29 shlokas
- 1
सनत्कुमार उवाच
प्रपद्ये देवमीशानं सर्वज्ञमपराजितम्
महादेवं महात्मानं विश्वस्य जगतः पतिम्
sanatkumāra uvāca
prapadye devamīśānaṃ sarvajñamaparājitam
mahādevaṃ mahātmānaṃ viśvasya jagataḥ patim
- 2
शक्तिरप्रतिघा यस्य ऐश्वर्यं चैव सर्वशः
स्वामित्वं च विभुत्वं च स्वकृतानि प्रचक्षते
śaktirapratighā yasya aiśvaryaṃ caiva sarvaśaḥ
svāmitvaṃ ca vibhutvaṃ ca svakṛtāni pracakṣate
- 3
तस्मै देवाय सोमाय प्रणम्य प्रयतः शुचिः
पुराणाख्यानजिज्ञासोर्वक्ष्ये स्कन्दोद्भवं शुभम्
tasmai devāya somāya praṇamya prayataḥ śuciḥ
purāṇākhyānajijñāsorvakṣye skandodbhavaṃ śubham
- 4
देहावतारो देवस्य रुद्रस्य परमात्मनः
प्राजापत्याभिषेकश्च हरणं शिरसस्तथा
dehāvatāro devasya rudrasya paramātmanaḥ
prājāpatyābhiṣekaśca haraṇaṃ śirasastathā
- 5
दर्शनं षट्कुलीयानां चक्रस्य च विसर्जनम्
नैमिषस्योद्भवश्चैव सत्त्रस्य च समापनम्
darśanaṃ ṣaṭkulīyānāṃ cakrasya ca visarjanam
naimiṣasyodbhavaścaiva sattrasya ca samāpanam
- 6
ब्रह्मणश्चागमस्तत्र तपसश्चरणं तथा
शर्वस्य दर्शनं चैव देव्याश्चैव समुद्भवः
brahmaṇaścāgamastatra tapasaścaraṇaṃ tathā
śarvasya darśanaṃ caiva devyāścaiva samudbhavaḥ
- 7
सत्या विवादश्च तथा दक्षशापस्तथैव च
मेनायां च यथोत्पत्तिर्यथा देव्याः स्वयंवरम्
satyā vivādaśca tathā dakṣaśāpastathaiva ca
menāyāṃ ca yathotpattiryathā devyāḥ svayaṃvaram
- 8
देवानां वरदानं च वसिष्ठस्य च धीमतः
पराशरस्य चोत्पत्तिर्व्यासस्य च महात्मनः
devānāṃ varadānaṃ ca vasiṣṭhasya ca dhīmataḥ
parāśarasya cotpattirvyāsasya ca mahātmanaḥ
- 9
वसिष्ठकौशिकाभ्यां च वैरोद्भवसमापनम्
वाराणस्याश्च शून्यत्वं क्षेत्रमाहात्म्यवर्णनम्
vasiṣṭhakauśikābhyāṃ ca vairodbhavasamāpanam
vārāṇasyāśca śūnyatvaṃ kṣetramāhātmyavarṇanam
- 10
रुद्रस्य चात्र सांनिध्यं नन्दिनश्चाप्यनुग्रहः
गणानां दर्शनं चैव कथनं चाप्यशेषतः
rudrasya cātra sāṃnidhyaṃ nandinaścāpyanugrahaḥ
gaṇānāṃ darśanaṃ caiva kathanaṃ cāpyaśeṣataḥ
- 11
कालीव्याहरणं चैव तपश्चरणमेव च
सोमनन्दिसमाख्यानं वरदानं तथैव च
kālīvyāharaṇaṃ caiva tapaścaraṇameva ca
somanandisamākhyānaṃ varadānaṃ tathaiva ca
- 12
गौरीत्वं पुत्रलम्भश्च देव्या उत्पत्तिरेव च
कौशिक्या भूतमातृत्वं सिंहाश्च रथिनस्तथा
gaurītvaṃ putralambhaśca devyā utpattireva ca
kauśikyā bhūtamātṛtvaṃ siṃhāśca rathinastathā
- 13
गौर्याश्च निलयो विन्ध्ये विन्ध्यसूर्यसमागमः
अगस्त्यस्य च माहात्म्यं वधः सुन्दनिसुन्दयोः
gauryāśca nilayo vindhye vindhyasūryasamāgamaḥ
agastyasya ca māhātmyaṃ vadhaḥ sundanisundayoḥ
- 14
निसुम्भसुम्भनिर्याणं महिषस्य वधस्तथा
अभिषेकश्च कौशिक्या वरदानम् अथापि च
nisumbhasumbhaniryāṇaṃ mahiṣasya vadhastathā
abhiṣekaśca kauśikyā varadānam athāpi ca
- 15
अन्धकस्य तथोत्पत्तिः पृथिव्याश्चैव बन्धनम्
हिरण्याक्षवधश्चैव हिरण्यकशिपोस्तथा
andhakasya tathotpattiḥ pṛthivyāścaiva bandhanam
hiraṇyākṣavadhaścaiva hiraṇyakaśipostathā
- 16
बलिसंयमनं चैव देव्याः समय एव च
देवानां गमनं चैव अग्नेर्दूतत्वमेव च
balisaṃyamanaṃ caiva devyāḥ samaya eva ca
devānāṃ gamanaṃ caiva agnerdūtatvameva ca
- 17
देवानां वरदानं च शुक्रस्य च विसर्जनम्
सुतस्य च तथोत्पत्तिर्देव्याश्चान्धकदर्शनम्
devānāṃ varadānaṃ ca śukrasya ca visarjanam
sutasya ca tathotpattirdevyāścāndhakadarśanam
- 18
शैलादिदैत्यसम्मर्दो देव्याश्च शतरूपता
आर्यावरप्रदानं च शैलादिस्तव एव च
śailādidaityasammardo devyāśca śatarūpatā
āryāvarapradānaṃ ca śailādistava eva ca
- 19
देवस्यागमनं चैव वृत्तस्य कथनं तथा
पतिव्रतायाश्चाख्यानं गुरुशुश्रूषणस्य च
devasyāgamanaṃ caiva vṛttasya kathanaṃ tathā
pativratāyāścākhyānaṃ guruśuśrūṣaṇasya ca
- 20
आख्यानं पञ्चचूडायास्तेजसश्चाप्यधृष्यता
दूतस्यागमनं चैव संवादो ऽथ विसर्जनम्
ākhyānaṃ pañcacūḍāyāstejasaścāpyadhṛṣyatā
dūtasyāgamanaṃ caiva saṃvādo 'tha visarjanam
- 21
अन्धकासुरसंवादो मन्दरागमनं तथा
गणानामागमश्चैव संख्यानश्रवणं तथा
andhakāsurasaṃvādo mandarāgamanaṃ tathā
gaṇānāmāgamaścaiva saṃkhyānaśravaṇaṃ tathā
- 22
निग्रहश्चान्धकस्याथ युद्धेन महता तथा
शरीरार्धप्रदानं च अशोकसुतसंग्रहः
nigrahaścāndhakasyātha yuddhena mahatā tathā
śarīrārdhapradānaṃ ca aśokasutasaṃgrahaḥ
- 23
भस्मसोमोद्भवश्चैव श्मशानवसतिस्तथा
रुद्रस्य नीलकण्ठत्वं तथायतनवर्णनम्
bhasmasomodbhavaścaiva śmaśānavasatistathā
rudrasya nīlakaṇṭhatvaṃ tathāyatanavarṇanam
- 24
उत्पत्तिर्यक्षराजस्य कुबेरस्य च धीमतः
निग्रहो भुजगेन्द्राणां शिखरस्य च पातनम्
utpattiryakṣarājasya kuberasya ca dhīmataḥ
nigraho bhujagendrāṇāṃ śikharasya ca pātanam
- 25
त्रैलोक्यस्य सशक्रस्य वशीकरणमेव च
देवसेनाप्रदानं च सेनापत्याभिषेचनम्
trailokyasya saśakrasya vaśīkaraṇameva ca
devasenāpradānaṃ ca senāpatyābhiṣecanam
- 26
नारदस्यागमश्चैव तारकप्रेषितस्य ह
वधश्च तारकस्योग्रो यात्रा भद्रवटस्य च
nāradasyāgamaścaiva tārakapreṣitasya ha
vadhaśca tārakasyogro yātrā bhadravaṭasya ca
- 27
महिषस्य वधश्चैव क्रौञ्चस्य च निबर्हणम्
शक्तेरुद्धरणं चैव तारकस्य वधः शुभः
mahiṣasya vadhaścaiva krauñcasya ca nibarhaṇam
śakteruddharaṇaṃ caiva tārakasya vadhaḥ śubhaḥ
- 28
देवासुरभयोत्पत्तिस्त्रैपुरं युद्धमेव च
प्रह्लादविग्रहश्चैव कृतघ्नाख्यानमेव च
महाभाग्यं ब्राह्मणानां विस्तरेण प्रकीर्त्यते
devāsurabhayotpattistraipuraṃ yuddhameva ca
prahlādavigrahaścaiva kṛtaghnākhyānameva ca
mahābhāgyaṃ brāhmaṇānāṃ vistareṇa prakīrtyate
- 29
एतज्ज्ञात्वा यथावद्धि कुमारानुचरो भवेत्
बलवान्मतिसम्पन्नः पुत्रं चाप्नोति संमतम्
etajjñātvā yathāvaddhi kumārānucaro bhavet
balavānmatisampannaḥ putraṃ cāpnoti saṃmatam

