17 shlokas
- 1
नारद उवाच
रामः पम्पासरो गत्वा शोचन्स शर्वरीं ततः
हनूमता स सुग्रीवं नीतो मित्रं चकार ह
nārada uvāca
rāmaḥ pampāsaro gatvā śocansa śarvarīṃ tataḥ
hanūmatā sa sugrīvaṃ nīto mitraṃ cakāra ha
- 2
सप्त तालान्विनिर्भिद्य शरेणैकेन पश्यतः
पादेन दुन्दुभेः कायं चिक्षेप दशयोजनं
sapta tālānvinirbhidya śareṇaikena paśyataḥ
pādena dundubheḥ kāyaṃ cikṣepa daśayojanaṃ
- 3
तद्रिपुं वालिनं हत्वा भ्रातरं वैरकारिणम्
किष्किन्धां कपिराज्यं च रुमां तारां समर्पयत्
tadripuṃ vālinaṃ hatvā bhrātaraṃ vairakāriṇam
kiṣkindhāṃ kapirājyaṃ ca rumāṃ tārāṃ samarpayat
- 4
ऋष्यमूके हरीशाय किष्किन्धेशो ऽब्रवीत्स च
सीतां त्वं प्राश्यसे यद्वत्तथा राम करोमि ते
ṛṣyamūke harīśāya kiṣkindheśo 'bravītsa ca
sītāṃ tvaṃ prāśyase yadvattathā rāma karomi te
- 5
तच्छ्रुत्वा माल्यवत्पृष्ठे चातुर्मास्यं चकार सः
किष्किन्धायां च सुग्रीवो यदा नायाति दर्शनं
tacchrutvā mālyavatpṛṣṭhe cāturmāsyaṃ cakāra saḥ
kiṣkindhāyāṃ ca sugrīvo yadā nāyāti darśanaṃ
- 6
तदाब्रवीत्तं रामोक्तं लक्ष्मणो व्रज राघवम्
न स संकुचितः पन्था येन वाली हतो गतः
tadābravīttaṃ rāmoktaṃ lakṣmaṇo vraja rāghavam
na sa saṃkucitaḥ panthā yena vālī hato gataḥ
- 7
समये तिष्ठ सुग्रीव मा वालिपथम् अन्वगाः
सुग्रीव आह संसक्तो गतं कालं न बुद्धवान्
samaye tiṣṭha sugrīva mā vālipatham anvagāḥ
sugrīva āha saṃsakto gataṃ kālaṃ na buddhavān
- 8
इत्युक्त्वा स गतो रामं नत्वोवाच हरीश्वरः
आनीता वानराः सर्वे सीतायाश्च गवेषणे
ityuktvā sa gato rāmaṃ natvovāca harīśvaraḥ
ānītā vānarāḥ sarve sītāyāśca gaveṣaṇe
- 9
त्वन्मतात्प्रेषयिष्यामि विचिन्वन्तु च जानकीम्
पूर्वादौ मासमायान्तु मासादूर्ध्वं निहन्मि तान्
tvanmatātpreṣayiṣyāmi vicinvantu ca jānakīm
pūrvādau māsamāyāntu māsādūrdhvaṃ nihanmi tān
- 10
इत्युक्ता वानराः पूर्वपश्चिमोत्तरमार्गगाः
जग्मू रामं ससुग्रीवम् अपश्यन्तस्तु जानकीम्
ityuktā vānarāḥ pūrvapaścimottaramārgagāḥ
jagmū rāmaṃ sasugrīvam apaśyantastu jānakīm
- 11
रामाङ्गुलीयं संगृह्य हनूमान्वानरैः सह
दक्षिणे मार्गयामास सुप्रभाया गुहान्तिके
rāmāṅgulīyaṃ saṃgṛhya hanūmānvānaraiḥ saha
dakṣiṇe mārgayāmāsa suprabhāyā guhāntike
- 12
मासाद् ऊर्ध्वं च विन्यस्ता अपश्यन्तस्तु जानकीम्
ऊचुर्वृथा मरिष्यामो जटायुर्धन्य एव सः
māsād ūrdhvaṃ ca vinyastā apaśyantastu jānakīm
ūcurvṛthā mariṣyāmo jaṭāyurdhanya eva saḥ
- 13
सीतार्थे यो ऽत्यजत्प्राणान्रावणेन हतो रणे
तच्छ्रुत्वा प्राह सम्पातिर्विहाय कपिभक्षणं
sītārthe yo 'tyajatprāṇānrāvaṇena hato raṇe
tacchrutvā prāha sampātirvihāya kapibhakṣaṇaṃ
- 14
भ्रातासौ मे जटायुर्वै मयोड्डीनो ऽर्कमण्डलम्
अर्कतापाद्रक्षितो ऽगात्दग्धपक्षो ऽहम् अभ्रगः
bhrātāsau me jaṭāyurvai mayoḍḍīno 'rkamaṇḍalam
arkatāpādrakṣito 'gātdagdhapakṣo 'ham abhragaḥ
- 15
रामवार्ताश्रवात्पक्षौ जातौ भूयो ऽथ जानकीम्
पश्याम्यशोकवनिकागतां लङ्कागतां किल
rāmavārtāśravātpakṣau jātau bhūyo 'tha jānakīm
paśyāmyaśokavanikāgatāṃ laṅkāgatāṃ kila
- 16
शतयोजनविस्तीर्णे लवणाब्धौ त्रिकूटके
ज्ञात्वा रामं ससुग्रीवं वानराः कथयन्तु वै
śatayojanavistīrṇe lavaṇābdhau trikūṭake
jñātvā rāmaṃ sasugrīvaṃ vānarāḥ kathayantu vai
- 17
इत्य् आदिमहापुराणे आग्नेये रामायणे किष्किन्धाकाण्डवर्णनं नाम अष्टमो ऽध्यायः
ity ādimahāpurāṇe āgneye rāmāyaṇe kiṣkindhākāṇḍavarṇanaṃ nāma aṣṭamo 'dhyāyaḥ

