21 shlokas
- 1
अग्निर् उवाच
अवतारं वराहस्य वक्ष्ये ऽहं पापनाशनम्
हिरण्याक्षो ऽसुरेशो ऽभूत्देवान्जित्वा दिवि स्थितः
agnir uvāca
avatāraṃ varāhasya vakṣye 'haṃ pāpanāśanam
hiraṇyākṣo 'sureśo 'bhūtdevānjitvā divi sthitaḥ
- 2
देवैर्गत्वा स्तुतो विष्णुर्यज्ञरूपो वराहकः
अभूत्तं दानवं हत्वा दैत्यैः साकं च कण्टकम्
devairgatvā stuto viṣṇuryajñarūpo varāhakaḥ
abhūttaṃ dānavaṃ hatvā daityaiḥ sākaṃ ca kaṇṭakam
- 3
धर्मदेवादिरक्षाकृत्ततः सो ऽन्तर्दधे हरिः
हिरण्याक्षस्य वै भ्राता हिरण्यकशिपुस्तथा
dharmadevādirakṣākṛttataḥ so 'ntardadhe hariḥ
hiraṇyākṣasya vai bhrātā hiraṇyakaśipustathā
- 4
जितदेवयज्ञभागः सर्वदेवाधिकारकृत्
नारसिंहवपुः कृत्वा तं जघान सुरैः सह
jitadevayajñabhāgaḥ sarvadevādhikārakṛt
nārasiṃhavapuḥ kṛtvā taṃ jaghāna suraiḥ saha
- 5
स्वपदस्थान्सुरांश्चक्रे नारसिंहः सुरैः स्तुतः
देवासुरे पुरा युद्धे बलिप्रभृतिभिः सुराः
svapadasthānsurāṃścakre nārasiṃhaḥ suraiḥ stutaḥ
devāsure purā yuddhe baliprabhṛtibhiḥ surāḥ
- 6
जिताः स्वर्गात्परिभ्रष्टा हरिं वै शरणं गताः
सुराणामभयं दत्त्वा अदित्या कश्यपेन च
jitāḥ svargātparibhraṣṭā hariṃ vai śaraṇaṃ gatāḥ
surāṇāmabhayaṃ dattvā adityā kaśyapena ca
- 7
स्तुतो ऽसौ वामनो भूत्वा ह्य् अदित्यां स क्रतुं ययौ
बलेः श्रीयजमानस्य राजद्वारे ऽगृणात्श्रुतिं
stuto 'sau vāmano bhūtvā hy adityāṃ sa kratuṃ yayau
baleḥ śrīyajamānasya rājadvāre 'gṛṇātśrutiṃ
- 8
देवान्पठन्तं तं श्रुत्वा वामनं वरदो ऽब्रवीत्
निवारितो ऽपि शुक्रेण बलिर्ब्रूहि यद् इच्छसि
devānpaṭhantaṃ taṃ śrutvā vāmanaṃ varado 'bravīt
nivārito 'pi śukreṇa balirbrūhi yad icchasi
- 9
तत्ते ऽहं सम्प्रदास्यामि वामनो बलिमब्रवीत्
पदत्रयं हि गुर्वर्थं देहि दास्ये तमब्रवीत्
tatte 'haṃ sampradāsyāmi vāmano balimabravīt
padatrayaṃ hi gurvarthaṃ dehi dāsye tamabravīt
- 10
तोये तु पतिते हस्ते वामनो ऽभूदवामनः
भूर्लोकं स भुवर्लोकं स्वर्लोकं च पदत्रयं
toye tu patite haste vāmano 'bhūdavāmanaḥ
bhūrlokaṃ sa bhuvarlokaṃ svarlokaṃ ca padatrayaṃ
- 11
चक्रे बलिं च सूतलं तच्छक्राय ददौ हरिः
शक्रो देवैर्हरिं स्तुत्वा भुवनेशः सुखी त्वभूत्
cakre baliṃ ca sūtalaṃ tacchakrāya dadau hariḥ
śakro devairhariṃ stutvā bhuvaneśaḥ sukhī tvabhūt
- 12
वक्ष्ये परशुरामस्य चावतारं शृणु द्विज
उद्धतान्क्षत्रियान्मत्वा भूभारहरणाय सः
vakṣye paraśurāmasya cāvatāraṃ śṛṇu dvija
uddhatānkṣatriyānmatvā bhūbhāraharaṇāya saḥ
- 13
अवतीर्णो हरिः शान्त्यै देवविप्रादिपालकः
जमदग्ने रेणुकायां भार्गवः शस्त्रपारगः
avatīrṇo hariḥ śāntyai devaviprādipālakaḥ
jamadagne reṇukāyāṃ bhārgavaḥ śastrapāragaḥ
- 14
दत्तात्रेयप्रसादेन कार्त्तवीर्यो नृपस्त्वभृत्
सहस्रबाहुः सर्वोर्वीपतिः स मृगयां गतः
dattātreyaprasādena kārttavīryo nṛpastvabhṛt
sahasrabāhuḥ sarvorvīpatiḥ sa mṛgayāṃ gataḥ
- 15
श्रान्तो निमन्त्रितो ऽरण्ये मुनिना जमदग्निना
कामधेनुप्रभावेण भोजितः सबलो नृपः
śrānto nimantrito 'raṇye muninā jamadagninā
kāmadhenuprabhāveṇa bhojitaḥ sabalo nṛpaḥ
- 16
अप्रार्थयत्कामधेनुं यदा स न ददौ तदा
हृतवानथ रामेण शिरश्छित्त्वा निपातितः
aprārthayatkāmadhenuṃ yadā sa na dadau tadā
hṛtavānatha rāmeṇa śiraśchittvā nipātitaḥ
- 17
युद्धे परशुना राजा धेनुः स्वाश्रममाययौ
कार्त्तवीर्यस्य पुत्रैस्तु जमदग्निर्निपातितः
yuddhe paraśunā rājā dhenuḥ svāśramamāyayau
kārttavīryasya putraistu jamadagnirnipātitaḥ
- 18
रामे वनं गते वैराद् अथ रामः समागतः
पितरं निहतं दृष्ट्वा पितृनाशाभिमर्षितः
rāme vanaṃ gate vairād atha rāmaḥ samāgataḥ
pitaraṃ nihataṃ dṛṣṭvā pitṛnāśābhimarṣitaḥ
- 19
त्रिःसप्तकृत्वः पृथिवीं निःक्षत्रामकरोद्विभुः
कुरुक्षेत्रे पञ्च कुण्डान्कृत्वा संतर्प्य वै पितॄन्
triḥsaptakṛtvaḥ pṛthivīṃ niḥkṣatrāmakarodvibhuḥ
kurukṣetre pañca kuṇḍānkṛtvā saṃtarpya vai pitṝn
- 20
काश्यपाय महीं दत्त्वा महेन्द्रे पर्वते स्थितः
कूर्मस्य च वराहस्य नृसिंहस्य च वामनं
अवतारं च रामस्य श्रुत्वा याति दिवं नरः
kāśyapāya mahīṃ dattvā mahendre parvate sthitaḥ
kūrmasya ca varāhasya nṛsiṃhasya ca vāmanaṃ
avatāraṃ ca rāmasya śrutvā yāti divaṃ naraḥ
- 21
इत्य् आदिमहापुराणे आग्नेये वराहनृसिंहाद्यवतारो नाम चतुर्थो ऽध्यायः
ity ādimahāpurāṇe āgneye varāhanṛsiṃhādyavatāro nāma caturtho 'dhyāyaḥ

