3 shlokas
- 1
अन्यदा सशृङ्गारा प्रभावती शुकमाह
किं कर्तव्यं मया कीर त्वं वदाद्य प्रियंवद
यदि ते ऽस्ति सखी याहि शृङ्गारीव सहायिनी
anyadā saśṛṅgārā prabhāvatī śukamāha
kiṃ kartavyaṃ mayā kīra tvaṃ vadādya priyaṃvada
yadi te 'sti sakhī yāhi śṛṅgārīva sahāyinī
- 2
प्रभावत्याह कथमेतत्शुक आह अस्ति राजपुरं नाम स्थानम्
तत्र देवसाख्यः कौटुम्बिकः तत्कलत्रे शृङ्गारवती सुभगा च
परस्परपरित्राणकृतबन्धपरायणे
परपुरुषलम्पटे प्रसिद्धे रतकर्मणि
prabhāvatyāha kathametatśuka āha asti rājapuraṃ nāma sthānam
tatra devasākhyaḥ kauṭumbikaḥ tatkalatre śṛṅgāravatī subhagā ca
parasparaparitrāṇakṛtabandhaparāyaṇe
parapuruṣalampaṭe prasiddhe ratakarmaṇi
- 3
अन्यदा यावत्सुभगा उपपतिना सह गृहान्तर्विद्येत तावद्बहिः स्थानात्पतिर्झिण्टहस्तो गृहद्वारि समाययौ
तदा सा कथं भवत्विति प्रश्नः उत्तरमाह शुकः ततः शृङ्गारदेव्या सा नग्नीकृत्य गृहाद्बहिर्निष्कासिता
पतिरपि किमिदमिति ब्रुवाणो ऽत्यादरात्शृङ्गारदेव्या उक्तः यत्त्वया एतानि झिण्टानि देव्या उपवनादानीतानि तत इयं ग्रहिला संजाता
ततो यथास्थानं गत्वा मुञ्च यथा प्रगुणा स्यात्
ततः स मूढो यावदेवं कर्तुं बहिर्जगाम तावत्तया गृहादुपपतिर्निष्कासितः
इति कथां श्रुत्वा प्रभावती सुप्ता
anyadā yāvatsubhagā upapatinā saha gṛhāntarvidyeta tāvadbahiḥ sthānātpatirjhiṇṭahasto gṛhadvāri samāyayau
tadā sā kathaṃ bhavatviti praśnaḥ uttaramāha śukaḥ tataḥ śṛṅgāradevyā sā nagnīkṛtya gṛhādbahirniṣkāsitā
patirapi kimidamiti bruvāṇo 'tyādarātśṛṅgāradevyā uktaḥ yattvayā etāni jhiṇṭāni devyā upavanādānītāni tata iyaṃ grahilā saṃjātā
tato yathāsthānaṃ gatvā muñca yathā praguṇā syāt
tataḥ sa mūḍho yāvadevaṃ kartuṃ bahirjagāma tāvattayā gṛhādupapatirniṣkāsitaḥ
iti kathāṃ śrutvā prabhāvatī suptā

