22 shlokas
- 1
सौर्या वा एता देवता यन्निविदस्तद्यत्पुरस्ताद् उक्थानाम्प्रातःसवने धीयन्ते मध्यतो मध्यंदिने ऽन्ततस्तृतीयसवन आदित्यस्यैव तद्व्रतम् अनुपर्यावर्तन्ते
sauryā vā etā devatā yannividastadyatpurastād ukthānāmprātaḥsavane dhīyante madhyato madhyaṃdine 'ntatastṛtīyasavana ādityasyaiva tadvratam anuparyāvartante
- 2
पच्छो वै देवा यज्ञं समभरंस्तस्मात्पच्छो निविदः शस्यन्ते
paccho vai devā yajñaṃ samabharaṃstasmātpaccho nividaḥ śasyante
- 3
यद्वै तद्देवा यज्ञं समभरंस्तस्माद् अश्वः समभवत्तस्माद् आहुर् अश्वं निविदां शंस्त्रे दद्याद् इति तद् उ खलु वरम् एव ददति
yadvai taddevā yajñaṃ samabharaṃstasmād aśvaḥ samabhavattasmād āhur aśvaṃ nividāṃ śaṃstre dadyād iti tad u khalu varam eva dadati
- 4
न निविदः पदम् अतीयात्
na nividaḥ padam atīyāt
- 5
यन्निविदः पदम् अतीयाद्यज्ञस्य तच्छिद्रं कुर्याद्यज्ञस्य वै छिद्रं स्रवद्यजमानो ऽनु पापीयान्भवति तस्मान्न निविदः पदम् अतीयात्
yannividaḥ padam atīyādyajñasya tacchidraṃ kuryādyajñasya vai chidraṃ sravadyajamāno 'nu pāpīyānbhavati tasmānna nividaḥ padam atīyāt
- 6
न निविदः पदे विपरिहरेद्यन्निविदः पदे विपरिहरेन्मोहयेद्यज्ञम्मुग्धो यजमानः स्यात्तस्मान्न निविदः पदे विपरिहरेत्
na nividaḥ pade vipariharedyannividaḥ pade vipariharenmohayedyajñammugdho yajamānaḥ syāttasmānna nividaḥ pade vipariharet
- 7
न निविदः पदे समस्येद्यन्निविदः पदे समस्येद्यज्ञस्य तद् आयुः संहरेत्प्रमायुको यजमानः स्यात्तस्मान्न निविदः पदे समस्येत्
na nividaḥ pade samasyedyannividaḥ pade samasyedyajñasya tad āyuḥ saṃharetpramāyuko yajamānaḥ syāttasmānna nividaḥ pade samasyet
- 8
प्रेदम्ब्रह्म प्रेदं क्षत्रम् इत्य् एते एव समस्येद्ब्रह्मक्षत्रयोः संश्रित्यै तस्माद्ब्रह्म च क्षत्रं च संश्रिते
predambrahma predaṃ kṣatram ity ete eva samasyedbrahmakṣatrayoḥ saṃśrityai tasmādbrahma ca kṣatraṃ ca saṃśrite
- 9
न तृचं न चतुरृचम् अति मन्येत निविद्धानम् एकैकं वै निविदः पदम् ऋचं सूक्तम्प्रति तस्मान्न तृचं न चतुरृचम् अति मन्येत निविद्धानं निविदा ह्य् एव स्तोत्रम् अतिशस्तम्भवति
na tṛcaṃ na caturṛcam ati manyeta nividdhānam ekaikaṃ vai nividaḥ padam ṛcaṃ sūktamprati tasmānna tṛcaṃ na caturṛcam ati manyeta nividdhānaṃ nividā hy eva stotram atiśastambhavati
- 10
एकाम्परिशिष्य तृतीयसवने निविदं दध्यात्
ekāmpariśiṣya tṛtīyasavane nividaṃ dadhyāt
- 11
यद्द्वे परिशिष्य दध्यात्प्रजननं तद् उपहन्याद्गर्भैस्तत्प्रजा व्यर्धयेत्तस्माद् एकाम् एव परिशिष्य तृतीयसवने निविदं दध्यात्
yaddve pariśiṣya dadhyātprajananaṃ tad upahanyādgarbhaistatprajā vyardhayettasmād ekām eva pariśiṣya tṛtīyasavane nividaṃ dadhyāt
- 12
न सूक्तेन निविदम् अतिपद्येत
na sūktena nividam atipadyeta
- 13
येन सूक्तेन निविदम् अतिपद्येत न तत्पुनर् उपनिवर्तेत वास्तुहम् एव तत्
yena sūktena nividam atipadyeta na tatpunar upanivarteta vāstuham eva tat
- 14
अन्यत्तद्दैवतं तच्छन्दसं सूक्तम् आहृत्य तस्मिन्निविदं दध्यात्
anyattaddaivataṃ tacchandasaṃ sūktam āhṛtya tasminnividaṃ dadhyāt
- 15
मा प्र गाम पथो वयम् इति पुरस्तात्सूक्तस्य शंसति
mā pra gāma patho vayam iti purastātsūktasya śaṃsati
- 16
पथो वा एष प्रैति यो यज्ञे मुह्यति मा यज्ञाद् इन्द्र सोमिन इति यज्ञाद् एव तन्न प्रच्यवते
patho vā eṣa praiti yo yajñe muhyati mā yajñād indra somina iti yajñād eva tanna pracyavate
- 17
मान्त स्थुर्नो अरातय इत्य् अरातीयत एव तद् अपहन्ति
mānta sthurno arātaya ity arātīyata eva tad apahanti
- 18
यो यज्ञस्य प्रसाधनस्तन्तुर्देवेष्व् आततः तम् आहुतं नशीमहीति
yo yajñasya prasādhanastanturdeveṣv ātataḥ tam āhutaṃ naśīmahīti
- 19
प्रजा वै तन्तुः प्रजाम् एवास्मा एतत्संतनोति
prajā vai tantuḥ prajām evāsmā etatsaṃtanoti
- 20
मनो न्व् आ हुवामहे नाराशंसेन सोमेनेति
mano nv ā huvāmahe nārāśaṃsena someneti
- 21
मनसा वै यज्ञस्तायते मनसा क्रियते
manasā vai yajñastāyate manasā kriyate
- 22
सैव तत्र प्रायश्चित्तिः प्रायश्चित्तिः
saiva tatra prāyaścittiḥ prāyaścittiḥ

