14 shlokas
- 1
अग्निर् उवाच
जितहस्तो जितमतिर्जितदृग्लक्ष्यसाधकः
नियतां सिद्धिमासाद्य ततो वाहनमारुहेत्
agnir uvāca
jitahasto jitamatirjitadṛglakṣyasādhakaḥ
niyatāṃ siddhimāsādya tato vāhanamāruhet
- 2
दशहस्तो भवेत्पाशो वृत्तः करमुखस्तथा
गुणकार्पासमुञ्जानां भङ्गस्नाय्वर्कवर्मिणाम्
daśahasto bhavetpāśo vṛttaḥ karamukhastathā
guṇakārpāsamuñjānāṃ bhaṅgasnāyvarkavarmiṇām
- 3
अन्येषां सुदृढानां च सुकृतं परिवेष्टितम्
तथा त्रिंशत्समं पाशं बुधः कुर्यात्सुवर्तितम्
anyeṣāṃ sudṛḍhānāṃ ca sukṛtaṃ pariveṣṭitam
tathā triṃśatsamaṃ pāśaṃ budhaḥ kuryātsuvartitam
- 4
कर्तव्यं शिक्षकैस्तस्य स्थानं कक्षासु वै तदा
वामहस्तेन संगृह्य दक्षिणेनोद्धरेत्ततः
kartavyaṃ śikṣakaistasya sthānaṃ kakṣāsu vai tadā
vāmahastena saṃgṛhya dakṣiṇenoddharettataḥ
- 5
कुण्डलस्याकृतिं कृत्वा भ्राम्यकं मस्तकोपरि
क्षिपेत्तूर्णमये तूर्णं पुरुषे चर्मवेष्टिते
kuṇḍalasyākṛtiṃ kṛtvā bhrāmyakaṃ mastakopari
kṣipettūrṇamaye tūrṇaṃ puruṣe carmaveṣṭite
- 6
वल्गिते च प्लुते चैव तथा प्रव्रजितेषु च
समयोगविधिं कृत्वा प्रयुञ्जीत सुशिक्षितम्
valgite ca plute caiva tathā pravrajiteṣu ca
samayogavidhiṃ kṛtvā prayuñjīta suśikṣitam
- 7
विजित्वा तु यथान्यायं ततो बन्धं समाचरेत्
कट्यां बद्ध्वा ततः खड्गं वामपार्श्वावलम्बितम्
vijitvā tu yathānyāyaṃ tato bandhaṃ samācaret
kaṭyāṃ baddhvā tataḥ khaḍgaṃ vāmapārśvāvalambitam
- 8
दृढं विगृह्य वामेन निष्कर्षेद्दक्षिणेन तु
षडङ्गुलपरीणाहं सप्तहस्तसमुच्छ्रितं
dṛḍhaṃ vigṛhya vāmena niṣkarṣeddakṣiṇena tu
ṣaḍaṅgulaparīṇāhaṃ saptahastasamucchritaṃ
- 9
अयोमय्यः शलाकाश्च वर्माणि विविधानि च
अर्धहस्ते समे चैव तिर्यगूर्ध्वगतं तथा
ayomayyaḥ śalākāśca varmāṇi vividhāni ca
ardhahaste same caiva tiryagūrdhvagataṃ tathā
- 10
योजयेद्विधिना येन तथात्वङ्गदतः शृणु
तूणचर्मावनद्धाङ्गं स्थापयित्वा नवं दृढं
yojayedvidhinā yena tathātvaṅgadataḥ śṛṇu
tūṇacarmāvanaddhāṅgaṃ sthāpayitvā navaṃ dṛḍhaṃ
- 11
करेणादाय लगूडं दक्षिणाङ्गुलकं नवं
उद्यम्य घातयेद्यस्य नाशस्तेन शिशोर्दृढं
kareṇādāya lagūḍaṃ dakṣiṇāṅgulakaṃ navaṃ
udyamya ghātayedyasya nāśastena śiśordṛḍhaṃ
- 12
उभाभ्यामथ हस्ताभ्यां कुर्यात्तस्य निपातनं
अक्लेशेन ततः कुर्वन्बधे सिद्धिः प्रकीर्तिता
ubhābhyāmatha hastābhyāṃ kuryāttasya nipātanaṃ
akleśena tataḥ kurvanbadhe siddhiḥ prakīrtitā
- 13
वाहानां श्रमकरणं प्रचारार्थं पुरा तव
vāhānāṃ śramakaraṇaṃ pracārārthaṃ purā tava
- 14
इत्याग्नेये महापुराणे धनुर्वेदो नाम पञ्चाशदधिकद्विशततमो ऽध्यायः
ityāgneye mahāpurāṇe dhanurvedo nāma pañcāśadadhikadviśatatamo 'dhyāyaḥ

