8 shlokas
- 1
स वा एषो ऽग्निर् एव यद् अग्निष्टोमस्तं यद् अस्तुवंस्तस्माद् अग्निस्तोमस्तम् अग्निस्तोमं सन्तम् अग्निष्टोम इत्य् आचक्षते परोक्षेण परोक्षप्रिया इव हि देवाः
sa vā eṣo 'gnir eva yad agniṣṭomastaṃ yad astuvaṃstasmād agnistomastam agnistomaṃ santam agniṣṭoma ity ācakṣate parokṣeṇa parokṣapriyā iva hi devāḥ
- 2
तं यच्चतुष्टया देवाश्चतुर्भिः स्तोमैर् अस्तुवंस्तस्माच्चतुस्तोमस्तं चतुस्तोमं सन्तं चतुष्टोम इत्य् आचक्षते परोक्षेण परोक्षप्रिया इव हि देवाः
taṃ yaccatuṣṭayā devāścaturbhiḥ stomair astuvaṃstasmāccatustomastaṃ catustomaṃ santaṃ catuṣṭoma ity ācakṣate parokṣeṇa parokṣapriyā iva hi devāḥ
- 3
अथ यद् एनम् ऊर्ध्वं सन्तं ज्योतिर्भूतम् अस्तुवंस्तस्माज्ज्योतिस्तोमस्तं ज्योतिस्तोमं सन्तं ज्योतिष्टोम इत्य् आचक्षते परोक्षेण परोक्षप्रिया इव हि देवाः
atha yad enam ūrdhvaṃ santaṃ jyotirbhūtam astuvaṃstasmājjyotistomastaṃ jyotistomaṃ santaṃ jyotiṣṭoma ity ācakṣate parokṣeṇa parokṣapriyā iva hi devāḥ
- 4
स वा एषो ऽपूर्वो ऽनपरो यज्ञक्रतुर्यथा रथचक्रम् अनन्तम् एवं यद् अग्निष्टोमस्तस्य यथैव प्रायणं तथोदयनम्
sa vā eṣo 'pūrvo 'naparo yajñakraturyathā rathacakram anantam evaṃ yad agniṣṭomastasya yathaiva prāyaṇaṃ tathodayanam
- 5
तद् एषाभि यज्ञगाथा गीयते यद् अस्य पूर्वम् अपरं तद् अस्य यद्व् अस्यापरं तद्व् अस्य पूर्वम् अहेर् इव सर्पणं शाकलस्य न विजानन्ति यतरत्परस्ताद् इति
tad eṣābhi yajñagāthā gīyate yad asya pūrvam aparaṃ tad asya yadv asyāparaṃ tadv asya pūrvam aher iva sarpaṇaṃ śākalasya na vijānanti yataratparastād iti
- 6
यथा ह्य् एवास्य प्रायणम् एवम् उदयनम् असद् इति
yathā hy evāsya prāyaṇam evam udayanam asad iti
- 7
तद् आहुर्यत्त्रिवृत्प्रायणम् एकविंशम् उदयनं केन ते समे इति
tad āhuryattrivṛtprāyaṇam ekaviṃśam udayanaṃ kena te same iti
- 8
यो वा एकविंशस्त्रिवृद्वै सो ऽथो यद् उभौ तृचौ तृचिनाव् इति ब्रूयात्तेनेति
yo vā ekaviṃśastrivṛdvai so 'tho yad ubhau tṛcau tṛcināv iti brūyātteneti

