6 shlokas
- 1
आग्नेयी प्रथमा घृतयाज्या सौमी सौम्ययाज्या वैष्णवी घृतयाज्या त्वं सोम पितृभिः संविदान इति सौम्यस्य पितृमत्या यजति
āgneyī prathamā ghṛtayājyā saumī saumyayājyā vaiṣṇavī ghṛtayājyā tvaṃ soma pitṛbhiḥ saṃvidāna iti saumyasya pitṛmatyā yajati
- 2
घ्नन्ति वा एतत्सोमं यद् अभिषुण्वन्ति तस्यैताम् अनुस्तरणीं कुर्वन्ति यत्सौम्यः पितृभ्यो वा अनुस्तरणी तस्मात्सौम्यस्य पितृमत्या यजति
ghnanti vā etatsomaṃ yad abhiṣuṇvanti tasyaitām anustaraṇīṃ kurvanti yatsaumyaḥ pitṛbhyo vā anustaraṇī tasmātsaumyasya pitṛmatyā yajati
- 3
अवधिषुर्वा एतत्सोमं यद् अभ्यसुषवुस्तद् एनम्पुनः संभावयन्ति
avadhiṣurvā etatsomaṃ yad abhyasuṣavustad enampunaḥ saṃbhāvayanti
- 4
पुनर् आप्याययन्त्य् उपसदां रूपेणोपसदां किल वै तद्रूपं यद् एता देवता अग्निः सोमो विष्णुर् इति
punar āpyāyayanty upasadāṃ rūpeṇopasadāṃ kila vai tadrūpaṃ yad etā devatā agniḥ somo viṣṇur iti
- 5
प्रतिगृह्य सौम्यं होता पूर्वश्छन्दोगेभ्यो ऽवेक्षेत
pratigṛhya saumyaṃ hotā pūrvaśchandogebhyo 'vekṣeta
- 6
तं हैके पूर्वं छन्दोगेभ्यो हरन्ति तत्तथा न कुर्याद्वषट्कर्ता प्रथमः सर्वभक्षान्भक्षयतीति ह स्माह तेनैव रूपेण तस्माद्वषट्कर्तैव पूर्वो ऽवेक्षेताथैनं छन्दोगेभ्यो हरन्ति
taṃ haike pūrvaṃ chandogebhyo haranti tattathā na kuryādvaṣaṭkartā prathamaḥ sarvabhakṣānbhakṣayatīti ha smāha tenaiva rūpeṇa tasmādvaṣaṭkartaiva pūrvo 'vekṣetāthainaṃ chandogebhyo haranti

