53 shlokas
- 1
मैत्रेय उवाच
अथ देवगणाः सर्वे रुद्रानीकैः पराजिताः
शूलपट्टिशनिस्त्रिंशगदापरिघमुद्गरैः
maitreya uvāca
atha devagaṇāḥ sarve rudrānīkaiḥ parājitāḥ
śūlapaṭṭiśanistriṃśagadāparighamudgaraiḥ
- 2
संछिन्नभिन्नसर्वाङ्गाः सर्त्विक्सभ्या भयाकुलाः
स्वयम्भुवे नमस्कृत्य कार्त्स्न्येनैतन्न्यवेदयन्
saṃchinnabhinnasarvāṅgāḥ sartviksabhyā bhayākulāḥ
svayambhuve namaskṛtya kārtsnyenaitannyavedayan
- 3
उपलभ्य पुरैवैतद्भगवान् अब्जसंभवः
नारायणश्च विश्वात्मा न कस्याध्वरम् ईयतुः
upalabhya puraivaitadbhagavān abjasaṃbhavaḥ
nārāyaṇaśca viśvātmā na kasyādhvaram īyatuḥ
- 4
तद् आकर्ण्य विभुः प्राह तेजीयसि कृतागसि
क्षेमाय तत्र सा भूयान्न प्रायेण बुभूषताम्
tad ākarṇya vibhuḥ prāha tejīyasi kṛtāgasi
kṣemāya tatra sā bhūyānna prāyeṇa bubhūṣatām
- 5
अथापि यूयं कृतकिल्बिषा भवं ये बर्हिषो भागभाजं परादुः
प्रसादयध्वं परिशुद्धचेतसा क्षिप्रप्रसादं प्रगृहीताङ्घ्रिपद्मम्
athāpi yūyaṃ kṛtakilbiṣā bhavaṃ ye barhiṣo bhāgabhājaṃ parāduḥ
prasādayadhvaṃ pariśuddhacetasā kṣipraprasādaṃ pragṛhītāṅghripadmam
- 6
आशासाना जीवितम् अध्वरस्य लोकः सपालः कुपिते न यस्मिन्
तम् आशु देवं प्रियया विहीनं क्षमापयध्वं हृदि विद्धं दुरुक्तैः
āśāsānā jīvitam adhvarasya lokaḥ sapālaḥ kupite na yasmin
tam āśu devaṃ priyayā vihīnaṃ kṣamāpayadhvaṃ hṛdi viddhaṃ duruktaiḥ
- 7
नाहं न यज्ञो न च यूयम् अन्ये ये देहभाजो मुनयश्च तत्त्वम्
विदुः प्रमाणं बलवीर्ययोर्वा यस्यात्मतन्त्रस्य क उपायं विधित्सेत्
nāhaṃ na yajño na ca yūyam anye ye dehabhājo munayaśca tattvam
viduḥ pramāṇaṃ balavīryayorvā yasyātmatantrasya ka upāyaṃ vidhitset
- 8
स इत्थम् आदिश्य सुरान् अजस्तु तैः समन्वितः पितृभिः सप्रजेशैः
ययौ स्वधिष्ण्यान्निलयं पुरद्विषः कैलासम् अद्रिप्रवरं प्रियं प्रभोः
sa ittham ādiśya surān ajastu taiḥ samanvitaḥ pitṛbhiḥ saprajeśaiḥ
yayau svadhiṣṇyānnilayaṃ puradviṣaḥ kailāsam adripravaraṃ priyaṃ prabhoḥ
- 9
जन्मौषधितपोमन्त्रयोगसिद्धैर्नरेतरैः
जुष्टं किन्नरगन्धर्वैर् अप्सरोभिर्वृतं सदा
janmauṣadhitapomantrayogasiddhairnaretaraiḥ
juṣṭaṃ kinnaragandharvair apsarobhirvṛtaṃ sadā
- 10
नानामणिमयैः शृङ्गैर्नानाधातुविचित्रितैः
नानाद्रुमलतागुल्मैर्नानामृगगणावृतैः
nānāmaṇimayaiḥ śṛṅgairnānādhātuvicitritaiḥ
nānādrumalatāgulmairnānāmṛgagaṇāvṛtaiḥ
- 11
नानामलप्रस्रवणैर्नानाकन्दरसानुभिः
रमणं विहरन्तीनां रमणैः सिद्धयोषिताम्
nānāmalaprasravaṇairnānākandarasānubhiḥ
ramaṇaṃ viharantīnāṃ ramaṇaiḥ siddhayoṣitām
- 12
मयूरकेकाभिरुतं मदान्धालिविमूर्छितम्
प्लावितै रक्तकण्ठानां कूजितैश्च पतत्रिणाम्
mayūrakekābhirutaṃ madāndhālivimūrchitam
plāvitai raktakaṇṭhānāṃ kūjitaiśca patatriṇām
- 13
आह्वयन्तम् इवोद्धस्तैर्द्विजान्कामदुघैर्द्रुमैः
व्रजन्तम् इव मातङ्गैर्गृणन्तम् इव निर्झरैः
āhvayantam ivoddhastairdvijānkāmadughairdrumaiḥ
vrajantam iva mātaṅgairgṛṇantam iva nirjharaiḥ
- 14
मन्दारैः पारिजातैश्च सरलैश्चोपशोभितम्
तमालैः शालतालैश्च कोविदारासनार्जुनैः
mandāraiḥ pārijātaiśca saralaiścopaśobhitam
tamālaiḥ śālatālaiśca kovidārāsanārjunaiḥ
- 15
चूतैः कदम्बैर्नीपैश्च नागपुन्नागचम्पकैः
पाटलाशोकबकुलैः कुन्दैः कुरबकैर् अपि
cūtaiḥ kadambairnīpaiśca nāgapunnāgacampakaiḥ
pāṭalāśokabakulaiḥ kundaiḥ kurabakair api
- 16
स्वर्णार्णशतपत्रैश्च वररेणुकजातिभिः
कुब्जकैर्मल्लिकाभिश्च माधवीभिश्च मण्डितम्
svarṇārṇaśatapatraiśca varareṇukajātibhiḥ
kubjakairmallikābhiśca mādhavībhiśca maṇḍitam
- 17
पनसोदुम्बराश्वत्थप्लक्षन्यग्रोधहिङ्गुभिः
भूर्जैर् ओषधिभिः पूगै राजपूगैश्च जम्बुभिः
panasodumbarāśvatthaplakṣanyagrodhahiṅgubhiḥ
bhūrjair oṣadhibhiḥ pūgai rājapūgaiśca jambubhiḥ
- 18
खर्जूराम्रातकाम्राद्यैः प्रियालमधुकेङ्गुदैः
द्रुमजातिभिर् अन्यैश्च राजितं वेणुकीचकैः
kharjūrāmrātakāmrādyaiḥ priyālamadhukeṅgudaiḥ
drumajātibhir anyaiśca rājitaṃ veṇukīcakaiḥ
- 19
कुमुदोत्पलकह्लारशतपत्रवनर्द्धिभिः
नलिनीषु कलं कूजत्खगवृन्दोपशोभितम्
kumudotpalakahlāraśatapatravanarddhibhiḥ
nalinīṣu kalaṃ kūjatkhagavṛndopaśobhitam
- 20
मृगैः शाखामृगैः क्रोडैर्मृगेन्द्रैर् ऋक्षशल्यकैः
गवयैः शरभैर्व्याघ्रै रुरुभिर्महिषादिभिः
mṛgaiḥ śākhāmṛgaiḥ kroḍairmṛgendrair ṛkṣaśalyakaiḥ
gavayaiḥ śarabhairvyāghrai rurubhirmahiṣādibhiḥ
- 21
कर्णान्त्रैकपदाश्वास्यैर्निर्जुष्टं वृकनाभिभिः
कदलीखण्डसंरुद्धनलिनीपुलिनश्रियम्
karṇāntraikapadāśvāsyairnirjuṣṭaṃ vṛkanābhibhiḥ
kadalīkhaṇḍasaṃruddhanalinīpulinaśriyam
- 22
पर्यस्तं नन्दया सत्याः स्नानपुण्यतरोदया
विलोक्य भूतेशगिरिं विबुधा विस्मयं ययुः
paryastaṃ nandayā satyāḥ snānapuṇyatarodayā
vilokya bhūteśagiriṃ vibudhā vismayaṃ yayuḥ
- 23
ददृशुस्तत्र ते रम्याम् अलकां नाम वै पुरीम्
वनं सौगन्धिकं चापि यत्र तन्नाम पङ्कजम्
dadṛśustatra te ramyām alakāṃ nāma vai purīm
vanaṃ saugandhikaṃ cāpi yatra tannāma paṅkajam
- 24
नन्दा चालकनन्दा च सरितौ बाह्यतः पुरः
तीर्थपादपदाम्भोजरजसातीव पावने
nandā cālakanandā ca saritau bāhyataḥ puraḥ
tīrthapādapadāmbhojarajasātīva pāvane
- 25
ययोः सुरस्त्रियः क्षत्तर् अवरुह्य स्वधिष्ण्यतः
क्रीडन्ति पुंसः सिञ्चन्त्यो विगाह्य रतिकर्शिताः
yayoḥ surastriyaḥ kṣattar avaruhya svadhiṣṇyataḥ
krīḍanti puṃsaḥ siñcantyo vigāhya ratikarśitāḥ
- 26
ययोस्तत्स्नानविभ्रष्टनवकुङ्कुमपिञ्जरम्
वितृषो ऽपि पिबन्त्य् अम्भः पाययन्तो गजा गजीः
yayostatsnānavibhraṣṭanavakuṅkumapiñjaram
vitṛṣo 'pi pibanty ambhaḥ pāyayanto gajā gajīḥ
- 27
तारहेममहारत्नविमानशतसंकुलाम्
जुष्टां पुण्यजनस्त्रीभिर्यथा खं सतडिद्घनम्
tārahemamahāratnavimānaśatasaṃkulām
juṣṭāṃ puṇyajanastrībhiryathā khaṃ sataḍidghanam
- 28
हित्वा यक्षेश्वरपुरीं वनं सौगन्धिकं च तत्
द्रुमैः कामदुघैर्हृद्यं चित्रमाल्यफलच्छदैः
hitvā yakṣeśvarapurīṃ vanaṃ saugandhikaṃ ca tat
drumaiḥ kāmadughairhṛdyaṃ citramālyaphalacchadaiḥ
- 29
रक्तकण्ठखगानीकस्वरमण्डितषट्पदम्
कलहंसकुलप्रेष्ठं खरदण्डजलाशयम्
raktakaṇṭhakhagānīkasvaramaṇḍitaṣaṭpadam
kalahaṃsakulapreṣṭhaṃ kharadaṇḍajalāśayam
- 30
वनकुञ्जरसंघृष्टहरिचन्दनवायुना
अधि पुण्यजनस्त्रीणां मुहुर् उन्मथयन्मनः
vanakuñjarasaṃghṛṣṭaharicandanavāyunā
adhi puṇyajanastrīṇāṃ muhur unmathayanmanaḥ

