5 shlokas
- 1
अन्यदा सा हसन्ती नरान्तरगमनाय शुकं पृच्छति
शुक आह यदेव मनसो ऽभीष्टं तदेव कार्यम्
उक्तं च
दृष्टिपूतं न्यसेत्पादं वस्त्रपूतं जलं पिबेत्
सत्यपूतं वदेद्वाक्यं मनःपूतं समाचरेत्
anyadā sā hasantī narāntaragamanāya śukaṃ pṛcchati
śuka āha yadeva manaso 'bhīṣṭaṃ tadeva kāryam
uktaṃ ca
dṛṣṭipūtaṃ nyasetpādaṃ vastrapūtaṃ jalaṃ pibet
satyapūtaṃ vadedvākyaṃ manaḥpūtaṃ samācaret
- 2
मनोऽनुकूलं कुर्वन्तु तन्वि ते दुःखमागतम्
सोढुं शक्तास्तथा वक्तुं गुणाढ्यो ब्राह्मणो यथा
mano'nukūlaṃ kurvantu tanvi te duḥkhamāgatam
soḍhuṃ śaktāstathā vaktuṃ guṇāḍhyo brāhmaṇo yathā
- 3
प्रभावती पृच्छति कथमेतत्
शुकः कथयति अस्ति विशाला पुरी
तत्र यायजूको ब्राह्मणः
तस्य पत्नी पाहिनी नाम सुरूपा अतिवल्लभा
तत्पुत्रः पित्रा सर्वामपि क्रमाद्विद्यां ग्राहितः
अन्यदा स पितरौ मुक्त्वा देशान्तरं गतः
गुणाढ्य इति विश्रुतो बभूव
जयन्त्यां च नगर्यां बुद्धिजीवनं व्यचिन्तयत्
ततः षण्डं यवकाशादिभिः पुपोष
सो ऽपि षण्डस्तमनु परिभ्रमति
अन्यदा सबन्धनं षण्डं विधाय वणिजारकवेषधारी मदनाया वेश्यायाः कुट्टिनीं जगाद अस्मदीया बलीवर्दाः सवस्तुका प्रातरेष्यन्ति
अद्याहं तृणानयनार्थमागतः
तद्यत्र अस्मदीयस्य बलीवर्दस्य स्थानं भवति तत्राहं स्वपिमि
इत्युक्ते सा कुट्टिनी बलीवर्दधनैषिणी तं स्थापयामास
सो ऽपि तं षण्डं बद्ध्वा विलासिनीपार्श्वे ययौ
तया च स्नापितो भोजितश्च गुणाढ्यो रजन्यां शृङ्गारितः तत्सकाशे स्थितः
सो ऽपि च प्रभातायां निशि प्रथममेवोत्थाय स्वर्णशृङ्खला गृहीत्वा जगाम
गते च तस्मिन् एका चेटी उत्थिता षण्डम् अदृष्ट्वा कुट्टिनीं प्रत्याह आउए किमिदम्
ततस्तं विलासिनीपार्श्वाद्गतं ज्ञात्वा मौनं विधाय स्थिता
उक्तं च
अर्थनाशं मनस्तापं गृहे दुश्चरितानि च
वञ्चनं चापमानं च मतिमान्न प्रकाशयेत्
prabhāvatī pṛcchati kathametat
śukaḥ kathayati asti viśālā purī
tatra yāyajūko brāhmaṇaḥ
tasya patnī pāhinī nāma surūpā ativallabhā
tatputraḥ pitrā sarvāmapi kramādvidyāṃ grāhitaḥ
anyadā sa pitarau muktvā deśāntaraṃ gataḥ
guṇāḍhya iti viśruto babhūva
jayantyāṃ ca nagaryāṃ buddhijīvanaṃ vyacintayat
tataḥ ṣaṇḍaṃ yavakāśādibhiḥ pupoṣa
so 'pi ṣaṇḍastamanu paribhramati
anyadā sabandhanaṃ ṣaṇḍaṃ vidhāya vaṇijārakaveṣadhārī madanāyā veśyāyāḥ kuṭṭinīṃ jagāda asmadīyā balīvardāḥ savastukā prātareṣyanti
adyāhaṃ tṛṇānayanārthamāgataḥ
tadyatra asmadīyasya balīvardasya sthānaṃ bhavati tatrāhaṃ svapimi
ityukte sā kuṭṭinī balīvardadhanaiṣiṇī taṃ sthāpayāmāsa
so 'pi taṃ ṣaṇḍaṃ baddhvā vilāsinīpārśve yayau
tayā ca snāpito bhojitaśca guṇāḍhyo rajanyāṃ śṛṅgāritaḥ tatsakāśe sthitaḥ
so 'pi ca prabhātāyāṃ niśi prathamamevotthāya svarṇaśṛṅkhalā gṛhītvā jagāma
gate ca tasmin ekā ceṭī utthitā ṣaṇḍam adṛṣṭvā kuṭṭinīṃ pratyāha āue kimidam
tatastaṃ vilāsinīpārśvādgataṃ jñātvā maunaṃ vidhāya sthitā
uktaṃ ca
arthanāśaṃ manastāpaṃ gṛhe duścaritāni ca
vañcanaṃ cāpamānaṃ ca matimānna prakāśayet
- 4
अन्यदा गुणाढ्यो द्यूतनिर्जितः खटिकाहस्तो वेश्यया धृतः
तेनोपायश्चिन्तितः शम्बलो शम्बलीति जगाद
ततस्तया राजभयान्मुक्तः
ततस्तस्यां चलितायां पृष्ठलग्न एव शम्बलीति वदन्गच्छति
ततस्तया विजने नीत्वा हस्तात्प्रसाद्य स्वर्णाभरणं दत्तम्
सोढुं त्यक्तुं च यः शक्तो मनसा कृतमन्यथा
मनोऽनुकूलतां कुर्वन्न स निन्द्यः सदा सताम्
anyadā guṇāḍhyo dyūtanirjitaḥ khaṭikāhasto veśyayā dhṛtaḥ
tenopāyaścintitaḥ śambalo śambalīti jagāda
tatastayā rājabhayānmuktaḥ
tatastasyāṃ calitāyāṃ pṛṣṭhalagna eva śambalīti vadangacchati
tatastayā vijane nītvā hastātprasādya svarṇābharaṇaṃ dattam
soḍhuṃ tyaktuṃ ca yaḥ śakto manasā kṛtamanyathā
mano'nukūlatāṃ kurvanna sa nindyaḥ sadā satām
- 5
इति कथां श्रुत्वा प्रभावती सुप्ता
iti kathāṃ śrutvā prabhāvatī suptā

