14 shlokas
- 1
गान्धार्युवाच
एष वैकर्तनः शेते महेष्वासो महारथः
ज्वलितानलवत्संख्ये संशान्तः पार्थतेजसा
gāndhāryuvāca
eṣa vaikartanaḥ śete maheṣvāso mahārathaḥ
jvalitānalavatsaṃkhye saṃśāntaḥ pārthatejasā
- 2
पश्य वैकर्तनं कर्णं निहत्यातिरथान्बहून्
शोणितौघपरीताङ्गं शयानं पतितं भुवि
paśya vaikartanaṃ karṇaṃ nihatyātirathānbahūn
śoṇitaughaparītāṅgaṃ śayānaṃ patitaṃ bhuvi
- 3
अमर्षी दीर्घरोषश्च महेष्वासो महारथः
रणे विनिहतः शेते शूरो गाण्डीवधन्वना
amarṣī dīrgharoṣaśca maheṣvāso mahārathaḥ
raṇe vinihataḥ śete śūro gāṇḍīvadhanvanā
- 4
यं स्म पाण्डवसंत्रासान्मम पुत्रा महारथाः
प्रायुध्यन्त पुरस्कृत्य मातङ्गा इव यूथपम्
yaṃ sma pāṇḍavasaṃtrāsānmama putrā mahārathāḥ
prāyudhyanta puraskṛtya mātaṅgā iva yūthapam
- 5
शार्दूलम् इव सिंहेन समरे सव्यसाचिना
मातङ्गम् इव मत्तेन मातङ्गेन निपातितम्
śārdūlam iva siṃhena samare savyasācinā
mātaṅgam iva mattena mātaṅgena nipātitam
- 6
समेताः पुरुषव्याघ्र निहतं शूरम् आहवे
प्रकीर्णमूर्धजाः पत्न्यो रुदत्यः पर्युपासते
sametāḥ puruṣavyāghra nihataṃ śūram āhave
prakīrṇamūrdhajāḥ patnyo rudatyaḥ paryupāsate
- 7
उद्विग्नः सततं यस्माद्धर्मराजो युधिष्ठिरः
त्रयोदश समा निद्रां चिन्तयन्नाध्यगच्छत
udvignaḥ satataṃ yasmāddharmarājo yudhiṣṭhiraḥ
trayodaśa samā nidrāṃ cintayannādhyagacchata
- 8
अनाधृष्यः परैर्युद्धे शत्रुभिर्मघवान् इव
युगान्ताग्निर् इवार्चिष्मान्हिमवान् इव च स्थिरः
anādhṛṣyaḥ parairyuddhe śatrubhirmaghavān iva
yugāntāgnir ivārciṣmānhimavān iva ca sthiraḥ
- 9
स भूत्वा शरणं वीरो धार्तराष्ट्रस्य माधव
भूमौ विनिहतः शेते वातरुग्ण इव द्रुमः
sa bhūtvā śaraṇaṃ vīro dhārtarāṣṭrasya mādhava
bhūmau vinihataḥ śete vātarugṇa iva drumaḥ
- 10
पश्य कर्णस्य पत्नीं त्वं वृषसेनस्य मातरम्
लालप्यमानाः करुणं रुदतीं पतितां भुवि
paśya karṇasya patnīṃ tvaṃ vṛṣasenasya mātaram
lālapyamānāḥ karuṇaṃ rudatīṃ patitāṃ bhuvi
- 11
आचार्यशापो ऽनुगतो ध्रुवं त्वां यद् अग्रसच्चक्रम् इयं धरा ते
ततः शरेणापहृतं शिरस्ते धनंजयेनाहवे शत्रुमध्ये
ācāryaśāpo 'nugato dhruvaṃ tvāṃ yad agrasaccakram iyaṃ dharā te
tataḥ śareṇāpahṛtaṃ śiraste dhanaṃjayenāhave śatrumadhye
- 12
अहो धिग् एषा पतिता विसंज्ञा समीक्ष्य जाम्बूनदबद्धनिष्कम्
कर्णं महाबाहुम् अदीनसत्त्वं सुषेणमाता रुदती भृशार्ता
aho dhig eṣā patitā visaṃjñā samīkṣya jāmbūnadabaddhaniṣkam
karṇaṃ mahābāhum adīnasattvaṃ suṣeṇamātā rudatī bhṛśārtā
- 13
अल्पावशेषो हि कृतो महात्मा शरीरभक्षैः परिभक्षयद्भिः
द्रष्टुं न संप्रीतिकरः शशीव कृष्णस्य पक्षस्य चतुर्दशाहे
alpāvaśeṣo hi kṛto mahātmā śarīrabhakṣaiḥ paribhakṣayadbhiḥ
draṣṭuṃ na saṃprītikaraḥ śaśīva kṛṣṇasya pakṣasya caturdaśāhe
- 14
सावर्तमाना पतिता पृथिव्याम् उत्थाय दीना पुनर् एव चैषा
कर्णस्य वक्त्रं परिजिघ्रमाणा रोरूयते पुत्रवधाभितप्ता
sāvartamānā patitā pṛthivyām utthāya dīnā punar eva caiṣā
karṇasya vaktraṃ parijighramāṇā rorūyate putravadhābhitaptā

