15 shlokas
- 1
अग्निर् उवाच
रामायणमहं वक्ष्ये नारदेनोदितं पुरा
वाल्मीकये यथा तद्वत्पठितं भुक्तिमुक्तिदम्
agnir uvāca
rāmāyaṇamahaṃ vakṣye nāradenoditaṃ purā
vālmīkaye yathā tadvatpaṭhitaṃ bhuktimuktidam
- 2
नारद उवाच
विष्णुनाभ्यब्जजो ब्रह्मा मरीचिर्ब्रह्मणः सुतः
मरीचेः कश्यपस्तस्मात्सूर्यो वैवस्वतो मनुः
nārada uvāca
viṣṇunābhyabjajo brahmā marīcirbrahmaṇaḥ sutaḥ
marīceḥ kaśyapastasmātsūryo vaivasvato manuḥ
- 3
ततस्तस्मात्तथेक्ष्वाकुस्तस्य वंशे ककुत्स्थकः
ककुत्स्थस्य रघुस्तस्माद् अजो दशरथस्ततः
tatastasmāttathekṣvākustasya vaṃśe kakutsthakaḥ
kakutsthasya raghustasmād ajo daśarathastataḥ
- 4
रावणादेर्वधार्थाय चतुर्धाभूत्स्वयं हरिः
राज्ञो दशरथाद्रामः कौशल्यायां बभूव ह
rāvaṇādervadhārthāya caturdhābhūtsvayaṃ hariḥ
rājño daśarathādrāmaḥ kauśalyāyāṃ babhūva ha
- 5
कैकेय्यां भरतः पुत्रः सुमित्रायां च लक्ष्मणः
शत्रुघ्न ऋष्यशृङ्गेण तासु संदत्तपायसात्
kaikeyyāṃ bharataḥ putraḥ sumitrāyāṃ ca lakṣmaṇaḥ
śatrughna ṛṣyaśṛṅgeṇa tāsu saṃdattapāyasāt
- 6
प्राशिताद्यज्ञसंसिद्धाद्रामाद्याश्च समाः पितुः
यज्ञविघ्नविनाशाय विश्वामित्रार्थितो नृपः
prāśitādyajñasaṃsiddhādrāmādyāśca samāḥ pituḥ
yajñavighnavināśāya viśvāmitrārthito nṛpaḥ
- 7
रामं संप्रेषयामास लक्ष्मणं मुनिना सह
रामो गतो ऽस्त्रशस्त्राणि शिक्षितस्ताडकान्तकृत्
rāmaṃ saṃpreṣayāmāsa lakṣmaṇaṃ muninā saha
rāmo gato 'straśastrāṇi śikṣitastāḍakāntakṛt
- 8
मारीचं मानवास्त्रेण मोहितं दूरतो ऽनयत्
सुबाहुं यज्ञहन्तारं सबलं चावधीत्बली
mārīcaṃ mānavāstreṇa mohitaṃ dūrato 'nayat
subāhuṃ yajñahantāraṃ sabalaṃ cāvadhītbalī
- 9
सिद्धाश्रमनिवासी च विश्वामित्रादिभिः सह
गतः क्रतुं मैथिलस्य द्रष्टुं चापं सहानुजः
siddhāśramanivāsī ca viśvāmitrādibhiḥ saha
gataḥ kratuṃ maithilasya draṣṭuṃ cāpaṃ sahānujaḥ
- 10
शतानन्दनिमित्तेन विश्वामित्रप्रभावितः
रामाय कथितो राज्ञा समुनिः पूजितः क्रतौ
śatānandanimittena viśvāmitraprabhāvitaḥ
rāmāya kathito rājñā samuniḥ pūjitaḥ kratau
- 11
धनुरापूरयामास लीलया स बभञ्ज तत्
वीर्यशुक्लां च जनकः सीतां कन्यां त्वयोनिजाम्
dhanurāpūrayāmāsa līlayā sa babhañja tat
vīryaśuklāṃ ca janakaḥ sītāṃ kanyāṃ tvayonijām
- 12
ददौ रामाय रामो ऽपि पित्रादौ हि समागते
उपयेमे जानकीं ताम् ऊर्मिलां लक्ष्मणस्तथा
dadau rāmāya rāmo 'pi pitrādau hi samāgate
upayeme jānakīṃ tām ūrmilāṃ lakṣmaṇastathā
- 13
श्रुतकीर्तिं माण्डवीं च कुशध्वजसुते तथा
जनकस्यानुजस्यैते शत्रुघ्नभरतावुभौ
śrutakīrtiṃ māṇḍavīṃ ca kuśadhvajasute tathā
janakasyānujasyaite śatrughnabharatāvubhau
- 14
कन्ये द्वे उपयेमाते जनकेन सुपूजितः
रामो ऽगात्सवशिष्ठाद्यैर्जामदग्न्यं विजित्य च
अयोध्यां भरतो ऽभ्यागात्सशत्रुघ्नो युधाजितः
kanye dve upayemāte janakena supūjitaḥ
rāmo 'gātsavaśiṣṭhādyairjāmadagnyaṃ vijitya ca
ayodhyāṃ bharato 'bhyāgātsaśatrughno yudhājitaḥ
- 15
इत्य् आदिमहापुराणे आग्नेये रामायणे बालकाण्डवर्णनं नाम पञ्चमो ऽध्यायः
ity ādimahāpurāṇe āgneye rāmāyaṇe bālakāṇḍavarṇanaṃ nāma pañcamo 'dhyāyaḥ

