12 shlokas
- 1
तद् आहुर्यथा वाव स्तोत्रम् एवं शस्त्रम् आग्नेयीषु सामगाः स्तुवते वायव्यया होता प्रतिपद्यते कथम् अस्य आग्नेय्यो ऽनुशस्ता भवन्तीति
tad āhuryathā vāva stotram evaṃ śastram āgneyīṣu sāmagāḥ stuvate vāyavyayā hotā pratipadyate katham asya āgneyyo 'nuśastā bhavantīti
- 2
अग्नेर्वा एताः सर्वास्तन्वो यद् एता देवताः
agnervā etāḥ sarvāstanvo yad etā devatāḥ
- 3
स यद् अग्निः प्रवान् इव दहति तद् अस्य वायव्यं रूपं तद् अस्य तेनानुशंसति
sa yad agniḥ pravān iva dahati tad asya vāyavyaṃ rūpaṃ tad asya tenānuśaṃsati
- 4
अथ यद्द्वैधम् इव कृत्वा दहति द्वौ वा इन्द्रवायू तद् अस्यैन्द्रवायवं रूपं तद् अस्य तेनानुशंसति
atha yaddvaidham iva kṛtvā dahati dvau vā indravāyū tad asyaindravāyavaṃ rūpaṃ tad asya tenānuśaṃsati
- 5
अथ यद् उच्च हृष्यति नि च हृष्यति तद् अस्य मैत्रावरुणं रूपं तद् अस्य तेनानुशंसति
atha yad ucca hṛṣyati ni ca hṛṣyati tad asya maitrāvaruṇaṃ rūpaṃ tad asya tenānuśaṃsati
- 6
स यद् अग्निर्घोरसंस्पर्शस्तद् अस्य वारुणं रूपं तं यद्घोरसंस्पर्शं सन्तम्मित्रकृत्येवोपासते तद् अस्य मैत्रं रूपं तद् अस्य तेनानुशंसति
sa yad agnirghorasaṃsparśastad asya vāruṇaṃ rūpaṃ taṃ yadghorasaṃsparśaṃ santammitrakṛtyevopāsate tad asya maitraṃ rūpaṃ tad asya tenānuśaṃsati
- 7
अथ यद् एनं द्वाभ्याम्बाहुभ्यां द्वाभ्याम् अरणीभ्यां मन्थन्ति द्वौ वा अश्विनौ तद् अस्याश्विनं रूपं तद् अस्य तेनानुशंसति
atha yad enaṃ dvābhyāmbāhubhyāṃ dvābhyām araṇībhyāṃ manthanti dvau vā aśvinau tad asyāśvinaṃ rūpaṃ tad asya tenānuśaṃsati
- 8
अथ यद् उच्चैर्घोषः स्तनयन्बबबाकुर्वन्न् इव दहति यस्माद्भूतानि विजन्ते तद् अस्यैन्द्रं रूपं तद् अस्य तेनानुशंसति
atha yad uccairghoṣaḥ stanayanbababākurvann iva dahati yasmādbhūtāni vijante tad asyaindraṃ rūpaṃ tad asya tenānuśaṃsati
- 9
अथ यद् एनम् एकं सन्तं बहुधा विहरन्ति तद् अस्य वैश्वदेवं रूपं तद् अस्य तेनानुशंसति
atha yad enam ekaṃ santaṃ bahudhā viharanti tad asya vaiśvadevaṃ rūpaṃ tad asya tenānuśaṃsati
- 10
अथ यत्स्फूर्जयन्वाचम् इव वदन्दहति तद् अस्य सारस्वतं रूपं तद् अस्य तेनानुशंसति
atha yatsphūrjayanvācam iva vadandahati tad asya sārasvataṃ rūpaṃ tad asya tenānuśaṃsati
- 11
एवम् उ हास्य वायव्ययैव प्रतिपद्यमानस्य तृचेन तृचेनैवैताभिर्देवताभिः स्तोत्रियो ऽनुशस्तो भवति
evam u hāsya vāyavyayaiva pratipadyamānasya tṛcena tṛcenaivaitābhirdevatābhiḥ stotriyo 'nuśasto bhavati
- 12
विश्वेभिः सोम्यम्मध्व् अग्न इन्द्रेण वायुना पिबा मित्रस्य धामभिर् इति वैश्वदेवम् उक्थं शस्त्वा वैश्वदेव्या यजति यथाभागं तद्देवताः प्रीणाति
viśvebhiḥ somyammadhv agna indreṇa vāyunā pibā mitrasya dhāmabhir iti vaiśvadevam ukthaṃ śastvā vaiśvadevyā yajati yathābhāgaṃ taddevatāḥ prīṇāti

