11 shlokas
- 1
ते देवा अब्रुवन्न् इयं वा इन्द्रस्य प्रिया जाया वावाता प्रासहा नामास्याम् एवेच्छामहा इति तथेति तस्याम् ऐच्छन्त सैनान् अब्रवीत्प्रातर्वः प्रतिवक्तास्मीति तस्मात्स्त्रियः पत्याविच्छन्ते तस्माद् उ स्त्र्यनुरात्रम्पत्याविच्छते ताम्प्रातर् उपायन्सैतद् एव प्रत्यपद्यत
te devā abruvann iyaṃ vā indrasya priyā jāyā vāvātā prāsahā nāmāsyām evecchāmahā iti tatheti tasyām aicchanta sainān abravītprātarvaḥ prativaktāsmīti tasmātstriyaḥ patyāvicchante tasmād u stryanurātrampatyāvicchate tāmprātar upāyansaitad eva pratyapadyata
- 2
यद्वावान पुरुतमम्पुराषाᄆ आ वृत्रहेन्द्रो नामान्य् अप्राः अचेति प्रासहस्पतिस्तुविष्मान् इति
yadvāvāna purutamampurāṣāᄆ ā vṛtrahendro nāmāny aprāḥ aceti prāsahaspatistuviṣmān iti
- 3
इन्द्रो वै प्रासहस्पतिस्तुविष्मान्
indro vai prāsahaspatistuviṣmān
- 4
यदीम् उश्मसि कर्तवे करत्तद् इति यद् एवैतद् अवोचामाकरत्तद् इत्य् एवैनांस्तद् अब्रवीत्
yadīm uśmasi kartave karattad iti yad evaitad avocāmākarattad ity evaināṃstad abravīt
- 5
ते देवा अब्रुवन्न् अप्य् अस्या इहास्तु या नो ऽस्मिन्न वै कम् अविदद् इति तथेति तस्या अप्य् अत्राकुर्वन्
te devā abruvann apy asyā ihāstu yā no 'sminna vai kam avidad iti tatheti tasyā apy atrākurvan
- 6
तस्माद् एषात्रापि शस्यते यद्वावान पुरुतमम्पुराषाᄆ इति
tasmād eṣātrāpi śasyate yadvāvāna purutamampurāṣāᄆ iti
- 7
सेना वा इन्द्रस्य प्रिया जाया वावाता प्रासहा नाम को नाम प्रजापतिः श्वशुरस्तद्यास्य कामे सेना जयेत्तस्या अर्धात्तिष्ठंस्तृणम् उभयतः परिच्छिद्येतरां सेनाम् अभ्य् अस्येत्प्रासहे कस्त्वा पश्यतीति तद्यथैवादः स्नुषा श्वशुराल्लज्जमाना निलीयमानैत्य् एवम् एव सा सेना भज्यमाना निलीयमानैति यत्रैवं विद्वांस्तृणम् उभयतः परिच्छिद्येतरां सेनां अभ्य् अस्यति प्रासहे कस्त्वा पश्यतीति
senā vā indrasya priyā jāyā vāvātā prāsahā nāma ko nāma prajāpatiḥ śvaśurastadyāsya kāme senā jayettasyā ardhāttiṣṭhaṃstṛṇam ubhayataḥ paricchidyetarāṃ senām abhy asyetprāsahe kastvā paśyatīti tadyathaivādaḥ snuṣā śvaśurāllajjamānā nilīyamānaity evam eva sā senā bhajyamānā nilīyamānaiti yatraivaṃ vidvāṃstṛṇam ubhayataḥ paricchidyetarāṃ senāṃ abhy asyati prāsahe kastvā paśyatīti
- 8
तान् इन्द्र उवाचापि वो ऽत्रास्त्व् इति ते देवा अब्रुवन्विराड्याज्यास्तु निष्केवल्यस्य या त्रयस्त्रिंशदक्षरा
tān indra uvācāpi vo 'trāstv iti te devā abruvanvirāḍyājyāstu niṣkevalyasya yā trayastriṃśadakṣarā
- 9
त्रयस्त्रिंशद्वै देवा अष्टौ वसव एकादश रुद्रा द्वादशादित्याः प्रजापतिश्च वषट्कारश्च देवता अक्षरभाजः करोत्य् अक्षरम् अक्षरम् एव तद्देवता अनुप्रपिबन्ति देवपात्रेणैव तद्देवतास्तृप्यन्ति
trayastriṃśadvai devā aṣṭau vasava ekādaśa rudrā dvādaśādityāḥ prajāpatiśca vaṣaṭkāraśca devatā akṣarabhājaḥ karoty akṣaram akṣaram eva taddevatā anuprapibanti devapātreṇaiva taddevatāstṛpyanti
- 10
यं कामयेतानायतनवान्स्याद् इत्य् अविराजास्य यजेद्गायत्र्या वा त्रिष्टुभा वान्येन वा छन्दसा वषट्कुर्याद् अनायतनवन्तम् एवैनं तत्करोति
yaṃ kāmayetānāyatanavānsyād ity avirājāsya yajedgāyatryā vā triṣṭubhā vānyena vā chandasā vaṣaṭkuryād anāyatanavantam evainaṃ tatkaroti
- 11
यं कामयेतायतनवान्स्याद् इति विराजास्य यजेत्पिबा सोमम् इन्द्र मन्दतु त्वेत्य् एतयायतनवन्तम् एवैनं तत्करोति
yaṃ kāmayetāyatanavānsyād iti virājāsya yajetpibā somam indra mandatu tvety etayāyatanavantam evainaṃ tatkaroti

