11 shlokas
- 1
अन्नाद्यं वा एतेनावरुन्द्धे यत्प्रौगम् अन्यान्या देवता प्रौगे शस्यते ऽन्यद् अन्यद् उक्थम्प्रौगे क्रियते
annādyaṃ vā etenāvarunddhe yatpraugam anyānyā devatā prauge śasyate 'nyad anyad ukthamprauge kriyate
- 2
अन्यद् अन्यद् अस्यान्नाद्यं ग्रहेषु ध्रियते य एवं वेद
anyad anyad asyānnādyaṃ graheṣu dhriyate ya evaṃ veda
- 3
एतद्ध वै यजमानस्याध्यात्मतमम् इवोक्थं यत्प्रौगं तस्माद् एनैनैतद् उपेक्ष्यतमम् इवेत्य् आहुर् एतेन ह्य् एनं होता संस्करोतीति
etaddha vai yajamānasyādhyātmatamam ivokthaṃ yatpraugaṃ tasmād enainaitad upekṣyatamam ivety āhur etena hy enaṃ hotā saṃskarotīti
- 4
वायव्यं शंसति तस्माद् आहुर्वायुः प्राणः प्राणो रेतो रेतः पुरुषस्य प्रथमं सम्भवतः सम्भवतीति यद्वायव्यं शंसति प्राणम् एवास्य तत्संस्करोति
vāyavyaṃ śaṃsati tasmād āhurvāyuḥ prāṇaḥ prāṇo reto retaḥ puruṣasya prathamaṃ sambhavataḥ sambhavatīti yadvāyavyaṃ śaṃsati prāṇam evāsya tatsaṃskaroti
- 5
ऐन्द्रवायवं शंसति यत्र वाव प्राणस्तद् अपानो यद् ऐन्द्रवायवं शंसति प्राणापानाव् एवास्य तत्संस्करोति
aindravāyavaṃ śaṃsati yatra vāva prāṇastad apāno yad aindravāyavaṃ śaṃsati prāṇāpānāv evāsya tatsaṃskaroti
- 6
मैत्रावरुणं शंसति तस्माद् आहुश्चक्षुः पुरुषस्य प्रथमं सम्भवतः सम्भवतीति यन्मैत्रावरुणं शंसति चक्षुर् एवास्य तत्संस्करोति
maitrāvaruṇaṃ śaṃsati tasmād āhuścakṣuḥ puruṣasya prathamaṃ sambhavataḥ sambhavatīti yanmaitrāvaruṇaṃ śaṃsati cakṣur evāsya tatsaṃskaroti
- 7
आश्विनं शंसति तस्मात्कुमारं जातं संवदन्त उप वै शुश्रूषते नि वै ध्यायतीति यद् आश्विनं शंसति श्रोत्रम् एवास्य तत्संस्करोति
āśvinaṃ śaṃsati tasmātkumāraṃ jātaṃ saṃvadanta upa vai śuśrūṣate ni vai dhyāyatīti yad āśvinaṃ śaṃsati śrotram evāsya tatsaṃskaroti
- 8
ऐन्द्रं शंसति तस्मात्कुमारं जातं संवदन्ते प्रतिधारयति वै ग्रीवा अथो शिर इति यद् ऐन्द्रं शंसति वीर्यम् एवास्य तत्संस्करोति
aindraṃ śaṃsati tasmātkumāraṃ jātaṃ saṃvadante pratidhārayati vai grīvā atho śira iti yad aindraṃ śaṃsati vīryam evāsya tatsaṃskaroti
- 9
वैश्वदेवं शंसति तस्मात्कुमारो जातः पश्चेव प्रचरति वैश्वदेवानि ह्य् अङ्गानि यद्वैश्वदेवं शंसत्य् अङ्गान्य् एवास्य तत्संस्करोति
vaiśvadevaṃ śaṃsati tasmātkumāro jātaḥ paśceva pracarati vaiśvadevāni hy aṅgāni yadvaiśvadevaṃ śaṃsaty aṅgāny evāsya tatsaṃskaroti
- 10
सारस्वतं शंसति तस्मात्कुमारं जातं जघन्या वाग् आविशति वाग्घि सरस्वती यत्सारस्वतं शंसति वाचम् एवास्य तत्संस्करोति
sārasvataṃ śaṃsati tasmātkumāraṃ jātaṃ jaghanyā vāg āviśati vāgghi sarasvatī yatsārasvataṃ śaṃsati vācam evāsya tatsaṃskaroti
- 11
एष वै जातो जायते सर्वाभ्य एताभ्यो देवताभ्यः सर्वेभ्य उक्थेभ्यः सर्वेभ्यश्छन्दोभ्यः सर्वेभ्यः प्रौगेभ्यः सर्वेभ्यः सवनेभ्यो य एवं वेद यस्य चैवं विदुष एतच्छंसन्ति
eṣa vai jāto jāyate sarvābhya etābhyo devatābhyaḥ sarvebhya ukthebhyaḥ sarvebhyaśchandobhyaḥ sarvebhyaḥ praugebhyaḥ sarvebhyaḥ savanebhyo ya evaṃ veda yasya caivaṃ viduṣa etacchaṃsanti

