14 shlokas
- 1
नारद उवाच
राज्यस्थं राघवं जग्मुर् अगस्त्याद्याः सुपूजिताः
धन्यस्त्वं विजयी यस्माद् इन्द्रजिद्विनिपातितः
nārada uvāca
rājyasthaṃ rāghavaṃ jagmur agastyādyāḥ supūjitāḥ
dhanyastvaṃ vijayī yasmād indrajidvinipātitaḥ
- 2
ब्रह्मात्मजः पुलस्त्यो ऽभूत्विश्रवास्तस्य नैकषी
पुष्पोत्कटाभूत्प्रथमा तत्पुत्रो ऽभूद्धनेश्वरः
brahmātmajaḥ pulastyo 'bhūtviśravāstasya naikaṣī
puṣpotkaṭābhūtprathamā tatputro 'bhūddhaneśvaraḥ
- 3
नैकष्यां रावणो जज्ञे विंशद्बाहुर्दशाननः
तपसा ब्रह्मदत्तेन वरेण जितदैवतः
naikaṣyāṃ rāvaṇo jajñe viṃśadbāhurdaśānanaḥ
tapasā brahmadattena vareṇa jitadaivataḥ
- 4
कुम्भकर्णः सनिद्रो ऽभूद्धर्मिष्ठो ऽभूद्विभीषणः
स्वसा शूर्पणखा तेषां रावणान्मेघनादकः
kumbhakarṇaḥ sanidro 'bhūddharmiṣṭho 'bhūdvibhīṣaṇaḥ
svasā śūrpaṇakhā teṣāṃ rāvaṇānmeghanādakaḥ
- 5
इन्द्रं जित्वेन्द्रजिच्चाभूद्रावणादधिको बली
हतस्त्वया लक्ष्मणेन देवादेः क्षेममिच्छता
indraṃ jitvendrajiccābhūdrāvaṇādadhiko balī
hatastvayā lakṣmaṇena devādeḥ kṣemamicchatā
- 6
इत्युक्त्वा ते गता विप्रा अगस्त्याद्या नमस्कृताः
देवप्रार्थितरामोक्तः शत्रुघ्नो लवणार्दनः
ityuktvā te gatā viprā agastyādyā namaskṛtāḥ
devaprārthitarāmoktaḥ śatrughno lavaṇārdanaḥ
- 7
अभूत्पूर्मथुरा काचित्रामोक्तो भरतो ऽवधीत्
कोटित्रयं च शैलूषपुत्राणां निशितैः शरैः
abhūtpūrmathurā kācitrāmokto bharato 'vadhīt
koṭitrayaṃ ca śailūṣaputrāṇāṃ niśitaiḥ śaraiḥ
- 8
शैलूषं दुष्टगन्धर्वं सिन्धुतीरनिवासिनम्
तक्षं च पुष्करं पुत्रं स्थापयित्वाथ देशयोः
śailūṣaṃ duṣṭagandharvaṃ sindhutīranivāsinam
takṣaṃ ca puṣkaraṃ putraṃ sthāpayitvātha deśayoḥ
- 9
भरतो ऽगात्सशत्रुघ्नो राघवं पूजयन्स्थितः
रामो दुष्टान्निहत्याजौ शिष्टान्संपाल्य मानवः
bharato 'gātsaśatrughno rāghavaṃ pūjayansthitaḥ
rāmo duṣṭānnihatyājau śiṣṭānsaṃpālya mānavaḥ
- 10
पुत्रौ कुशलवौ जातौ वाल्मीकेराश्रमे वरौ
लोकापवादात्त्यक्तायां ज्ञातौ सुचरितश्रवात्
putrau kuśalavau jātau vālmīkerāśrame varau
lokāpavādāttyaktāyāṃ jñātau sucaritaśravāt
- 11
राज्ये ऽभिषिच्य ब्रह्माहम् अस्मीति ध्यानतत्परः
दशवर्षसहस्राणि दशवर्षशतानि च
rājye 'bhiṣicya brahmāham asmīti dhyānatatparaḥ
daśavarṣasahasrāṇi daśavarṣaśatāni ca
- 12
राज्यं कृत्वा क्रतून्कृत्वा स्वर्गं देवार्चितो ययौ
सपौरः सानुजः सीतापुत्रो जनपदान्वितः
rājyaṃ kṛtvā kratūnkṛtvā svargaṃ devārcito yayau
sapauraḥ sānujaḥ sītāputro janapadānvitaḥ
- 13
अग्निर् उवाच
वाल्मीकिर्नारदाच्छ्रुत्वा रामायणमकारयत्
सविस्तरं यदेतच्च शृणुयात्स दिवं व्रजेत्
agnir uvāca
vālmīkirnāradācchrutvā rāmāyaṇamakārayat
savistaraṃ yadetacca śṛṇuyātsa divaṃ vrajet
- 14
इत्य् आदिमहापुराणे आग्नेये रामायणे उत्तरकाण्डवर्णनं नाम एकादशो ऽध्यायः
ity ādimahāpurāṇe āgneye rāmāyaṇe uttarakāṇḍavarṇanaṃ nāma ekādaśo 'dhyāyaḥ

