65 shlokas
- 1
सनत्कुमार उवाच
ते गणेशा महासत्त्वाः सर्वे देवेश्वरेश्वराः
प्रणम्य देवं देवीं च इदं वचनमब्रुवन्
sanatkumāra uvāca
te gaṇeśā mahāsattvāḥ sarve deveśvareśvarāḥ
praṇamya devaṃ devīṃ ca idaṃ vacanamabruvan
- 2
भगवन्देवतारिघ्न देवदेवाम्बिकापते
किमर्थं वयमाहूता आज्ञापय कृतं हि तत्
bhagavandevatārighna devadevāmbikāpate
kimarthaṃ vayamāhūtā ājñāpaya kṛtaṃ hi tat
- 3
किं सागराञ्छोषयामो यमं वा सह किंकरैः
हन्मो मृत्युमुतामृत्युर्न भवत्वद्य पद्मजः
kiṃ sāgarāñchoṣayāmo yamaṃ vā saha kiṃkaraiḥ
hanmo mṛtyumutāmṛtyurna bhavatvadya padmajaḥ
- 4
बद्ध्वेन्द्रं सह देवैश्च सविष्णुं सह वायुना
आनयामः सुसंक्रुद्धा दैत्यान्वा सह दानवैः
baddhvendraṃ saha devaiśca saviṣṇuṃ saha vāyunā
ānayāmaḥ susaṃkruddhā daityānvā saha dānavaiḥ
- 5
कस्याद्य व्यसनं घोरं करिष्यामस्तवाज्ञया
कस्य वाद्योत्सवं देव सर्वकामसमृद्धिमत्
kasyādya vyasanaṃ ghoraṃ kariṣyāmastavājñayā
kasya vādyotsavaṃ deva sarvakāmasamṛddhimat
- 6
तांस्तथावादिनः सर्वान्नमतो भक्तवत्सलः
उवाच देवः सम्पूज्य गणान्गणपतिर्भवः
tāṃstathāvādinaḥ sarvānnamato bhaktavatsalaḥ
uvāca devaḥ sampūjya gaṇāngaṇapatirbhavaḥ
- 7
देव उवाच
शृणुध्वं यत्कृते यूयमिहाहूता जगद्धिताः
श्रुत्वा च प्रयतात्मानः कुरुध्वं तदशङ्किताः
deva uvāca
śṛṇudhvaṃ yatkṛte yūyamihāhūtā jagaddhitāḥ
śrutvā ca prayatātmānaḥ kurudhvaṃ tadaśaṅkitāḥ
- 8
नन्दीश्वरो ऽयं पुत्रो नः सर्वेषामीश्वरेश्वरः
प्रियो ऽग्रनायकश्चैव सेनानीर्वः समाहितः
nandīśvaro 'yaṃ putro naḥ sarveṣāmīśvareśvaraḥ
priyo 'granāyakaścaiva senānīrvaḥ samāhitaḥ
- 9
तमिमं मम संदेशाद्यूयं सर्वे ऽभिसंमताः
सेनान्यम् अभिषिञ्चध्वं महायोगपतिं पतिम्
tamimaṃ mama saṃdeśādyūyaṃ sarve 'bhisaṃmatāḥ
senānyam abhiṣiñcadhvaṃ mahāyogapatiṃ patim
- 10
अद्यप्रभृति युष्माकमयं नन्दीश्वरः शुभः
प्रियो गौरवयुक्तश्च सेनानीर् अमरः प्रभुः
adyaprabhṛti yuṣmākamayaṃ nandīśvaraḥ śubhaḥ
priyo gauravayuktaśca senānīr amaraḥ prabhuḥ
- 11
सनत्कुमार उवाच
एवमुक्ते भगवता गणपाः सर्व एव ते
एवमस्त्विति संमन्त्र्य सम्भारानाहरंस्ततः
sanatkumāra uvāca
evamukte bhagavatā gaṇapāḥ sarva eva te
evamastviti saṃmantrya sambhārānāharaṃstataḥ
- 12
तस्य रूपाश्रयं दिव्यं जाम्बूनदमयं शुभम्
आसनं मेरुसंकाशं मनोरममथाहरन्
tasya rūpāśrayaṃ divyaṃ jāmbūnadamayaṃ śubham
āsanaṃ merusaṃkāśaṃ manoramamathāharan
- 13
शातकुम्भमयं चापि चारुचामीकरप्रभम्
मुक्तादामावलम्बं च मणिरत्नावभासितम्
śātakumbhamayaṃ cāpi cārucāmīkaraprabham
muktādāmāvalambaṃ ca maṇiratnāvabhāsitam
- 14
स्तम्भैश्च वैडूर्यमयैः किङ्किणीजालसंवृतम्
चारुरत्नकसंयुक्तं मण्डपं विश्वतोमुखम्
कृत्वा चक्रुश्च तन्मध्ये तदासनवरं शुभम्
stambhaiśca vaiḍūryamayaiḥ kiṅkiṇījālasaṃvṛtam
cāruratnakasaṃyuktaṃ maṇḍapaṃ viśvatomukham
kṛtvā cakruśca tanmadhye tadāsanavaraṃ śubham
- 15
तस्याग्रतः पादपीठं नीलं वज्रावभासितम्
चक्रुः पादप्रतिष्ठार्थं कलशौ चास्य पार्श्वगौ
सम्पूर्णौ परमाम्भोभिररविन्दावृताननौ
tasyāgrataḥ pādapīṭhaṃ nīlaṃ vajrāvabhāsitam
cakruḥ pādapratiṣṭhārthaṃ kalaśau cāsya pārśvagau
sampūrṇau paramāmbhobhiraravindāvṛtānanau
- 16
अग्रतो ऽग्निं समाधाय वृषभं चापि पार्श्वतः
सवत्सां सुरभिं चापि तस्य पार्श्वे ऽथ दक्षिणे
agrato 'gniṃ samādhāya vṛṣabhaṃ cāpi pārśvataḥ
savatsāṃ surabhiṃ cāpi tasya pārśve 'tha dakṣiṇe
- 17
छत्त्रं शतशलाकं च जाम्बूनदमयं शुभम्
शङ्खहाराम्बुगौरेण पृष्ठेनाभिविराजितम्
chattraṃ śataśalākaṃ ca jāmbūnadamayaṃ śubham
śaṅkhahārāmbugaureṇa pṛṣṭhenābhivirājitam
- 18
व्यजनं चन्द्रशुभ्रं च हेमदण्डं सुचारुमत्
मालां कुशेशयानां च भ्रमरावलिसेविताम्
vyajanaṃ candraśubhraṃ ca hemadaṇḍaṃ sucārumat
mālāṃ kuśeśayānāṃ ca bhramarāvalisevitām
- 19
आनिन्युस्तत्र गणपा नन्द्यावर्तांश्च काञ्चनान्
पुनर्वसुं च पुष्यं च द्वौ मत्स्यौ वरुणालयौ
āninyustatra gaṇapā nandyāvartāṃśca kāñcanān
punarvasuṃ ca puṣyaṃ ca dvau matsyau varuṇālayau
- 20
स्वस्तिकं वर्धमानं च श्रीवत्सं चैव काञ्चनम्
कीचका वेणवश्चैव कन्या चैवाभिपूजिता
svastikaṃ vardhamānaṃ ca śrīvatsaṃ caiva kāñcanam
kīcakā veṇavaścaiva kanyā caivābhipūjitā
- 21
ऐरावतं सुप्रतीकं गजाव् एतौ च पूजितौ
ध्वजं च पूजितं दिव्यं शङ्खं चैवेन्दुवर्चसम्
airāvataṃ supratīkaṃ gajāv etau ca pūjitau
dhvajaṃ ca pūjitaṃ divyaṃ śaṅkhaṃ caivenduvarcasam
- 22
कलशानां सहस्रं च काञ्चनानां सुवर्चसाम्
राजतानां सहस्रं च पार्थिवानां तथैव च
kalaśānāṃ sahasraṃ ca kāñcanānāṃ suvarcasām
rājatānāṃ sahasraṃ ca pārthivānāṃ tathaiva ca
- 23
ताम्राणामथ दिव्यानां सहस्रमनलत्विषाम्
वासोयुगं वृक्षजं च विरजः सूक्ष्ममेव च
tāmrāṇāmatha divyānāṃ sahasramanalatviṣām
vāsoyugaṃ vṛkṣajaṃ ca virajaḥ sūkṣmameva ca
- 24
मुकुटं काञ्चनं चैव सुकृतं विश्वकर्मणा
कुण्डले चामले दिव्ये वज्रं चैव वरायुधम्
mukuṭaṃ kāñcanaṃ caiva sukṛtaṃ viśvakarmaṇā
kuṇḍale cāmale divye vajraṃ caiva varāyudham
- 25
पट्टिसं च महद्दिव्यं शूलं चाशनिमेव च
जाम्बूनदमयं सूत्रं केयूरद्वयमेव च
paṭṭisaṃ ca mahaddivyaṃ śūlaṃ cāśanimeva ca
jāmbūnadamayaṃ sūtraṃ keyūradvayameva ca
- 26
हारं च मणिचित्राङ्गं रोचनारुचकं तथा
नलभां पारियात्रं च वर्षं कङ्कणिम् एव च
hāraṃ ca maṇicitrāṅgaṃ rocanārucakaṃ tathā
nalabhāṃ pāriyātraṃ ca varṣaṃ kaṅkaṇim eva ca
- 27
दर्भांश्च दिव्यां समिधमाज्यं धूपमथापि च
समन्तान्निन्युरव्यग्रा गणपा देवसंमताः
darbhāṃśca divyāṃ samidhamājyaṃ dhūpamathāpi ca
samantānninyuravyagrā gaṇapā devasaṃmatāḥ
- 28
ततो दिशः समुद्राश्च वरुणः सधनेश्वरः
यमो ऽग्निर्वसवश्चैव चन्द्रादित्यौ ग्रहैः सह
tato diśaḥ samudrāśca varuṇaḥ sadhaneśvaraḥ
yamo 'gnirvasavaścaiva candrādityau grahaiḥ saha
- 29
तारारूपाणि सर्वाणि नक्षत्राणि ध्रुवस्तथा
रुद्रा रक्षांसि यक्षाश्च अश्विनौ दैत्यदानवाः
tārārūpāṇi sarvāṇi nakṣatrāṇi dhruvastathā
rudrā rakṣāṃsi yakṣāśca aśvinau daityadānavāḥ
- 30
गन्धर्वाप्सरसश्चैव नारदः पर्वतस्तथा
पृथिवी च समुद्राश्च वर्षाणि गिरयस्तथा
gandharvāpsarasaścaiva nāradaḥ parvatastathā
pṛthivī ca samudrāśca varṣāṇi girayastathā

