58 shlokas
- 1
सनत्कुमार उवाच
निर्गतो ऽथ ततो नन्दी जगाम सरितां वराम्
भुवनाम् इति विख्यातां सर्वलोकसुखावहाम्
sanatkumāra uvāca
nirgato 'tha tato nandī jagāma saritāṃ varām
bhuvanām iti vikhyātāṃ sarvalokasukhāvahām
- 2
तां प्रविश्य ततो धीमानेकाग्रो ह्रदमास्थितः
स जजाप तदा रुद्रान्मृत्योर्भीतः समाहितः
tāṃ praviśya tato dhīmānekāgro hradamāsthitaḥ
sa jajāpa tadā rudrānmṛtyorbhītaḥ samāhitaḥ
- 3
जपता तेन तत्रैव तत्परेण तदाशिषा
कोटिरेका यदा जप्ता तदा देवस्तुतोष ह
japatā tena tatraiva tatpareṇa tadāśiṣā
koṭirekā yadā japtā tadā devastutoṣa ha
- 4
तमागत्याह भगवाञ्छर्व उग्रः कपर्दिमान्
नन्दिंस्तुष्टो ऽस्मि भद्रं ते वरं वृणु यथेप्सितम्
tamāgatyāha bhagavāñcharva ugraḥ kapardimān
nandiṃstuṣṭo 'smi bhadraṃ te varaṃ vṛṇu yathepsitam
- 5
उवाच प्रणतो भूत्वा प्रणतार्तिहरं हरम्
द्वितीयां जप्तुमिच्छामि कोटिं भगवतां विभो
एवमस्त्विति देवो ऽपि प्रोच्यागच्छद्यथागतम्
uvāca praṇato bhūtvā praṇatārtiharaṃ haram
dvitīyāṃ japtumicchāmi koṭiṃ bhagavatāṃ vibho
evamastviti devo 'pi procyāgacchadyathāgatam
- 6
सनत्कुमार उवाच
सो ऽवतीर्य ततो भूयः प्रयतात्मा तथैव ह
जजाप कोटिमन्यां तु रुद्रमेवानुचिन्तयन्
sanatkumāra uvāca
so 'vatīrya tato bhūyaḥ prayatātmā tathaiva ha
jajāpa koṭimanyāṃ tu rudramevānucintayan
- 7
द्वितीयायां ततः कोट्यां सम्पूर्णायां वृषध्वजः
अभ्याजगाम तं चैव वरदो ऽस्मीत्यभाषत
dvitīyāyāṃ tataḥ koṭyāṃ sampūrṇāyāṃ vṛṣadhvajaḥ
abhyājagāma taṃ caiva varado 'smītyabhāṣata
- 8
स प्राह भगवन्कोटिं तृतीयामपि कालहन्
जप्तुमिच्छामि देवेश त्वत्प्रसादादहं विभो
sa prāha bhagavankoṭiṃ tṛtīyāmapi kālahan
japtumicchāmi deveśa tvatprasādādahaṃ vibho
- 9
एवमस्त्विति भूयो ऽपि भगवान्प्रत्युवाच ह
उक्त्वा जगाम स्वं वेश्म देव्या सह महाद्युतिः
evamastviti bhūyo 'pi bhagavānpratyuvāca ha
uktvā jagāma svaṃ veśma devyā saha mahādyutiḥ
- 10
ततस्तृतीयां रुद्राणां कोटिमन्यां जजाप ह
युगान्तादित्यसंकाशस्ततः समभवद्द्विजः
tatastṛtīyāṃ rudrāṇāṃ koṭimanyāṃ jajāpa ha
yugāntādityasaṃkāśastataḥ samabhavaddvijaḥ
- 11
तस्य कोटीत्रये व्यास समाप्ते ज्वलनत्विषः
सोमः सह गणैर्देवस्तं देशमुपचक्रमे
tasya koṭītraye vyāsa samāpte jvalanatviṣaḥ
somaḥ saha gaṇairdevastaṃ deśamupacakrame
- 12
स तं करेण संगृह्य उद्धृत्य सलिलाच्च ह
संमृजानो ऽग्रहस्तेन नन्दिनं कालहाब्रवीत्
sa taṃ kareṇa saṃgṛhya uddhṛtya salilācca ha
saṃmṛjāno 'grahastena nandinaṃ kālahābravīt
- 13
देव उवाच
शैलादे वरदो ऽहं ते तपसानेन तोषितः
साधु जप्तं त्वया धीमन्ब्रूहि यत्ते मनोगतम्
deva uvāca
śailāde varado 'haṃ te tapasānena toṣitaḥ
sādhu japtaṃ tvayā dhīmanbrūhi yatte manogatam
- 14
शैलादिरुवाच
जपेयं कोटिमन्यां तु भूयो ऽपि तव तेजसा
वरमेतं वृणे देव यदि तुष्टो ऽसि मे विभो
śailādiruvāca
japeyaṃ koṭimanyāṃ tu bhūyo 'pi tava tejasā
varametaṃ vṛṇe deva yadi tuṣṭo 'si me vibho
- 15
भगवानुवाच
किं ते जप्तेन भूयो ऽपि तुष्टो ऽस्मि तव सर्वथा
यद्यत्त्वं वृणुषे कामं सर्वं तत्प्रददानि ते
bhagavānuvāca
kiṃ te japtena bhūyo 'pi tuṣṭo 'smi tava sarvathā
yadyattvaṃ vṛṇuṣe kāmaṃ sarvaṃ tatpradadāni te
- 16
ब्रह्मत्वमथ विष्णुत्वम् इन्द्रत्वम् अथ वायुताम्
आदित्यो भव रुद्रो वा ब्रूहि किं वा ददानि ते
brahmatvamatha viṣṇutvam indratvam atha vāyutām
ādityo bhava rudro vā brūhi kiṃ vā dadāni te
- 17
सनत्कुमार उवाच
स एवमुक्तो देवेन शिरसा पादयोर्नतः
तुष्टाव पुरकामाङ्गक्रतुपर्वतनाशनम्
sanatkumāra uvāca
sa evamukto devena śirasā pādayornataḥ
tuṣṭāva purakāmāṅgakratuparvatanāśanam
- 18
नन्द्युवाच
नमो देवातिदेवाय महादेवाय वै नमः
नमः कामाङ्गनाशाय नीलकण्ठाय वै नमः
nandyuvāca
namo devātidevāya mahādevāya vai namaḥ
namaḥ kāmāṅganāśāya nīlakaṇṭhāya vai namaḥ
- 19
नमस्तुषितनाशाय त्रैलोक्यदहनाय च
नमः कालोग्रदण्डाय उग्रदण्डाय वै नमः
namastuṣitanāśāya trailokyadahanāya ca
namaḥ kālogradaṇḍāya ugradaṇḍāya vai namaḥ
- 20
नमो नीलशिखण्डाय सहस्रशिरसे नमः
सहस्रपाणये चैव सहस्रचरणाय च
namo nīlaśikhaṇḍāya sahasraśirase namaḥ
sahasrapāṇaye caiva sahasracaraṇāya ca
- 21
सर्वतःपाणिपादाय सर्वतोऽक्षिमुखाय च
सर्वतःश्रुतये चैव सर्वमावृत्य तिष्ठते
sarvataḥpāṇipādāya sarvato'kṣimukhāya ca
sarvataḥśrutaye caiva sarvamāvṛtya tiṣṭhate
- 22
नमस्ते रुक्मवर्णाय तथैवातीन्द्रियाय च
नमः कनकलिङ्गाय सर्वलिङ्गाय वै नमः
namaste rukmavarṇāya tathaivātīndriyāya ca
namaḥ kanakaliṅgāya sarvaliṅgāya vai namaḥ
- 23
नमश्चन्द्रार्कवर्णाय योगेशायाजिताय च
पिनाकपाणये चैव शूलमुद्गरपाणये
namaścandrārkavarṇāya yogeśāyājitāya ca
pinākapāṇaye caiva śūlamudgarapāṇaye
- 24
गदिने खड्गिने चैव परश्वधधराय च
रथिने वर्मिणे चैव महेष्वासाय वै नमः
gadine khaḍgine caiva paraśvadhadharāya ca
rathine varmiṇe caiva maheṣvāsāya vai namaḥ
- 25
नमस्त्रिशूलहस्ताय उग्रदण्डधराय च
नमो गणाधिपतये रुद्राणां पतये नमः
namastriśūlahastāya ugradaṇḍadharāya ca
namo gaṇādhipataye rudrāṇāṃ pataye namaḥ
- 26
नमः सहस्रनेत्राय शतनेत्राय वै नमः
आदित्यानां च पतये वसूनां पतये नमः
namaḥ sahasranetrāya śatanetrāya vai namaḥ
ādityānāṃ ca pataye vasūnāṃ pataye namaḥ
- 27
नमः पृथिव्याः पतये आकाशपतये नमः
नमः स्वर्लोकपतये उमायाः पतये नमः
namaḥ pṛthivyāḥ pataye ākāśapataye namaḥ
namaḥ svarlokapataye umāyāḥ pataye namaḥ
- 28
नमो योगाधिपतये सर्वयोगप्रदाय च
ध्यानिने ध्यायमानाय ध्यानिभिः संस्तुताय च
namo yogādhipataye sarvayogapradāya ca
dhyānine dhyāyamānāya dhyānibhiḥ saṃstutāya ca
- 29
मृत्यवे कालदण्डाय यमाय च महात्मने
देवाधिपतये चैव दिव्यसंहननाय च
mṛtyave kāladaṇḍāya yamāya ca mahātmane
devādhipataye caiva divyasaṃhananāya ca
- 30
यज्ञाय वसुदानाय स्वर्गायाजन्मदाय च
सवित्रे सर्वदेवानां धर्मायानेकरूपिणे
yajñāya vasudānāya svargāyājanmadāya ca
savitre sarvadevānāṃ dharmāyānekarūpiṇe

