8 shlokas
- 1
ऋक्च वा इदम् अग्रे साम चास्तां सैव नाम ऋग् आसीद् अमो नाम साम सा वा ऋक्सामोपावदन्मिथुनं संभवाव प्रजात्या इति नेत्य् अब्रवीत्साम ज्यायान्वा अतो मम महिमेति ते द्वे भूत्वोपावदतां ते न प्रति चन समवदत तास्तिस्रो भूत्वोपावदंस्तत्तिसृभिः समभवद्यत्तिसृभिः समभवत्तस्मात्तिसृभिः स्तुवन्ति तिसृभिर् उद्गायन्ति तिसृभिर्हि साम संमितं तस्माद् एकस्य बह्व्यो जाया भवन्ति नैकस्यै बहवः सह पतयो यद्वै तत्सा चामश्च समभवतां तत्सामाभवत्तत्साम्नः सामत्वम्
ṛkca vā idam agre sāma cāstāṃ saiva nāma ṛg āsīd amo nāma sāma sā vā ṛksāmopāvadanmithunaṃ saṃbhavāva prajātyā iti nety abravītsāma jyāyānvā ato mama mahimeti te dve bhūtvopāvadatāṃ te na prati cana samavadata tāstisro bhūtvopāvadaṃstattisṛbhiḥ samabhavadyattisṛbhiḥ samabhavattasmāttisṛbhiḥ stuvanti tisṛbhir udgāyanti tisṛbhirhi sāma saṃmitaṃ tasmād ekasya bahvyo jāyā bhavanti naikasyai bahavaḥ saha patayo yadvai tatsā cāmaśca samabhavatāṃ tatsāmābhavattatsāmnaḥ sāmatvam
- 2
सामन्भवति य एवं वेद
sāmanbhavati ya evaṃ veda
- 3
यो वै भवति यः श्रेष्ठताम् अश्नुते स सामन्भवत्य् असामन्य इति हि निन्दन्ति
yo vai bhavati yaḥ śreṣṭhatām aśnute sa sāmanbhavaty asāmanya iti hi nindanti
- 4
ते वै पञ्चान्यद्भूत्वा पञ्चान्यद्भूत्वाकल्पेताम् आहावाश्च हिंकारश्च प्रस्तावश्च प्रथमा च ऋग् उद्गीथश्च मध्यमा च प्रतिहारश्चोत्तमा च निधनं च वषट्कारश्च
te vai pañcānyadbhūtvā pañcānyadbhūtvākalpetām āhāvāśca hiṃkāraśca prastāvaśca prathamā ca ṛg udgīthaśca madhyamā ca pratihāraścottamā ca nidhanaṃ ca vaṣaṭkāraśca
- 5
ते यत्पञ्चान्यद्भूत्वा पञ्चान्यद्भूत्वाकल्पेतां तस्माद् आहुः पाङ्क्तो यज्ञः पाङ्क्ताः पशव इति
te yatpañcānyadbhūtvā pañcānyadbhūtvākalpetāṃ tasmād āhuḥ pāṅkto yajñaḥ pāṅktāḥ paśava iti
- 6
यद् उ विराजं दशिनीम् अभिसमपद्येतां तस्माद् आहुर्विराजि यज्ञो दशिन्याम्प्रतिष्ठित इति
yad u virājaṃ daśinīm abhisamapadyetāṃ tasmād āhurvirāji yajño daśinyāmpratiṣṭhita iti
- 7
आत्मा वै स्तोत्रियः प्रजानुरूपः पत्नी धाय्या पशवः प्रगाथो गृहाः सूक्तम्
ātmā vai stotriyaḥ prajānurūpaḥ patnī dhāyyā paśavaḥ pragātho gṛhāḥ sūktam
- 8
स वा अस्मिंश्च लोके ऽमुष्मिंश्च प्रजया च पशुभिश्च गृहेषु वसति य एवं वेद
sa vā asmiṃśca loke 'muṣmiṃśca prajayā ca paśubhiśca gṛheṣu vasati ya evaṃ veda

