59 shlokas
- 1
सनत्कुमार उवाच
ततस्तत्रागतान्देवान्देवताधिपतिर्भवः
मरुतः प्राह सम्पूज्य कन्यार्थं सदसत्पतिः
sanatkumāra uvāca
tatastatrāgatāndevāndevatādhipatirbhavaḥ
marutaḥ prāha sampūjya kanyārthaṃ sadasatpatiḥ
- 2
मरुतो ये महावेगा महासत्त्वा महौजसः
आमन्त्र्य नाम्ना तानीशः सशक्रः सपितामहः
maruto ye mahāvegā mahāsattvā mahaujasaḥ
āmantrya nāmnā tānīśaḥ saśakraḥ sapitāmahaḥ
- 3
युष्माकं सुयशा कन्या सुभगा दिव्यरूपिणी
दातुमर्हथ तां सुभ्रूं स्नुषां मह्यं महाबलाः
yuṣmākaṃ suyaśā kanyā subhagā divyarūpiṇī
dātumarhatha tāṃ subhrūṃ snuṣāṃ mahyaṃ mahābalāḥ
- 4
मरुत ऊचुः
त्वमस्माकं च तस्याश्च सर्वस्य जगतस्तथा
प्रभविष्णुस्त्रिलोकेश न तु याचितुमर्हसि
maruta ūcuḥ
tvamasmākaṃ ca tasyāśca sarvasya jagatastathā
prabhaviṣṇustrilokeśa na tu yācitumarhasi
- 5
त्वयैव देया ग्राह्या च त्वं नो गतिरनुत्तमा
मा नः परानिवेशान याचनेन विभावय
tvayaiva deyā grāhyā ca tvaṃ no gatiranuttamā
mā naḥ parāniveśāna yācanena vibhāvaya
- 6
पिता नः कश्यपः श्रीमान्मरीचिश्च पितामहः
पितामहपिता ब्रह्मा तस्यापि त्वं पितामहः
स त्वं पितामहो ऽस्माकं न परान्कर्तुमर्हसि
pitā naḥ kaśyapaḥ śrīmānmarīciśca pitāmahaḥ
pitāmahapitā brahmā tasyāpi tvaṃ pitāmahaḥ
sa tvaṃ pitāmaho 'smākaṃ na parānkartumarhasi
- 7
स एवमुक्तो देवेशो मरुद्भिर्देवसत्तमैः
सुयशां मरुतां कन्यामानयामास तत्क्षणात्
sa evamukto deveśo marudbhirdevasattamaiḥ
suyaśāṃ marutāṃ kanyāmānayāmāsa tatkṣaṇāt
- 8
स्वयं होतास्य तत्रासीद्ब्रह्मा लोकपितामहः
कश्यपश्च तथोद्गाता अत्रिः साम स्वयं जगौ
अथर्वाङ्गिरसौ देवौ ब्रह्मत्वमपि चक्रतुः
svayaṃ hotāsya tatrāsīdbrahmā lokapitāmahaḥ
kaśyapaśca tathodgātā atriḥ sāma svayaṃ jagau
atharvāṅgirasau devau brahmatvamapi cakratuḥ
- 9
नारदः पर्वतश्चैव चित्रसेनश्च गायनः
विश्वावसू रुचिश्चैव हाहा हूहू तथैव च
nāradaḥ parvataścaiva citrasenaśca gāyanaḥ
viśvāvasū ruciścaiva hāhā hūhū tathaiva ca
- 10
तथा शालिशिरा यश्च विश्रुतो गण्डमण्डकः
ईतिश्चैवेन्द्रवाहश्च यज्ञवाहो ऽथ दक्षिणः
एते चान्ये च गन्धर्वा जगुर्मधुरकण्ठिनः
tathā śāliśirā yaśca viśruto gaṇḍamaṇḍakaḥ
ītiścaivendravāhaśca yajñavāho 'tha dakṣiṇaḥ
ete cānye ca gandharvā jagurmadhurakaṇṭhinaḥ
- 11
उर्वशी चैव रम्भा च घृताची पूर्वचित्त्यपि
तिलोत्तमा च विश्वाची अन्याश्चाप्सरसः शुभाः
अनृत्यन्त महाभागा नृत्तं सुरमनोहरम्
urvaśī caiva rambhā ca ghṛtācī pūrvacittyapi
tilottamā ca viśvācī anyāścāpsarasaḥ śubhāḥ
anṛtyanta mahābhāgā nṛttaṃ suramanoharam
- 12
सनत्कुमार उवाच
स एवमभवद्व्यास विवाहस्तस्य धीमतः
नन्दिनो गणमुख्यस्य अनौपम्यो ह्य् अनिन्दितः
sanatkumāra uvāca
sa evamabhavadvyāsa vivāhastasya dhīmataḥ
nandino gaṇamukhyasya anaupamyo hy aninditaḥ
- 13
ततः स तु कृतोद्वाहो नन्दी गत्वा महामनाः
पादान्ववन्दे देवस्य देव्या ब्रह्मण एव च
शिलादस्य च लोकेशः श्रिया परमया युतः
tataḥ sa tu kṛtodvāho nandī gatvā mahāmanāḥ
pādānvavande devasya devyā brahmaṇa eva ca
śilādasya ca lokeśaḥ śriyā paramayā yutaḥ
- 14
देव उवाच
वरं वृणीष्व पुत्र त्वं स्नुषा चेयं तव प्रिया
वरं ददामि ते वत्स अनया सहमीप्सितम्
deva uvāca
varaṃ vṛṇīṣva putra tvaṃ snuṣā ceyaṃ tava priyā
varaṃ dadāmi te vatsa anayā sahamīpsitam
- 15
नन्द्युवाच
भगवन्यदि तुष्टो ऽसि त्वयि भक्तिर्दृढास्तु मे
सदा च तुष्टो भव मे साम्बः सह गणेश्वरैः
nandyuvāca
bhagavanyadi tuṣṭo 'si tvayi bhaktirdṛḍhāstu me
sadā ca tuṣṭo bhava me sāmbaḥ saha gaṇeśvaraiḥ
- 16
पितरं चैव मे देव उत्पादकम् इमं प्रभो
अनुग्रहेण युक्तेन योक्तुमर्हसि कामद
pitaraṃ caiva me deva utpādakam imaṃ prabho
anugraheṇa yuktena yoktumarhasi kāmada
- 17
देव उवाच
सदाहं तव नन्दीश सुतुष्टः सगणेश्वरः
पार्वत्या सहितो धीमन्न् इदं च शृणु मे वचः
deva uvāca
sadāhaṃ tava nandīśa sutuṣṭaḥ sagaṇeśvaraḥ
pārvatyā sahito dhīmann idaṃ ca śṛṇu me vacaḥ
- 18
सदेष्टश्च वरिष्ठश्च परमैश्वर्यसंयुतः
महायोगी महेष्वासो महाबलपराक्रमः
sadeṣṭaśca variṣṭhaśca paramaiśvaryasaṃyutaḥ
mahāyogī maheṣvāso mahābalaparākramaḥ
- 19
अजय्यश्चैव जेता च पूज्येज्यश्च सदा भव
अहं यत्र भवांस्तत्र यत्र त्वं तत्र चाप्यहम्
ajayyaścaiva jetā ca pūjyejyaśca sadā bhava
ahaṃ yatra bhavāṃstatra yatra tvaṃ tatra cāpyaham
- 20
अयं च ते पिता विप्रः परमैश्वर्यसंयुतः
भविष्यति गणाध्यक्षो महागणपतिर्मम
ayaṃ ca te pitā vipraḥ paramaiśvaryasaṃyutaḥ
bhaviṣyati gaṇādhyakṣo mahāgaṇapatirmama
- 21
पर्वतं चास्य वैभ्राजं कामगं सर्वकाञ्चनम्
उपेतं भवनैर्दिव्यैः प्रयच्छामि जनावृतम्
तेनायं सर्वलोकेषु चरिष्यति यथेप्सितम्
parvataṃ cāsya vaibhrājaṃ kāmagaṃ sarvakāñcanam
upetaṃ bhavanairdivyaiḥ prayacchāmi janāvṛtam
tenāyaṃ sarvalokeṣu cariṣyati yathepsitam
- 22
स्थानं श्रीपर्वते चास्य भविष्यति सुपूजितम्
भृगौ तस्मिंश्च यः प्राणांस्त्यक्ष्यते वै सुधार्मिकः
स कामचारी वैभ्राजे गणपो ऽस्य भविष्यति
sthānaṃ śrīparvate cāsya bhaviṣyati supūjitam
bhṛgau tasmiṃśca yaḥ prāṇāṃstyakṣyate vai sudhārmikaḥ
sa kāmacārī vaibhrāje gaṇapo 'sya bhaviṣyati
- 23
सनत्कुमार उवाच
ततो देवी महाभागा शैलादेरददद्वरम्
सो ऽब्रवीत्त्वयि भक्तिर्मे सदैवानपगा भवेत्
sanatkumāra uvāca
tato devī mahābhāgā śailāderadadadvaram
so 'bravīttvayi bhaktirme sadaivānapagā bhavet
- 24
ततो मरुत्सुता चैव उभाभ्यामपि चोदिता
वरं वृणु यथेष्टं वै ताव् इदं प्रत्युवाच ह
tato marutsutā caiva ubhābhyāmapi coditā
varaṃ vṛṇu yatheṣṭaṃ vai tāv idaṃ pratyuvāca ha
- 25
युवयोरस्तु भक्तिर्मे तथा भर्तरि चैव हि
नित्यं चानपगा स्यान्मे धर्मे च मतिरुत्तमा
एतदिच्छामि देवेशौ वरं वरसहस्रदौ
yuvayorastu bhaktirme tathā bhartari caiva hi
nityaṃ cānapagā syānme dharme ca matiruttamā
etadicchāmi deveśau varaṃ varasahasradau
- 26
सनत्कुमार उवाच
ततस्ताव् एवमेतत्ते भवितेति शुचिस्मिते
ऊचतुर्मुदितौ देवौ स्नुषां तां वरवर्णिनीम्
sanatkumāra uvāca
tatastāv evametatte bhaviteti śucismite
ūcaturmuditau devau snuṣāṃ tāṃ varavarṇinīm
- 27
गणाश्चास्य ततो ऽभ्येत्य सर्वे देवप्रियेप्सया
वरं ददुर्महासत्त्वाः स वव्रे काञ्चनप्रभः
gaṇāścāsya tato 'bhyetya sarve devapriyepsayā
varaṃ dadurmahāsattvāḥ sa vavre kāñcanaprabhaḥ
- 28
युष्मासु मम भक्तिश्च ऐश्वर्यं चापि संमतम्
वश्याश्च यूयं सर्वे मे प्रियो युष्माकमेव च
yuṣmāsu mama bhaktiśca aiśvaryaṃ cāpi saṃmatam
vaśyāśca yūyaṃ sarve me priyo yuṣmākameva ca
- 29
गणा ऊचुः
भवान्मन्तानुमन्ता च गतिरागतिरेव च
अस्माकमीशः सर्वेषां देवानामपि चेश्वरः
gaṇā ūcuḥ
bhavānmantānumantā ca gatirāgatireva ca
asmākamīśaḥ sarveṣāṃ devānāmapi ceśvaraḥ
- 30
कुष्माण्डानां वरिष्ठश्च रुद्राणां त्वं महाबलः
ईतीनां द्वारपालश्च प्रमथानां तथैव च
kuṣmāṇḍānāṃ variṣṭhaśca rudrāṇāṃ tvaṃ mahābalaḥ
ītīnāṃ dvārapālaśca pramathānāṃ tathaiva ca

