14 shlokas
- 1
सनत्कुमार उवाच
ततः स भगवान्देवः कपर्दी नीललोहितः
आज्ञया परमेशस्य जग्राह ब्रह्मणः शिरः
sanatkumāra uvāca
tataḥ sa bhagavāndevaḥ kapardī nīlalohitaḥ
ājñayā parameśasya jagrāha brahmaṇaḥ śiraḥ
- 2
तद्गृहीत्वा शिरो दीप्तं रूपं विकृतमास्थितः
योगक्रीडां समास्थाय भैक्षाय प्रचचार ह
tadgṛhītvā śiro dīptaṃ rūpaṃ vikṛtamāsthitaḥ
yogakrīḍāṃ samāsthāya bhaikṣāya pracacāra ha
- 3
स देववेश्मनि तदा भिक्षार्थम् अगमद्द्विजाः
न चास्य कश्चित्तां भिक्षामनुरूपामदाद्विभोः
sa devaveśmani tadā bhikṣārtham agamaddvijāḥ
na cāsya kaścittāṃ bhikṣāmanurūpāmadādvibhoḥ
- 4
अभ्यगात्संक्रमेणैव वेश्म विष्णोर्महात्मनः
तस्यातिष्ठत स द्वारि भिक्षामुच्चारयञ्छुभाम्
abhyagātsaṃkrameṇaiva veśma viṣṇormahātmanaḥ
tasyātiṣṭhata sa dvāri bhikṣāmuccārayañchubhām
- 5
स दृष्ट्वा तदुपस्थं तु विष्णुर्वै योगचक्षुषा
सिरां ललाटात्संभिद्य रक्तधारामपातयत्
पपात सा च विस्तीर्णा योजनार्धशतं तदा
sa dṛṣṭvā tadupasthaṃ tu viṣṇurvai yogacakṣuṣā
sirāṃ lalāṭātsaṃbhidya raktadhārāmapātayat
papāta sā ca vistīrṇā yojanārdhaśataṃ tadā
- 6
तया पतन्त्या विप्रेन्द्रा बहून्यब्दानि धारया
पितामहकपालस्य नार्धमप्य् अभिपूरितम्
तमुवाच ततो देवः प्रहस्य वचनं शुभम्
tayā patantyā viprendrā bahūnyabdāni dhārayā
pitāmahakapālasya nārdhamapy abhipūritam
tamuvāca tato devaḥ prahasya vacanaṃ śubham
- 7
सकृत्कन्याः प्रदीयन्ते सकृदग्निश्च जायते
सकृद्राजानो ब्रुवते सकृद्भिक्षा प्रदीयते
sakṛtkanyāḥ pradīyante sakṛdagniśca jāyate
sakṛdrājāno bruvate sakṛdbhikṣā pradīyate
- 8
तुष्टो ऽस्मि तव दानेन युक्तेनानेन मानद
वरं वरय भद्रं ते वरदो ऽस्मि तवाद्य वै
tuṣṭo 'smi tava dānena yuktenānena mānada
varaṃ varaya bhadraṃ te varado 'smi tavādya vai
- 9
विष्णुरुवाच
एष एव वरः श्लाघ्यो यदहं देवताधिपम्
पश्यामि शंकरं देवमुग्रं शर्वं कपर्दिनम्
viṣṇuruvāca
eṣa eva varaḥ ślāghyo yadahaṃ devatādhipam
paśyāmi śaṃkaraṃ devamugraṃ śarvaṃ kapardinam
- 10
देवश्छायां ततो वीक्ष्य कपालस्थे तदा रसे
ससर्ज पुरुषं दीप्तं विष्णोः सदृशमूर्जितम्
devaśchāyāṃ tato vīkṣya kapālasthe tadā rase
sasarja puruṣaṃ dīptaṃ viṣṇoḥ sadṛśamūrjitam
- 11
तमाहाथाक्षयश्चासि अजरामर एव च
युद्धेषु चाप्रतिद्वंद्वी सखा विष्णोरनुत्तमः
देवकार्यकरः श्रीमान्सहानेन चरस्व च
tamāhāthākṣayaścāsi ajarāmara eva ca
yuddheṣu cāpratidvaṃdvī sakhā viṣṇoranuttamaḥ
devakāryakaraḥ śrīmānsahānena carasva ca
- 12
नारासु जन्म यस्मात्ते विष्णुदेहोद्भवासु च
नरस्तस्माद्धि नाम्ना त्वं प्रियश्चास्य भविष्यसि
nārāsu janma yasmātte viṣṇudehodbhavāsu ca
narastasmāddhi nāmnā tvaṃ priyaścāsya bhaviṣyasi
- 13
वायुरुवाच
तं तदाश्वास्य निक्षिप्य नरं विष्णोः स्वयं प्रभुः
अगमद्ब्रह्मसदनं तौ चाविविशतुर्गृहम्
vāyuruvāca
taṃ tadāśvāsya nikṣipya naraṃ viṣṇoḥ svayaṃ prabhuḥ
agamadbrahmasadanaṃ tau cāviviśaturgṛham
- 14
य इदं नरजन्मेह शृणुयाद्वा पठेत वा
स कीर्त्या परया युक्तो विष्णुलोके महीयते
ya idaṃ narajanmeha śṛṇuyādvā paṭheta vā
sa kīrtyā parayā yukto viṣṇuloke mahīyate

