7 shlokas
- 1
ते देवा अब्रुवन्न् आदित्यान्युष्माभिर् इदं सवनम् उद्यच्छामेति तथेति तस्माद् आदित्यारम्भणं तृतीयसवनम् आदित्यग्रहः पुरस्तात्तस्य
te devā abruvann ādityānyuṣmābhir idaṃ savanam udyacchāmeti tatheti tasmād ādityārambhaṇaṃ tṛtīyasavanam ādityagrahaḥ purastāttasya
- 2
यजत्य् आदित्यासो अदितिर्मादयन्ताम् इति मद्वत्या रूपसमृद्धया मद्वद्वै तृतीयसवनस्य रूपम्
yajaty ādityāso aditirmādayantām iti madvatyā rūpasamṛddhayā madvadvai tṛtīyasavanasya rūpam
- 3
नानुवषट्करोति न भक्षयति संस्था वा एषा यद् अनुवषट्कारः संस्था भक्षः प्राणा आदित्या नेत्प्राणान्संस्थापयानीति
nānuvaṣaṭkaroti na bhakṣayati saṃsthā vā eṣā yad anuvaṣaṭkāraḥ saṃsthā bhakṣaḥ prāṇā ādityā netprāṇānsaṃsthāpayānīti
- 4
त आदित्या अब्रुवन्सवितारं त्वयेदं सह सवनम् उद्यच्छामेति तथेति तस्मात्सावित्री प्रतिपद्भवति वैश्वदेवस्य सावित्रग्रहः पुरस्तात्तस्य यजति दमूना देवः सविता वरेण्य इति मद्वत्या रूपसमृद्धया मद्वद्वै तृतीयसवनस्य रूपं नानुवषट्करोति न भक्षयति संस्था वा एषा यद् अनुवषट्कारः संस्था भक्षः प्राणः सविता नेत्प्राणं संस्थापयानीति
ta ādityā abruvansavitāraṃ tvayedaṃ saha savanam udyacchāmeti tatheti tasmātsāvitrī pratipadbhavati vaiśvadevasya sāvitragrahaḥ purastāttasya yajati damūnā devaḥ savitā vareṇya iti madvatyā rūpasamṛddhayā madvadvai tṛtīyasavanasya rūpaṃ nānuvaṣaṭkaroti na bhakṣayati saṃsthā vā eṣā yad anuvaṣaṭkāraḥ saṃsthā bhakṣaḥ prāṇaḥ savitā netprāṇaṃ saṃsthāpayānīti
- 5
उभे वा एष एते सवने विपिबति यत्सविता प्रातःसवनं च तृतीयसवनं च तद्यत्पिबवत्सावित्र्यै निविदः पदम्पुरस्ताद्भवति मद्वद् उपरिष्टाद् उभयोर् एवैनं तत्सवनयोर् आभजति प्रातःसवने च तृतीयसवने च
ubhe vā eṣa ete savane vipibati yatsavitā prātaḥsavanaṃ ca tṛtīyasavanaṃ ca tadyatpibavatsāvitryai nividaḥ padampurastādbhavati madvad upariṣṭād ubhayor evainaṃ tatsavanayor ābhajati prātaḥsavane ca tṛtīyasavane ca
- 6
बह्व्यः प्रातर्वायव्याः शस्यन्त एका तृतीयसवने तस्माद् ऊर्ध्वाः पुरुषस्य भूयांसः प्राणा यच्चावाञ्चः
bahvyaḥ prātarvāyavyāḥ śasyanta ekā tṛtīyasavane tasmād ūrdhvāḥ puruṣasya bhūyāṃsaḥ prāṇā yaccāvāñcaḥ
- 7
द्यावापृथिवीयं शंसति द्यावापृथिवी वै प्रतिष्ठे इयम् एवेह प्रतिष्ठासाव् अमुत्र तद्यद्द्यावापृथिवीयं शंसति प्रतिष्ठयोर् एवैनं तत्प्रतिष्ठापयति
dyāvāpṛthivīyaṃ śaṃsati dyāvāpṛthivī vai pratiṣṭhe iyam eveha pratiṣṭhāsāv amutra tadyaddyāvāpṛthivīyaṃ śaṃsati pratiṣṭhayor evainaṃ tatpratiṣṭhāpayati

