29 shlokas
- 1
आप उन्दन्तु जीवसे दीर्घायुत्वाय वर्चस इति
āpa undantu jīvase dīrghāyutvāya varcasa iti
- 2
ऊर्ध्वाग्रं बर्हिर् अनूच्छ्रयत्य् ओषधे त्रायस्वैनम् इति
ūrdhvāgraṃ barhir anūcchrayaty oṣadhe trāyasvainam iti
- 3
स्वधितिं तिर्यञ्चं निदधाति स्वधिते मैनं हिंसीर् इति
svadhitiṃ tiryañcaṃ nidadhāti svadhite mainaṃ hiṃsīr iti
- 4
प्रवपति देवश्रूर् एतानि प्रवप इति
pravapati devaśrūr etāni pravapa iti
- 5
स्वस्त्य् उत्तराण्य् अशीयेत्य् उप्तान्तं प्रत्यभिमृशते
svasty uttarāṇy aśīyety uptāntaṃ pratyabhimṛśate
- 6
एतयैवावृतोत्तरं गोदानम् अद्भिर् उनत्ति यजुषा वा तूष्णीं वा
etayaivāvṛtottaraṃ godānam adbhir unatti yajuṣā vā tūṣṇīṃ vā
- 7
नापिताय क्षुरं प्रयच्छन्न् आह नापितोप्तकेशश्मश्रुं मे निकृत्तनखं प्रब्रूताद् इति
nāpitāya kṣuraṃ prayacchann āha nāpitoptakeśaśmaśruṃ me nikṛttanakhaṃ prabrūtād iti
- 8
तं तथा प्राह
taṃ tathā prāha
- 9
अथैनम् अद्भिर् अभिषिञ्चत्य् आपो अस्मान्मातरः शुन्धन्तु घृतेन नो घृतपुवः पुनन्त्व् इति
athainam adbhir abhiṣiñcaty āpo asmānmātaraḥ śundhantu ghṛtena no ghṛtapuvaḥ punantv iti
- 10
संप्रधाव्य रजः प्रप्लावयति विश्वम् अस्मत्प्रवहन्तु रिप्रम् इति
saṃpradhāvya rajaḥ praplāvayati viśvam asmatpravahantu ripram iti
- 11
उदेति उद् आभ्यः शुचिर् आ पूत एमीति
udeti ud ābhyaḥ śucir ā pūta emīti
- 12
वसनस्यान्तेन प्रतिच्छाद्याप आचामति
vasanasyāntena praticchādyāpa ācāmati
- 13
अपो ऽश्नातीति ब्राह्मणम्
apo 'śnātīti brāhmaṇam
- 14
अथ प्रदक्षिणम् अहतं वासः परिधत्ते सोमस्य तनूर् असि तनुवं मे पाहीति
atha pradakṣiṇam ahataṃ vāsaḥ paridhatte somasya tanūr asi tanuvaṃ me pāhīti
- 15
अथास्यैतन्नवनीतं विचितम् उदशराव उपशेते
athāsyaitannavanītaṃ vicitam udaśarāva upaśete
- 16
तस्य पाणिभ्यां संप्रम्लाय मुखम् एव प्रथमम् अभ्यङ्क्ते महीनां पयो ऽसि वर्चोधा असि वर्चो मयि धेहीति
tasya pāṇibhyāṃ saṃpramlāya mukham eva prathamam abhyaṅkte mahīnāṃ payo 'si varcodhā asi varco mayi dhehīti
- 17
अनुलोमम् आ पादाभ्याम्
anulomam ā pādābhyām
- 18
अन्यो ऽस्य पृष्ठम् अभ्यनक्ति
anyo 'sya pṛṣṭham abhyanakti
- 19
अथास्यैतद् आञ्जनं पिष्टं दृषद्य् उपशेते सतूला च शरेषीका
athāsyaitad āñjanaṃ piṣṭaṃ dṛṣady upaśete satūlā ca śareṣīkā
- 20
तस्य प्राङ्मुखस्य प्रत्यङ्मुख उपविश्य सव्येन पाणिना दक्षिणम् अक्ष्य् अनक्ति वृत्रस्य कनीनिकासि चक्षुष्पा असि चक्षुर्मे पाहीति त्रिर् अनिधावम्
tasya prāṅmukhasya pratyaṅmukha upaviśya savyena pāṇinā dakṣiṇam akṣy anakti vṛtrasya kanīnikāsi cakṣuṣpā asi cakṣurme pāhīti trir anidhāvam
- 21
द्विर् उत्तरम्
dvir uttaram
- 22
अप्य् उ पञ्च कृत्व आङ्क्ते इति ब्राह्मणम्
apy u pañca kṛtva āṅkte iti brāhmaṇam
- 23
पञ्च कृत्व एव दक्षिणं पञ्च कृत्व उत्तरम्
pañca kṛtva eva dakṣiṇaṃ pañca kṛtva uttaram
- 24
अथैनम् एकविंशत्या दर्भपुञ्जीलैः पवयति चित्पतिस्त्वा पुनातु वाक्पतिस्त्वा पुनातु देवस्त्वा सविता पुनात्व् अच्छिद्रेण पवित्रेण वसोः सूर्यस्य रश्मिभिर् इति
athainam ekaviṃśatyā darbhapuñjīlaiḥ pavayati citpatistvā punātu vākpatistvā punātu devastvā savitā punātv acchidreṇa pavitreṇa vasoḥ sūryasya raśmibhir iti
- 25
यजमानम् अतिवाचयति तस्य ते पवित्रपते पवित्रेण यस्मै कं पुने तच्छकेयम् इति
yajamānam ativācayati tasya te pavitrapate pavitreṇa yasmai kaṃ pune tacchakeyam iti
- 26
अथैनं सव्ये पाणाव् अभिपात्य शालाम् आनयति आ वो देवास ईमहे सत्यधर्माणो अध्वरे यद्वो देवास आगुरे यज्ञियासो हवामह इति
athainaṃ savye pāṇāv abhipātya śālām ānayati ā vo devāsa īmahe satyadharmāṇo adhvare yadvo devāsa āgure yajñiyāso havāmaha iti
- 27
पूर्वया द्वारा शालां प्रपादयतीन्द्राग्नी द्यावापृथिवी आप ओषधीर् इति
pūrvayā dvārā śālāṃ prapādayatīndrāgnī dyāvāpṛthivī āpa oṣadhīr iti
- 28
अथैनम् अग्रेणाहवनीयं पर्याणीय दक्षिणत उदङ्मुखम् उपवेश्याहवनीयम् ईक्षयति त्वं दीक्षाणाम् अधिपतिर् असीति
athainam agreṇāhavanīyaṃ paryāṇīya dakṣiṇata udaṅmukham upaveśyāhavanīyam īkṣayati tvaṃ dīkṣāṇām adhipatir asīti
- 29
इह मा सन्तं पाहीत्य् आत्मानम्
iha mā santaṃ pāhīty ātmānam

