14 shlokas
- 1
धाय्याः शंसति
dhāyyāḥ śaṃsati
- 2
धाय्याभिर्वै प्रजापतिर् इमांल्लोकान् अधयद्यं यं कामम् अकामयत
dhāyyābhirvai prajāpatir imāṃllokān adhayadyaṃ yaṃ kāmam akāmayata
- 3
तथैवैतद्यजमानो धाय्याभिर् एवेमांल्लोकान्धयति यं यं कामं कामयते य एवं वेद यद् एव धाय्याः
tathaivaitadyajamāno dhāyyābhir evemāṃllokāndhayati yaṃ yaṃ kāmaṃ kāmayate ya evaṃ veda yad eva dhāyyāḥ
- 4
यत्र यत्र वै देवा यज्ञस्य छिद्रं निरजानंस्तद्धाय्याभिर् अपिदधुस्तद्धाय्यानां धाय्यात्वम्
yatra yatra vai devā yajñasya chidraṃ nirajānaṃstaddhāyyābhir apidadhustaddhāyyānāṃ dhāyyātvam
- 5
अछिद्रेण हास्य यज्ञेनेष्टम्भवति य एवं वेद यद्व् एव धाय्याः
achidreṇa hāsya yajñeneṣṭambhavati ya evaṃ veda yadv eva dhāyyāḥ
- 6
स्यूम हैतद्यज्ञस्य यद्धाय्यास्तद्यथा सूच्या वासः संदधद् इयाद् एवम् एवैताभिर्यज्ञस्य छिद्रं संदधद् एति य एवं वेद यद्व् एव धाय्याः
syūma haitadyajñasya yaddhāyyāstadyathā sūcyā vāsaḥ saṃdadhad iyād evam evaitābhiryajñasya chidraṃ saṃdadhad eti ya evaṃ veda yadv eva dhāyyāḥ
- 7
तान्य् उ वा एतान्य् उपसदाम् एवोक्थानि यद्धाय्या अग्निर्नेतेत्य् आग्नेयी प्रथमोपसत्तस्या एतद् उक्थं त्वं सोम क्रतुभिर् इति सौम्या द्वितीयोपसत्तस्या एतद् उक्थं पिन्वन्त्य् अप इति वैष्णवी तृतीयोपसत्तस्या एतद् उक्थम्
tāny u vā etāny upasadām evokthāni yaddhāyyā agnirnetety āgneyī prathamopasattasyā etad ukthaṃ tvaṃ soma kratubhir iti saumyā dvitīyopasattasyā etad ukthaṃ pinvanty apa iti vaiṣṇavī tṛtīyopasattasyā etad uktham
- 8
यावन्तं ह वै सौम्येनाध्वरेणेष्ट्वा लोकं जयति तम् अत एकैकयोपसदा जयति य एवं वेद यश्चैवं विद्वान्धाय्याः शंसति
yāvantaṃ ha vai saumyenādhvareṇeṣṭvā lokaṃ jayati tam ata ekaikayopasadā jayati ya evaṃ veda yaścaivaṃ vidvāndhāyyāḥ śaṃsati
- 9
तद्धैक आहुस्तान्वो मह इति शंसेद् एतां वाव वयम्भरतेषु शस्यमानाम् अभिव्यजानीम इति वदन्तः
taddhaika āhustānvo maha iti śaṃsed etāṃ vāva vayambharateṣu śasyamānām abhivyajānīma iti vadantaḥ
- 10
तत्तन्नादृत्यम्
tattannādṛtyam
- 11
यद् एतां शंसेद् ईश्वरः पर्जन्यो ऽवर्ष्टोः
yad etāṃ śaṃsed īśvaraḥ parjanyo 'varṣṭoḥ
- 12
पिन्वन्त्य् अप इत्य् एव शंसेत्
pinvanty apa ity eva śaṃset
- 13
वृष्टिवनि पदं मरुत इति मारुतम् अत्यं न मिहे वि नयन्तीति विनीतवद्यद्विनीतवत्तद्विक्रान्तवद्यद्विक्रान्तवत्तद्वैष्णवं वाजिनम् इतीन्द्रो वै वाजी तस्यां वा एतस्यां चत्वारि पदानि वृष्टिवनि मारुतं वैष्णवम् ऐन्द्रम्
vṛṣṭivani padaṃ maruta iti mārutam atyaṃ na mihe vi nayantīti vinītavadyadvinītavattadvikrāntavadyadvikrāntavattadvaiṣṇavaṃ vājinam itīndro vai vājī tasyāṃ vā etasyāṃ catvāri padāni vṛṣṭivani mārutaṃ vaiṣṇavam aindram
- 14
सा वा एषा तृतीयसवनभाजना सती मध्यंदिने शस्यते तस्माद्धेदं भरतानाम्पशवः सायंगोष्ठाः सन्तो मध्यंदिने संगविनीम् आयन्ति सो जगती जागता हि पशव आत्मा यजमानस्य मध्यंदिनस्तद्यजमाने पशून्दधाति
sā vā eṣā tṛtīyasavanabhājanā satī madhyaṃdine śasyate tasmāddhedaṃ bharatānāmpaśavaḥ sāyaṃgoṣṭhāḥ santo madhyaṃdine saṃgavinīm āyanti so jagatī jāgatā hi paśava ātmā yajamānasya madhyaṃdinastadyajamāne paśūndadhāti

