17 shlokas
- 1
मरुत्वतीयम्प्रगाथं शंसति पशवो वै मरुतः पशवः प्रगाथः पशूनाम् अवरुद्ध्यै
marutvatīyampragāthaṃ śaṃsati paśavo vai marutaḥ paśavaḥ pragāthaḥ paśūnām avaruddhyai
- 2
जनिष्ठा उग्रः सहसे तुरायेति सूक्तम्शंसति तद्वा एतद्यजमानजननम् एव सूक्तं यजमानं ह वा एतेन यज्ञाद्देवयोन्यै प्रजनयति
janiṣṭhā ugraḥ sahase turāyeti sūktamśaṃsati tadvā etadyajamānajananam eva sūktaṃ yajamānaṃ ha vā etena yajñāddevayonyai prajanayati
- 3
तत्संजयम्भवति सं च जयति वि च जयते
tatsaṃjayambhavati saṃ ca jayati vi ca jayate
- 4
एतद्गौरिवीतं गौरिवीतिर्ह वै शाक्त्यो नेदिष्ठं स्वर्गस्य लोकस्यागच्छत्स एतत्सूक्तम् अपश्यत्तेन स्वर्गं लोकम् अजयत्तथैवैतद्यजमान एतेन सूक्तेन स्वर्गं लोकं जयति
etadgaurivītaṃ gaurivītirha vai śāktyo nediṣṭhaṃ svargasya lokasyāgacchatsa etatsūktam apaśyattena svargaṃ lokam ajayattathaivaitadyajamāna etena sūktena svargaṃ lokaṃ jayati
- 5
तस्यार्धाः शस्त्वार्धाः परिशिष्य मध्ये निविदं दधाति
tasyārdhāḥ śastvārdhāḥ pariśiṣya madhye nividaṃ dadhāti
- 6
स्वर्गस्य हैष लोकस्य रोहो यन्निवित्
svargasya haiṣa lokasya roho yannivit
- 7
स्वर्गस्य हैतल्लोकस्याक्रमणं यन्निवित्ताम् आक्रममाण इव शंसेद् उपैव यजमानं निगृह्णीत यो ऽस्य प्रियः स्याद् इति नु स्वर्गकामस्य
svargasya haitallokasyākramaṇaṃ yannivittām ākramamāṇa iva śaṃsed upaiva yajamānaṃ nigṛhṇīta yo 'sya priyaḥ syād iti nu svargakāmasya
- 8
अथाभिचरतो यः कामयेत क्षत्रेण विशं हन्याम् इति त्रिस्तर्हि निविदा सूक्तं विशंसेत्क्षत्रं वै निविद्विट्सूक्तं क्षत्रेणैव तद्विशं हन्ति
athābhicarato yaḥ kāmayeta kṣatreṇa viśaṃ hanyām iti tristarhi nividā sūktaṃ viśaṃsetkṣatraṃ vai nividviṭsūktaṃ kṣatreṇaiva tadviśaṃ hanti
- 9
यः कामयेत विशा क्षत्रं हन्याम् इति त्रिस्तर्हि सूक्तेन निविदं विशंसेत्क्षत्रं वै निविद्विट्सूक्तं विशैव तत्क्षत्रं हन्ति
yaḥ kāmayeta viśā kṣatraṃ hanyām iti tristarhi sūktena nividaṃ viśaṃsetkṣatraṃ vai nividviṭsūktaṃ viśaiva tatkṣatraṃ hanti
- 10
य उ कामयेतोभयत एनं विशः पर्यवच्छिनदानीत्य् उभयतस्तर्हि निविदं व्याह्वयीतोभयत एवैनं तद्विशः पर्यवच्छिनत्ति
ya u kāmayetobhayata enaṃ viśaḥ paryavacchinadānīty ubhayatastarhi nividaṃ vyāhvayītobhayata evainaṃ tadviśaḥ paryavacchinatti
- 11
इति न्व् अभिचरत इतरथा त्व् एव स्वर्गकामस्य
iti nv abhicarata itarathā tv eva svargakāmasya
- 12
वयः सुपर्णा उप सेदुर् इन्द्रम् इत्य् उत्तमया परिदधाति
vayaḥ suparṇā upa sedur indram ity uttamayā paridadhāti
- 13
प्रियमेधा ऋषयो नाधमानाः
priyamedhā ṛṣayo nādhamānāḥ
- 14
अप ध्वान्तम् ऊर्णुहीति येन तमसा प्रावृतो मन्येत तन्मनसा गच्छेद् अप हैवास्मात्तल्लुप्यते
apa dhvāntam ūrṇuhīti yena tamasā prāvṛto manyeta tanmanasā gacched apa haivāsmāttallupyate
- 15
पूर्धि चक्षुर् इति चक्षुषी मरीमृज्येत
pūrdhi cakṣur iti cakṣuṣī marīmṛjyeta
- 16
आजरसं ह चक्षुष्मान्भवति य एवं वेद
ājarasaṃ ha cakṣuṣmānbhavati ya evaṃ veda
- 17
मुमुग्ध्य् अस्मान्निधयेव बद्धान् इति पाशा वै निधा मुमुग्ध्य् अस्मान्पाशाद् इव बद्धान् इत्य् एव तद् आह
mumugdhy asmānnidhayeva baddhān iti pāśā vai nidhā mumugdhy asmānpāśād iva baddhān ity eva tad āha

