṃ bhavati pūrvaṃ tenāgnim anvavasyanti
- 18
अथाग्निप्रथमाः प्रतिपद्यन्ते ऽन्वग्राज्ञा चाज्यैश्चान्वग्ग्राव्णो वायव्यानि
athāgniprathamāḥ pratipadyante 'nvagrājñā cājyaiścānvaggrāvṇo vāyavyāni
- 19
पूर्वया द्वारोपनिष्क्रामन्त्य् अयं नो अग्निर्वरिवः कृणोत्व् अयं मृधः पुर एतु प्रभिन्दन्
अयं शत्रूञ्जयतु जर्हृषाणो ऽयं वाजं जयतु वाजसाताव् इति
pūrvayā dvāropaniṣkrāmanty ayaṃ no agnirvarivaḥ kṛṇotv ayaṃ mṛdhaḥ pura etu prabhindan
ayaṃ śatrūñjayatu jarhṛṣāṇo 'yaṃ vājaṃ jayatu vājasātāv iti
- 20
उत्तरेण सदः परीत्याग्नीध्रागारे ऽग्निं निधाय नयवत्यर्चाग्नीध्रे जुहोत्य् अग्ने नय सुपथा राये अस्मान्विश्वानि देव वयुनानि विद्वान्
युयोध्य् अस्मज्जुहुराणम् एनो भूयिष्ठां ते नमौक्तिं विधेम स्वाहेति
uttareṇa sadaḥ parītyāgnīdhrāgāre 'gniṃ nidhāya nayavatyarcāgnīdhre juhoty agne naya supathā rāye asmānviśvāni deva vayunāni vidvān
yuyodhy asmajjuhurāṇam eno bhūyiṣṭhāṃ te namauktiṃ vidhema svāheti
- 21
अत्रैवैतद्ग्रावोवायव्यं समुपसाद्योपातियन्ति राज्ञा चाज्यैश्च
atraivaitadgrāvovāyavyaṃ samupasādyopātiyanti rājñā cājyaiśca
- 22
आहवनीये स्रुवाहुतिं जुहोत्य् उरु विष्णो विक्रमस्वोरु क्षयाय नः कृधि
घृतं घृतयोने पिब प्र प्र यज्ञपतिं तिर स्वाहेति
āhavanīye sruvāhutiṃ juhoty uru viṣṇo vikramasvoru kṣayāya naḥ kṛdhi
ghṛtaṃ ghṛtayone piba pra pra yajñapatiṃ tira svāheti

