19 shlokas
- 1
देवानाम्पत्नीः शंसत्य् अनूचीर् अग्निं गृहपतिं तस्माद् अनूची पत्नी गार्हपत्यम् आस्ते
devānāmpatnīḥ śaṃsaty anūcīr agniṃ gṛhapatiṃ tasmād anūcī patnī gārhapatyam āste
- 2
तद् आहू राकाम्पूर्वां शंसेज्जाम्यै वै पूर्वपेयम् इति
tad āhū rākāmpūrvāṃ śaṃsejjāmyai vai pūrvapeyam iti
- 3
तत्तन्नादृत्यं देवानाम् एव पत्नीः पूर्वाः शंसेद् एष ह वा एतत्पत्नीषु रेतो दधाति यद् अग्निर्गार्हपत्यो ऽग्निनैवासु तद्गार्हपत्येन पत्नीषु प्रत्यक्षाद्रेतो दधाति प्रजात्यै
tattannādṛtyaṃ devānām eva patnīḥ pūrvāḥ śaṃsed eṣa ha vā etatpatnīṣu reto dadhāti yad agnirgārhapatyo 'gninaivāsu tadgārhapatyena patnīṣu pratyakṣādreto dadhāti prajātyai
- 4
प्रजायते प्रजया पशुभिर्य एवं वेद
prajāyate prajayā paśubhirya evaṃ veda
- 5
तस्मात्समानोदर्या स्वसान्योदर्यायै जायाया अनुजीविनी जीवति
tasmātsamānodaryā svasānyodaryāyai jāyāyā anujīvinī jīvati
- 6
राकां शंसति राका ह वा एताम्पुरुषस्य सेवनीं सीव्यति यैषा शिश्ने ऽधि
rākāṃ śaṃsati rākā ha vā etāmpuruṣasya sevanīṃ sīvyati yaiṣā śiśne 'dhi
- 7
पुमांसो ऽस्य पुत्रा जायन्ते य एवं वेद
pumāṃso 'sya putrā jāyante ya evaṃ veda
- 8
पावीरवीं शंसति वाग्वै सरस्वती पावीरवी वाच्य् एव तद्वाचं दधाति
pāvīravīṃ śaṃsati vāgvai sarasvatī pāvīravī vācy eva tadvācaṃ dadhāti
- 9
तद् आहुर्यामीम्पूर्वां शंसेत्पित्र्याम् इति
tad āhuryāmīmpūrvāṃ śaṃsetpitryām iti
- 10
यामीम् एव पूर्वां शंसेद् इमं यम प्रस्तरम् आ हि सीदेति राज्ञो वै पूर्वपेयं तस्माद्यामीम् एव पूर्वां शंसेत्
yāmīm eva pūrvāṃ śaṃsed imaṃ yama prastaram ā hi sīdeti rājño vai pūrvapeyaṃ tasmādyāmīm eva pūrvāṃ śaṃset
- 11
मातली कव्यैर्यमो अङ्गिरोभिर् इति काव्यानाम् अनूचीं शंसत्य् अवरेणैव वै देवान्काव्याः परेणैव पितॄंस्तस्मात्काव्यानाम् अनूचीं शंसति
mātalī kavyairyamo aṅgirobhir iti kāvyānām anūcīṃ śaṃsaty avareṇaiva vai devānkāvyāḥ pareṇaiva pitṝṃstasmātkāvyānām anūcīṃ śaṃsati
- 12
उद् ईरताम् अवर उत्परास इति पित्र्याः शंसति
ud īratām avara utparāsa iti pitryāḥ śaṃsati
- 13
उन्मध्यमाः पितरः सोम्यास इति
unmadhyamāḥ pitaraḥ somyāsa iti
- 14
ये चैवावमा ये च परमा ये च मध्यमास्तान्सर्वान् अनन्तरायम्पृणाति
ye caivāvamā ye ca paramā ye ca madhyamāstānsarvān anantarāyampṛṇāti
- 15
आहम्पितॄन्सुविदत्राꣳ अवित्सीति द्वितीयां शंसति
āhampitṝnsuvidatrām̐ avitsīti dvitīyāṃ śaṃsati
- 16
बर्हिषदो ये स्वधया सुतस्येत्य् एतद्ध वा एषाम्प्रियं धाम यद्बर्हिषद इति प्रियेणैवैनांस्तद्धाम्ना समर्धयति
barhiṣado ye svadhayā sutasyety etaddha vā eṣāmpriyaṃ dhāma yadbarhiṣada iti priyeṇaivaināṃstaddhāmnā samardhayati
- 17
प्रियेण धाम्ना समृध्यते य एवं वेद
priyeṇa dhāmnā samṛdhyate ya evaṃ veda
- 18
इदम्पितृभ्यो नमो अस्त्व् अद्येति नमस्कारवतीम् अन्ततः शंसति तस्माद् अन्ततः पितृभ्यो नमस्क्रियते
idampitṛbhyo namo astv adyeti namaskāravatīm antataḥ śaṃsati tasmād antataḥ pitṛbhyo namaskriyate
- 19
तद् आहुर्व्याहावम्पित्र्याः शंसेत् अव्याहावाम् इति व्याहावम् एव शंसेद् असंस्थितं वै पितृयज्ञस्य साध्व् असंस्थितं वा एष पितृयज्ञं संस्थापयति यो ऽव्याहावं शंसति तस्माद्व्याहावम् एव शंस्तव्यम्
tad āhurvyāhāvampitryāḥ śaṃset avyāhāvām iti vyāhāvam eva śaṃsed asaṃsthitaṃ vai pitṛyajñasya sādhv asaṃsthitaṃ vā eṣa pitṛyajñaṃ saṃsthāpayati yo 'vyāhāvaṃ śaṃsati tasmādvyāhāvam eva śaṃstavyam

