13 shlokas
- 1
स्वादुष्किलायम्मधुमाꣳ उतायम् इतीन्द्रस्यैन्द्रीर् अनुपानीयाः शंसत्य् एताभिर्वा इन्द्रस्तृतीयसवनम् अन्वपिबत्तद् अनुपानीयानाम् अनुपानीयत्वम्
svāduṣkilāyammadhumām̐ utāyam itīndrasyaindrīr anupānīyāḥ śaṃsaty etābhirvā indrastṛtīyasavanam anvapibattad anupānīyānām anupānīyatvam
- 2
माद्यन्तीव वै तर्हि देवता यद् एता होता शंसति तस्माद् एतासु मद्वत्प्रतिगीर्यम्
mādyantīva vai tarhi devatā yad etā hotā śaṃsati tasmād etāsu madvatpratigīryam
- 3
ययोर् ओजसा स्कभिता रजांसीति वैष्णुवारुणीम् ऋचं शंसति विष्णुर्वै यज्ञस्य दुरिष्टम्पाति वरुणः स्विष्टं तयोर् उभयोर् एव शान्त्यै
yayor ojasā skabhitā rajāṃsīti vaiṣṇuvāruṇīm ṛcaṃ śaṃsati viṣṇurvai yajñasya duriṣṭampāti varuṇaḥ sviṣṭaṃ tayor ubhayor eva śāntyai
- 4
विष्णोर्नु कं वीर्याणि प्र वोचम् इति वैष्णवीं शंसति यथा वै मत्यम् एवं यज्ञस्य विष्णुस्तद्यथा दुष्कृष्टं दुर्मतीकृतं सुकृष्टं सुमतीकृतं कुर्वन्न् इयाद् एवम् एवैतद्यज्ञस्य दुष्टुतं दुःशस्तं सुष्टुतं सुशस्तं कुर्वन्न् एति यद् एतां होता शंसति
viṣṇornu kaṃ vīryāṇi pra vocam iti vaiṣṇavīṃ śaṃsati yathā vai matyam evaṃ yajñasya viṣṇustadyathā duṣkṛṣṭaṃ durmatīkṛtaṃ sukṛṣṭaṃ sumatīkṛtaṃ kurvann iyād evam evaitadyajñasya duṣṭutaṃ duḥśastaṃ suṣṭutaṃ suśastaṃ kurvann eti yad etāṃ hotā śaṃsati
- 5
तन्तुं तन्वन्रजसो भानुम् अन्व् इहीति प्राजापत्यां शंसति प्रजा वै तन्तुः प्रजाम् एवास्मा एतत्संतनोति
tantuṃ tanvanrajaso bhānum anv ihīti prājāpatyāṃ śaṃsati prajā vai tantuḥ prajām evāsmā etatsaṃtanoti
- 6
ज्योतिष्मतः पथो रक्ष धिया कृतान् इति देवयाना वै ज्योतिष्मन्तः पन्थानस्तान् एवास्मा एतद्वितनोत्य् अनुल्बणं वयत जोगुवाम् अपो मनुर्भव जनया दैव्यं जनम् इत्य् एवैनं तन्मनोः प्रजया संतनोति प्रजात्यै
jyotiṣmataḥ patho rakṣa dhiyā kṛtān iti devayānā vai jyotiṣmantaḥ panthānastān evāsmā etadvitanoty anulbaṇaṃ vayata joguvām apo manurbhava janayā daivyaṃ janam ity evainaṃ tanmanoḥ prajayā saṃtanoti prajātyai
- 7
प्रजायते प्रजया पशुभिर्य एवम्वेद
prajāyate prajayā paśubhirya evamveda
- 8
एवा न इन्द्रो मघवा विरप्शीत्य् उत्तमया परिदधातीयं वा इन्द्रो मघवा विरप्शी
evā na indro maghavā virapśīty uttamayā paridadhātīyaṃ vā indro maghavā virapśī
- 9
करत्सत्या चर्षणीधृद् अनर्वेतीयं वै सत्या चर्षणीधृद् अनर्वा
karatsatyā carṣaṇīdhṛd anarvetīyaṃ vai satyā carṣaṇīdhṛd anarvā
- 10
त्वं राजा जनुषां धेह्य् अस्मे इतीयं वै राजा जनुषाम्
tvaṃ rājā januṣāṃ dhehy asme itīyaṃ vai rājā januṣām
- 11
अधि श्रवो माहिनं यज्जरित्र इतीयं वै माहिनं यज्ञः श्रवो यजमानो जरिता यजमानायैवैताम् आशिषम् आशास्ते
adhi śravo māhinaṃ yajjaritra itīyaṃ vai māhinaṃ yajñaḥ śravo yajamāno jaritā yajamānāyaivaitām āśiṣam āśāste
- 12
तद् उपस्पृशन्भूमिम्परिदध्यात्तद्यस्याम् एव यज्ञं संभरति तस्याम् एवैनं तद् अन्ततः प्रतिष्ठापयति
tad upaspṛśanbhūmimparidadhyāttadyasyām eva yajñaṃ saṃbharati tasyām evainaṃ tad antataḥ pratiṣṭhāpayati
- 13
अग्ने मरुद्भिः शुभयद्भिर् ऋक्वभिर् इत्य् आग्निमारुतम् उक्थं शस्त्वाग्निमारुत्या यजति यथाभागं तद्देवताः प्रीणाति प्रीणाति
agne marudbhiḥ śubhayadbhir ṛkvabhir ity āgnimārutam ukthaṃ śastvāgnimārutyā yajati yathābhāgaṃ taddevatāḥ prīṇāti prīṇāti

