14 shlokas
- 1
अग्निर् उवाच
वक्ष्ये बुद्धावतारं च पठतः शृण्वतो ऽर्थदम्
पुरा देवासुरे युद्धे दैत्यैर्देवाः पराजिताः
agnir uvāca
vakṣye buddhāvatāraṃ ca paṭhataḥ śṛṇvato 'rthadam
purā devāsure yuddhe daityairdevāḥ parājitāḥ
- 2
रक्ष रक्षेति शरणं वदन्तो जग्मुरीश्वरम्
मायमोहस्वरुपो ऽसौ शुद्धोदनसुतो ऽभवत्
rakṣa rakṣeti śaraṇaṃ vadanto jagmurīśvaram
māyamohasvarupo 'sau śuddhodanasuto 'bhavat
- 3
मोहयामास दैत्यांस्तांस्त्याजिता वेदधर्मकम्
ते च बौद्धा बभूवुर्हि तेभ्यो ऽन्ये वेदवर्जिताः
mohayāmāsa daityāṃstāṃstyājitā vedadharmakam
te ca bauddhā babhūvurhi tebhyo 'nye vedavarjitāḥ
- 4
आर्हतः सो ऽभवत्पश्चादार्हतानकरोत्परान्
एवं पाषण्डिनो जाता वेदधर्मादिवर्जिताः
ārhataḥ so 'bhavatpaścādārhatānakarotparān
evaṃ pāṣaṇḍino jātā vedadharmādivarjitāḥ
- 5
नरकार्हं कर्म चक्रुर्ग्रहीष्यन्त्यधमादपि
सर्वे कलियुगान्ते तु भविष्यन्ति च सङ्कराः
narakārhaṃ karma cakrurgrahīṣyantyadhamādapi
sarve kaliyugānte tu bhaviṣyanti ca saṅkarāḥ
- 6
दस्यवः शीलहीनाश्च वेदो वाजसनेयकः
दश पञ्च च शाखा वै प्रमाणेन भविष्यति
dasyavaḥ śīlahīnāśca vedo vājasaneyakaḥ
daśa pañca ca śākhā vai pramāṇena bhaviṣyati
- 7
धर्मकञ्चुकसंवीता अधर्मरुचयस्तथा
मानुषान्भक्षयिष्यन्ति म्लेच्छाः पार्थिवरूपिणः
dharmakañcukasaṃvītā adharmarucayastathā
mānuṣānbhakṣayiṣyanti mlecchāḥ pārthivarūpiṇaḥ
- 8
कल्की विष्णुयशःपुत्रो याज्ञवल्क्यपुरोहितः
उत्सादयिष्यति म्लेच्छान्गृहीतास्त्रः कृतायुधः
kalkī viṣṇuyaśaḥputro yājñavalkyapurohitaḥ
utsādayiṣyati mlecchāngṛhītāstraḥ kṛtāyudhaḥ
- 9
स्थापयिष्यति मर्यादां चातुर्वर्ण्ये यथोचिताम्
आश्रमेषु च सर्वेषु प्रजाः सद्धर्मवर्त्मनि
sthāpayiṣyati maryādāṃ cāturvarṇye yathocitām
āśrameṣu ca sarveṣu prajāḥ saddharmavartmani
- 10
कल्किरूपं परित्यज्य हरिः स्वर्गं गमिष्यति
ततः कृतयुगान्नाम पुरावत्सम्भविष्यति
kalkirūpaṃ parityajya hariḥ svargaṃ gamiṣyati
tataḥ kṛtayugānnāma purāvatsambhaviṣyati
- 11
वर्णाश्रमाश्च धर्मेषु स्वेषु स्थास्यन्ति सत्तम
एवं सर्वेषु कल्पेषु सर्वमन्वन्तरेषु च
varṇāśramāśca dharmeṣu sveṣu sthāsyanti sattama
evaṃ sarveṣu kalpeṣu sarvamanvantareṣu ca
- 12
अवतारा असङ्ख्याता अतीतानागतादयः
विष्णोर्दशावताराख्यान्यः पठेत्शृणुयान्नरः
avatārā asaṅkhyātā atītānāgatādayaḥ
viṣṇordaśāvatārākhyānyaḥ paṭhetśṛṇuyānnaraḥ
- 13
सो ऽवाप्तकामो विमलः सकुलः स्वर्गमाप्नुयात्
धर्माधर्मव्यवस्थानमेवं वै कुरुते हरिः
अवतीर्णं च स गतः सर्गादेः कारणं हरिः
so 'vāptakāmo vimalaḥ sakulaḥ svargamāpnuyāt
dharmādharmavyavasthānamevaṃ vai kurute hariḥ
avatīrṇaṃ ca sa gataḥ sargādeḥ kāraṇaṃ hariḥ
- 14
इत्य् आदिमहापुराणे आग्नेये बुद्धकल्क्यवतारवर्णनं नाम षोडशो ऽध्यायः
ity ādimahāpurāṇe āgneye buddhakalkyavatāravarṇanaṃ nāma ṣoḍaśo 'dhyāyaḥ

