5 shlokas
- 1
इन्द्रो वै वृत्रं हनिष्यन्सर्वा देवता अब्रवीद् अनु मोपतिष्ठध्वम् उप मा ह्वयध्वम् इति तथेति तं हनिष्यन्त आद्रवन्सो ऽवेन्मां वै हनिष्यन्त आद्रवन्ति हन्तेमान्भीषया इति तान् अभि प्राश्वसीत्तस्य श्वसथाद् ईषमाणा विश्वे देवा अद्रवन्मरुतो हैनं नाजहुः प्रहर भगवो जहि वीरयस्वेत्य् एवैनम् एतां वाचं वदन्त उपातिष्ठन्त तद् एतद् ऋषिः पश्यन्न् अभ्यनूवाच वृत्रस्य त्वा श्वसथाद् ईषमाणा विश्वे देवा अजहुर्ये सखायः मरुद्भिर् इन्द्र सख्यं ते अस्त्व् अथेमा विश्वाः पृतना जयासीति सो ऽवेद् इमे वै किल मे सचिवा इमे माकामयन्त हन्तेमान् अस्मिन्न् उक्थ आभजा इति तान् एतस्मिन्न् उक्थ आभजद् अथ हैते तर्ह्य् उभे एव निष्केवल्ये उक्थे आसतुः
indro vai vṛtraṃ haniṣyansarvā devatā abravīd anu mopatiṣṭhadhvam upa mā hvayadhvam iti tatheti taṃ haniṣyanta ādravanso 'venmāṃ vai haniṣyanta ādravanti hantemānbhīṣayā iti tān abhi prāśvasīttasya śvasathād īṣamāṇā viśve devā adravanmaruto hainaṃ nājahuḥ prahara bhagavo jahi vīrayasvety evainam etāṃ vācaṃ vadanta upātiṣṭhanta tad etad ṛṣiḥ paśyann abhyanūvāca vṛtrasya tvā śvasathād īṣamāṇā viśve devā ajahurye sakhāyaḥ marudbhir indra sakhyaṃ te astv athemā viśvāḥ pṛtanā jayāsīti so 'ved ime vai kila me sacivā ime mākāmayanta hantemān asminn uktha ābhajā iti tān etasminn uktha ābhajad atha haite tarhy ubhe eva niṣkevalye ukthe āsatuḥ
- 2
मरुत्वतीयं ग्रहं गृह्णाति मरुत्वतीयम्प्रगाथं शंसति मरुत्वतीयं सूक्तं शंसति मरुत्वतीयाम्निविदं दधाति मरुतां सा भक्तिः
marutvatīyaṃ grahaṃ gṛhṇāti marutvatīyampragāthaṃ śaṃsati marutvatīyaṃ sūktaṃ śaṃsati marutvatīyāmnividaṃ dadhāti marutāṃ sā bhaktiḥ
- 3
मरुत्वतीयम् उक्थं शस्त्वा मरुत्वतीयया यजति यथाभागं तद्देवताः प्रीणाति
marutvatīyam ukthaṃ śastvā marutvatīyayā yajati yathābhāgaṃ taddevatāḥ prīṇāti
- 4
ये त्वाहिहत्ये मघवन्न् अवर्धन्ये शाम्बरे हरिवो ये गविष्टौ ये त्वा नूनम् अनुमदन्ति विप्राः पिबेन्द्र सोमं सगणो मरुद्भिर् इति
ye tvāhihatye maghavann avardhanye śāmbare harivo ye gaviṣṭau ye tvā nūnam anumadanti viprāḥ pibendra somaṃ sagaṇo marudbhir iti
- 5
यत्र यत्रैवैभिर्व्यजयत यत्र यत्र वीर्यम् अकरोत्तद् एवैतत्समनुवेद्येन्द्रेणैनान्ससोमपीथान्करोति
yatra yatraivaibhirvyajayata yatra yatra vīryam akarottad evaitatsamanuvedyendreṇainānsasomapīthānkaroti

