30 shlokas
- 1
सनत्कुमार उवाच
अथ वृत्ते विवाहे तु भवस्यामिततेजसः
प्रहर्षमतुलं गत्वा देवाः सहपितामहाः
तुष्टुवुर्वाग्भिरिष्टाभिः प्रणमन्तो महेश्वरम्
sanatkumāra uvāca
atha vṛtte vivāhe tu bhavasyāmitatejasaḥ
praharṣamatulaṃ gatvā devāḥ sahapitāmahāḥ
tuṣṭuvurvāgbhiriṣṭābhiḥ praṇamanto maheśvaram
- 2
नमः पर्वतलिङ्गाय पर्वतेशाय वै नमः
नमः पवनवेगाय विरूपायाजिताय च
namaḥ parvataliṅgāya parvateśāya vai namaḥ
namaḥ pavanavegāya virūpāyājitāya ca
- 3
नमः क्लेशविनाशाय दात्रे च शुभसम्पदाम्
नमो नीलशिखण्डाय अम्बिकापतये नमः
namaḥ kleśavināśāya dātre ca śubhasampadām
namo nīlaśikhaṇḍāya ambikāpataye namaḥ
- 4
नमः पवनरूपाय शतरूपाय वै नमः
नमो भैरवरूपाय विरूपनयनाय च
namaḥ pavanarūpāya śatarūpāya vai namaḥ
namo bhairavarūpāya virūpanayanāya ca
- 5
नमः सहस्रनेत्राय सहस्रचरणाय च
नमो वेदरहस्याय वेदाङ्गाय नमो नमः
namaḥ sahasranetrāya sahasracaraṇāya ca
namo vedarahasyāya vedāṅgāya namo namaḥ
- 6
विष्टम्भनाय शक्रस्य बाहोर्वेदाङ्कुराय च
चराचराधिपतये शमनाय नमो नमः
viṣṭambhanāya śakrasya bāhorvedāṅkurāya ca
carācarādhipataye śamanāya namo namaḥ
- 7
सलिलेशयलिङ्गाय युगान्तायतलिङ्गिने
नमः कपालमालाय कपालस्रग्मिणे नमः
salileśayaliṅgāya yugāntāyataliṅgine
namaḥ kapālamālāya kapālasragmiṇe namaḥ
- 8
नमः कपालहस्ताय दंष्ट्रिणे गदिने नमः
नमस्त्रैलोक्यवाहाय सप्तलोकरथाय च
namaḥ kapālahastāya daṃṣṭriṇe gadine namaḥ
namastrailokyavāhāya saptalokarathāya ca
- 9
नमः खट्वाङ्गहस्ताय प्रमथार्तिहराय च
नमो यज्ञशिरोहर्त्रे कृष्णकेशापहारिणे
namaḥ khaṭvāṅgahastāya pramathārtiharāya ca
namo yajñaśirohartre kṛṣṇakeśāpahāriṇe
- 10
भगनेत्रनिपाताय पूष्णो दन्तहराय च
नमः पिनाकशूलासिखड्गमुद्गरधारिणे
bhaganetranipātāya pūṣṇo dantaharāya ca
namaḥ pinākaśūlāsikhaḍgamudgaradhāriṇe
- 11
नमो ऽस्तु कालकालाय तृतीयनयनाय च
अन्तकान्तकृते चैव नमः पर्वतवासिने
namo 'stu kālakālāya tṛtīyanayanāya ca
antakāntakṛte caiva namaḥ parvatavāsine
- 12
सुवर्णरेतसे चैव सर्पकुण्डलधारिणे
वाड्वलेर्योगनाशाय योगिनां गुरवे नमः
suvarṇaretase caiva sarpakuṇḍaladhāriṇe
vāḍvaleryoganāśāya yogināṃ gurave namaḥ
- 13
शशाङ्कादित्यनेत्राय ललाटनयनाय च
नमः श्मशानरतये श्मशानवरदाय च
śaśāṅkādityanetrāya lalāṭanayanāya ca
namaḥ śmaśānarataye śmaśānavaradāya ca
- 14
नमो दैवतनाथाय त्र्यम्बकाय नमो नमः
अशनीशतहासाय ब्रह्मण्यायाजिताय च
namo daivatanāthāya tryambakāya namo namaḥ
aśanīśatahāsāya brahmaṇyāyājitāya ca
- 15
गृहस्थसाधवे नित्यं जटिने ब्रह्मचारिणे
नमो मुण्डार्धमुण्डाय पशूनां पतये नमः
gṛhasthasādhave nityaṃ jaṭine brahmacāriṇe
namo muṇḍārdhamuṇḍāya paśūnāṃ pataye namaḥ
- 16
सलिले तप्यमानाय योगैश्वर्यप्रदाय च
नमः शान्ताय दान्ताय प्रलयोत्पत्तिकारिणे
salile tapyamānāya yogaiśvaryapradāya ca
namaḥ śāntāya dāntāya pralayotpattikāriṇe
- 17
नमो ऽनुग्रहकर्त्रे च स्थितिकर्त्रे नमो नमः
नमो रुद्राय वसवे आदित्यायाश्विने नमः
namo 'nugrahakartre ca sthitikartre namo namaḥ
namo rudrāya vasave ādityāyāśvine namaḥ
- 18
नमः पित्रे ऽथ साध्याय विश्वेदेवाय वै नमः
नमः शर्वाय सर्वाय उग्राय वरदाय च
namaḥ pitre 'tha sādhyāya viśvedevāya vai namaḥ
namaḥ śarvāya sarvāya ugrāya varadāya ca
- 19
नमो भीमाय सेनान्ये पशूनां पतये नमः
शुचये रेरिहाणाय सद्योजाताय वै नमः
namo bhīmāya senānye paśūnāṃ pataye namaḥ
śucaye rerihāṇāya sadyojātāya vai namaḥ
- 20
महादेवाय चित्राय नमश्चित्ररथाय च
प्रधानाय प्रमेयाय कार्याय करणाय च
mahādevāya citrāya namaścitrarathāya ca
pradhānāya prameyāya kāryāya karaṇāya ca
- 21
पुरुषाय नमस्ते ऽस्तु पुरुषेच्छाकराय च
नमः पुरुषसंयोगप्रधानगुणकारिणे
puruṣāya namaste 'stu puruṣecchākarāya ca
namaḥ puruṣasaṃyogapradhānaguṇakāriṇe
- 22
प्रवर्तकाय प्रकृतेः पुरुषस्य च सर्वशः
कृताकृतस्य संवेत्त्रे फलसंयोगदाय च
pravartakāya prakṛteḥ puruṣasya ca sarvaśaḥ
kṛtākṛtasya saṃvettre phalasaṃyogadāya ca
- 23
कालज्ञाय च सर्वत्र नमो नियमकारिणे
नमो वैषम्यकर्त्रे च गुणानां वृत्तिदाय च
kālajñāya ca sarvatra namo niyamakāriṇe
namo vaiṣamyakartre ca guṇānāṃ vṛttidāya ca
- 24
नमस्ते देवदेवेश नमस्ते भूतभावन
शिवः सौम्यः सुखो द्रष्टुं भव सोमो हि नः प्रभो
namaste devadeveśa namaste bhūtabhāvana
śivaḥ saumyaḥ sukho draṣṭuṃ bhava somo hi naḥ prabho
- 25
सनत्कुमार उवाच
एवं स भगवान्देवो जगत्पतिरुमापतिः
स्तूयमानः सुरैः सर्वैरमरानिदमब्रवीत्
sanatkumāra uvāca
evaṃ sa bhagavāndevo jagatpatirumāpatiḥ
stūyamānaḥ suraiḥ sarvairamarānidamabravīt
- 26
द्रष्टुं सुखश्च सौम्यश्च देवानामस्मि भो सुराः
वरं ब्रूत यथेष्टं च दातास्मि वदतानघाः
draṣṭuṃ sukhaśca saumyaśca devānāmasmi bho surāḥ
varaṃ brūta yatheṣṭaṃ ca dātāsmi vadatānaghāḥ
- 27
ततस्ते प्रणताः सर्वे ऊचुः सब्रह्मकाः सुराः
तवैव भगवन्हस्ते वर एषो ऽवतिष्ठताम्
यदा कार्यं तदा नस्त्वं दास्यसे वरमीप्सितम्
tataste praṇatāḥ sarve ūcuḥ sabrahmakāḥ surāḥ
tavaiva bhagavanhaste vara eṣo 'vatiṣṭhatām
yadā kāryaṃ tadā nastvaṃ dāsyase varamīpsitam
- 28
एवमस्त्विति तानुक्त्वा विसृज्य च सुरान्हरः
लोकांश्च प्रमथैः सार्धं विवेश भवनं ततः
evamastviti tānuktvā visṛjya ca surānharaḥ
lokāṃśca pramathaiḥ sārdhaṃ viveśa bhavanaṃ tataḥ
- 29
यस्तु हरोत्सवमद्भुतमेतं गायति दैवतविप्रसमक्षम्
सो ऽप्रतिरूपगणेशसमानो देहविपर्ययमेत्य सुखी स्यात्
yastu harotsavamadbhutametaṃ gāyati daivataviprasamakṣam
so 'pratirūpagaṇeśasamāno dehaviparyayametya sukhī syāt
- 30
सनत्कुमार उवाच
पाराशर्य स्तवं हीदं शृणुयाद्यः पठेत वा
स स्वर्गलोकगो देवैः पूज्यते ऽमरराडिव
sanatkumāra uvāca
pārāśarya stavaṃ hīdaṃ śṛṇuyādyaḥ paṭheta vā
sa svargalokago devaiḥ pūjyate 'mararāḍiva

