204 shlokas
- 1
शताह्वा चैव मिश्रेया शालिपर्णी समष्ठिला
बृहती कण्टकारी च द्विधा स्यात्पृश्निपर्णिका
śatāhvā caiva miśreyā śāliparṇī samaṣṭhilā
bṛhatī kaṇṭakārī ca dvidhā syātpṛśniparṇikā
- 2
द्विधा गोक्षुरकश्चैव यासो वासा शतावरी
धन्वयासद्वयं चाग्निदमनी वाकुची तथा
dvidhā gokṣurakaścaiva yāso vāsā śatāvarī
dhanvayāsadvayaṃ cāgnidamanī vākucī tathā
- 3
शणपुष्पी द्विधा चैव त्रिविधा शरपुङ्खिका
शणो ऽम्बष्ठा द्विधा नीली द्विधा गोजिह्विका स्मृता
śaṇapuṣpī dvidhā caiva trividhā śarapuṅkhikā
śaṇo 'mbaṣṭhā dvidhā nīlī dvidhā gojihvikā smṛtā
- 4
अपामार्गद्वयं पञ्च बला राष्ट्री महादि च
हयगन्धा च हपुषा शतावर्यौ द्विधा मते
apāmārgadvayaṃ pañca balā rāṣṭrī mahādi ca
hayagandhā ca hapuṣā śatāvaryau dvidhā mate
- 5
एलवालुकतैरण्यौ कलिकारी जयन्तिका
काकमाची श्रुतश्रेणी भृङ्गराजस्त्रिधा मतः
elavālukatairaṇyau kalikārī jayantikā
kākamācī śrutaśreṇī bhṛṅgarājastridhā mataḥ
- 6
काकजङ्घा त्रिधा चुञ्चुः त्रिविधः सिन्दुवारकः
भेण्डा स्यात्पुत्रदा चैव तक्रा स्वर्णुलिकाह्वया
kākajaṅghā tridhā cuñcuḥ trividhaḥ sinduvārakaḥ
bheṇḍā syātputradā caiva takrā svarṇulikāhvayā
- 7
खस्खसः शिमृडी चैव ज्ञेयो वन्यकुसुम्भकः
द्वयाहुल्यः कासमर्दश्च रविपत्त्री द्विधाम्लिका
khaskhasaḥ śimṛḍī caiva jñeyo vanyakusumbhakaḥ
dvayāhulyaḥ kāsamardaśca ravipattrī dvidhāmlikā
- 8
अजगन्धादित्यभक्ता विषमुष्टिर्द्विधा परा
कालाञ्जनी द्विकार्पासी द्विविधः कोकिलाक्षकः
ajagandhādityabhaktā viṣamuṣṭirdvidhā parā
kālāñjanī dvikārpāsī dvividhaḥ kokilākṣakaḥ
- 9
सातला कामवृद्धिश्च चक्रमर्दो ऽथ झिञ्झिरा
शताह्वाद्याः क्रमेणैव क्षुपाः प्रोक्ता यथागुणाः
sātalā kāmavṛddhiśca cakramardo 'tha jhiñjhirā
śatāhvādyāḥ krameṇaiva kṣupāḥ proktā yathāguṇāḥ
- 10
शताह्वा शतपुष्पा च मिसिर्घोषा च पोतिका
अहिच्छत्त्राप्य् अवाक्पुष्पी माधवी कारवी शिफा
śatāhvā śatapuṣpā ca misirghoṣā ca potikā
ahicchattrāpy avākpuṣpī mādhavī kāravī śiphā
- 11
सङ्घातपत्त्रिका छत्त्रा वज्रपुष्पा सुपुष्पिका
शतप्रसूना बहला पुष्पाह्वा शतपत्त्रिका
saṅghātapattrikā chattrā vajrapuṣpā supuṣpikā
śataprasūnā bahalā puṣpāhvā śatapattrikā
- 12
वनपुष्पा भूरिपुष्पा सुगन्धा सूक्ष्मपत्त्रिका
गन्धारिकातिच्छत्रा च चतुर्विंशतिनामका
vanapuṣpā bhūripuṣpā sugandhā sūkṣmapattrikā
gandhārikāticchatrā ca caturviṃśatināmakā
- 13
शताह्वा तु कटुस्तिक्ता स्निग्धा श्लेष्मातिसारनुत्
ज्वरनेत्रव्रणघ्नी च वस्तिकर्मणि शस्यते
śatāhvā tu kaṭustiktā snigdhā śleṣmātisāranut
jvaranetravraṇaghnī ca vastikarmaṇi śasyate
- 14
मिश्रेया तालपर्णी च तालपत्रा मिशिस्तथा
शालेया स्याच्छीतशिवा शालीना वनजा च सा
miśreyā tālaparṇī ca tālapatrā miśistathā
śāleyā syācchītaśivā śālīnā vanajā ca sā
- 15
अवाक्पुष्पी मधुरिका छत्त्रा संहितपुष्पिका
सुपुष्पा सुरसा वन्या ज्ञेया पञ्चदशाह्वया
avākpuṣpī madhurikā chattrā saṃhitapuṣpikā
supuṣpā surasā vanyā jñeyā pañcadaśāhvayā
- 16
मिश्रेया मधुरा स्निग्धा कटुः कफहरा परा
वातपित्तोत्थदोषघ्नी प्लीहजन्तुविनाशनी
miśreyā madhurā snigdhā kaṭuḥ kaphaharā parā
vātapittotthadoṣaghnī plīhajantuvināśanī
- 17
स्याच्छालिपर्णी सुदला सुपत्त्रिका स्थिरा च सौम्या कुमुदा गुहा ध्रुवा
विदारिगन्धांशुमती सुपर्णिका स्याद्दीर्घमूलापि च दीर्घपत्त्रिका
syācchāliparṇī sudalā supattrikā sthirā ca saumyā kumudā guhā dhruvā
vidārigandhāṃśumatī suparṇikā syāddīrghamūlāpi ca dīrghapattrikā
- 18
वातघ्नी पीतिनी तन्वी सुधा सर्वानुकारिणी
शोफघ्नी सुभगा देवी निश्चला व्रीहिपर्णिका
vātaghnī pītinī tanvī sudhā sarvānukāriṇī
śophaghnī subhagā devī niścalā vrīhiparṇikā
- 19
सुमूला च सुरूपा च सुपत्त्रा शुभपत्त्रिका
शालिपर्णी शालिदला स्याद् ऊनत्रिंशदाह्वया
sumūlā ca surūpā ca supattrā śubhapattrikā
śāliparṇī śālidalā syād ūnatriṃśadāhvayā
- 20
शालिपर्णी रसे तिक्ता गुरूष्णा वातदोषनुत्
विषमज्वरमेहार्शःशोफसंतापनाशनी
śāliparṇī rase tiktā gurūṣṇā vātadoṣanut
viṣamajvaramehārśaḥśophasaṃtāpanāśanī
- 21
समष्ठिला च भण्डीरो नद्याम्रश्चाम्रगन्धधृक्
काकाम्रः कण्टकिफलो ऽप्य् उपदंशो मुनिह्वयः
samaṣṭhilā ca bhaṇḍīro nadyāmraścāmragandhadhṛk
kākāmraḥ kaṇṭakiphalo 'py upadaṃśo munihvayaḥ
- 22
नद्याम्रः कटुर् उष्णश्च रुच्यो मुखविशोधनः
कफवातप्रशमनो दाहकृद्दीपनः परः
nadyāmraḥ kaṭur uṣṇaśca rucyo mukhaviśodhanaḥ
kaphavātapraśamano dāhakṛddīpanaḥ paraḥ
- 23
बृहती महतिक्रान्ता वार्त्ताकी सिंहिकाकुली
राष्ट्रिका स्थलकण्टा च भण्टाकी तु महोटिका
bṛhatī mahatikrāntā vārttākī siṃhikākulī
rāṣṭrikā sthalakaṇṭā ca bhaṇṭākī tu mahoṭikā
- 24
बहुपत्त्री कण्टतनुः कण्टालुः कट्फला तथा
डोरली वनवृन्ताकी नामान्य् अस्याश्चतुर्दश
bahupattrī kaṇṭatanuḥ kaṇṭāluḥ kaṭphalā tathā
ḍoralī vanavṛntākī nāmāny asyāścaturdaśa
- 25
बृहती कटुतिक्तोष्णा वातजिज्ज्वरहारिणी
अरोचकामकासघ्नी श्वासहृद्रोगनाशनी
bṛhatī kaṭutiktoṣṇā vātajijjvarahāriṇī
arocakāmakāsaghnī śvāsahṛdroganāśanī
- 26
बृहत्य् अन्या सर्पतनुः क्षविका पीततण्डुला
पुत्रप्रदा बहुफला गोधिनीति षडाह्वया
bṛhaty anyā sarpatanuḥ kṣavikā pītataṇḍulā
putrapradā bahuphalā godhinīti ṣaḍāhvayā
- 27
क्षविका बृहती तिक्ता कटुर् उष्णा च तत्समा
युक्त्या द्रव्यविशेषेण धारासंस्तम्भसिद्धिदा
kṣavikā bṛhatī tiktā kaṭur uṣṇā ca tatsamā
yuktyā dravyaviśeṣeṇa dhārāsaṃstambhasiddhidā
- 28
श्वेतान्या श्वेतबृहती ज्ञेया श्वेतमहोटिका
श्वेतसिंही श्वेतफला श्वेतवार्त्ताकिनी च षट्
śvetānyā śvetabṛhatī jñeyā śvetamahoṭikā
śvetasiṃhī śvetaphalā śvetavārttākinī ca ṣaṭ
- 29
विज्ञेया श्वेतबृहती वातश्लेष्मविनाशनी
रुच्या चाञ्जनयोगेन नानानेत्रामयापहा
vijñeyā śvetabṛhatī vātaśleṣmavināśanī
rucyā cāñjanayogena nānānetrāmayāpahā
- 30
कण्टकारी कण्टकिनी दुःस्पर्शा दुष्प्रधर्षिणी
क्षुद्रा व्याघ्री निदिग्धा च धाविनी क्षुद्रकण्टिका
kaṇṭakārī kaṇṭakinī duḥsparśā duṣpradharṣiṇī
kṣudrā vyāghrī nidigdhā ca dhāvinī kṣudrakaṇṭikā

