207 shlokas
- 1
चतुर्धा करवीरो ऽथ धत्तूरत्रितयं तथा
कोविदारो ऽब्धिर् अर्कः स्यान्नमेरुः किंशुकस्तथा
caturdhā karavīro 'tha dhattūratritayaṃ tathā
kovidāro 'bdhir arkaḥ syānnameruḥ kiṃśukastathā
- 2
पुन्नागस्तिलको ऽगस्त्यः पाटल्यौ च द्विधा स्मृते
अशोकश्चम्पको धन्वी केतकी द्विविधा तथा
punnāgastilako 'gastyaḥ pāṭalyau ca dvidhā smṛte
aśokaścampako dhanvī ketakī dvividhā tathā
- 3
सिन्दूरी च तथा जाती मुद्गरः शतपत्त्रिका
मल्लिका च चतुर्धा स्याद्वासन्ती नवमल्लिका
sindūrī ca tathā jātī mudgaraḥ śatapattrikā
mallikā ca caturdhā syādvāsantī navamallikā
- 4
अतिमुक्तो द्विधा यूथी कुब्जको मुचकुन्दकः
करुणी माधवी चाथ गणिकारी च कुन्दकः
atimukto dvidhā yūthī kubjako mucakundakaḥ
karuṇī mādhavī cātha gaṇikārī ca kundakaḥ
- 5
बककेविकबन्धूकास्त्रिसन्धिश्च जपा तथा
प्रोक्ता भ्रमरमारी च तरुण्य् अम्लानकस्तथा
bakakevikabandhūkāstrisandhiśca japā tathā
proktā bhramaramārī ca taruṇy amlānakastathā
- 6
किङ्किरातो ऽथ बालाख्यो झिण्टिका चोष्ट्रकाण्डिका
तगरं दमनद्वन्द्वं तुलसी मरुवो द्विधा
kiṅkirāto 'tha bālākhyo jhiṇṭikā coṣṭrakāṇḍikā
tagaraṃ damanadvandvaṃ tulasī maruvo dvidhā
- 7
अर्जकश्च चतुर्गङ्गा पत्त्री पाची च बालकः
बर्बरो मञ्चिकापत्त्रः प्रोक्ता चारामशीतला
arjakaśca caturgaṅgā pattrī pācī ca bālakaḥ
barbaro mañcikāpattraḥ proktā cārāmaśītalā
- 8
अथ कमलपुण्डरीकाह्वयकोकनदानि पद्मिनी चैव
पद्माक्षं च मृणालं तत्कन्दः केसरश्च तथा
atha kamalapuṇḍarīkāhvayakokanadāni padminī caiva
padmākṣaṃ ca mṛṇālaṃ tatkandaḥ kesaraśca tathā
- 9
उत्पलकुमुदकुवलयम् उत्पलिनी चाङ्कवसुमित्या
उत्तंसनाम्नि वर्गे द्रव्याण्य् अत्रोपदिश्यन्ते
utpalakumudakuvalayam utpalinī cāṅkavasumityā
uttaṃsanāmni varge dravyāṇy atropadiśyante
- 10
करवीरो महावीरो हयमारो ऽश्वमारकः
हयघ्नः प्रतिहासश्च शतकुन्दो ऽश्वरोधकः
karavīro mahāvīro hayamāro 'śvamārakaḥ
hayaghnaḥ pratihāsaśca śatakundo 'śvarodhakaḥ
- 11
हयारिर्वीरकः कुन्दः शकुन्दः श्वेतपुष्पकः
अश्वान्तकस्तथाश्वघ्नो नखराह्वो ऽश्वनाशकः
hayārirvīrakaḥ kundaḥ śakundaḥ śvetapuṣpakaḥ
aśvāntakastathāśvaghno nakharāhvo 'śvanāśakaḥ
- 12
स्थलादिकुमुदः प्रोक्तो दिव्यपुष्पो हरप्रियः
गौरीपुष्पः सिद्धपुष्पो द्विकराह्वः प्रकीर्तितः
sthalādikumudaḥ prokto divyapuṣpo harapriyaḥ
gaurīpuṣpaḥ siddhapuṣpo dvikarāhvaḥ prakīrtitaḥ
- 13
करवीरः कटुस्तीक्ष्णः कुष्ठकण्डूतिनाशनः
व्रणार्तिविषविस्फोटशमनो ऽश्वमतिप्रदः
karavīraḥ kaṭustīkṣṇaḥ kuṣṭhakaṇḍūtināśanaḥ
vraṇārtiviṣavisphoṭaśamano 'śvamatipradaḥ
- 14
रक्तकरवीरको ऽन्यो रक्तप्रसवो गणेशकुसुमश्च
चण्डीकुसुमः क्रूरो भूतद्रावी रविप्रियो मुनिभिः
raktakaravīrako 'nyo raktaprasavo gaṇeśakusumaśca
caṇḍīkusumaḥ krūro bhūtadrāvī ravipriyo munibhiḥ
- 15
रक्तस्तु करवीरः स्यात्कटुस्तीक्ष्णो विशोधकः
त्वग्दोषव्रणकण्डूतिकुष्ठहारी विषापहः
raktastu karavīraḥ syātkaṭustīkṣṇo viśodhakaḥ
tvagdoṣavraṇakaṇḍūtikuṣṭhahārī viṣāpahaḥ
- 16
पीतकरवीरको ऽन्यः पीतप्रसवः सुगन्धिकुसुमश्च
कृष्णस्तु कृष्णकुसुमश्चतुर्विधो ऽयं गुणे तुल्यः
pītakaravīrako 'nyaḥ pītaprasavaḥ sugandhikusumaśca
kṛṣṇastu kṛṣṇakusumaścaturvidho 'yaṃ guṇe tulyaḥ
- 17
धत्तूरः कितवो धूर्त उन्मत्तः कनकाह्वयः
शठो मातुलकः श्यामो मदनः शिवशेखरः
dhattūraḥ kitavo dhūrta unmattaḥ kanakāhvayaḥ
śaṭho mātulakaḥ śyāmo madanaḥ śivaśekharaḥ
- 18
खर्जूघ्नः काहलापुष्पः खलः कण्टफलस्तथा
मोहनः कलभोन्मत्तः शैवः सप्तदशाह्वयः
kharjūghnaḥ kāhalāpuṣpaḥ khalaḥ kaṇṭaphalastathā
mohanaḥ kalabhonmattaḥ śaivaḥ saptadaśāhvayaḥ
- 19
धत्तूरः कटुर् उष्णश्च कान्तिकारी व्रणार्तिनुत्
त्वग्दोषखर्जूकण्डूतिज्वरहारी भ्रमप्रदः
dhattūraḥ kaṭur uṣṇaśca kāntikārī vraṇārtinut
tvagdoṣakharjūkaṇḍūtijvarahārī bhramapradaḥ
- 20
कृष्णधत्तूरकः सिद्धः कनकः सचिवः शिवः
कृष्णपुष्पो विषारातिः क्रूरधूर्तश्च कीर्तितः
kṛṣṇadhattūrakaḥ siddhaḥ kanakaḥ sacivaḥ śivaḥ
kṛṣṇapuṣpo viṣārātiḥ krūradhūrtaśca kīrtitaḥ
- 21
राजधत्तूरकश्चान्यो राजधूर्तो महाशठः
निस्त्रैणिपुष्पको भ्रान्तो राजस्वर्णः षडाह्वयः
rājadhattūrakaścānyo rājadhūrto mahāśaṭhaḥ
nistraiṇipuṣpako bhrānto rājasvarṇaḥ ṣaḍāhvayaḥ
- 22
सितनीलकृष्णलोहितपीतप्रसवाश्च सन्ति धत्तूराः
सामान्यगुणोपेतास्तेषु गुणाढ्यस्तु कृष्णकुसुमः स्यात्
sitanīlakṛṣṇalohitapītaprasavāśca santi dhattūrāḥ
sāmānyaguṇopetāsteṣu guṇāḍhyastu kṛṣṇakusumaḥ syāt
- 23
कोविदारः काञ्चनारः कुद्दालः कनकारकः
कान्तपुष्पश्च करकः कान्तारो यमलच्छदः
kovidāraḥ kāñcanāraḥ kuddālaḥ kanakārakaḥ
kāntapuṣpaśca karakaḥ kāntāro yamalacchadaḥ
- 24
पीतपुष्पः सुवर्णारो गिरिजः काञ्चनारकः
युग्मपत्रो महापुष्पः स्याच्चतुर्दशधाभिधः
pītapuṣpaḥ suvarṇāro girijaḥ kāñcanārakaḥ
yugmapatro mahāpuṣpaḥ syāccaturdaśadhābhidhaḥ
- 25
कोविदारः कषायः स्यात्संग्राही व्रणरोपणः
दीपनः कफवातघ्नो मूत्रकृच्छ्रनिबर्हणः
kovidāraḥ kaṣāyaḥ syātsaṃgrāhī vraṇaropaṇaḥ
dīpanaḥ kaphavātaghno mūtrakṛcchranibarhaṇaḥ
- 26
अर्कः क्षीरदलः पुच्छी प्रतापः क्षीरकाण्डकः
विक्षीरो भास्करः क्षीरी खर्जूघ्नः शिवपुष्पकः
arkaḥ kṣīradalaḥ pucchī pratāpaḥ kṣīrakāṇḍakaḥ
vikṣīro bhāskaraḥ kṣīrī kharjūghnaḥ śivapuṣpakaḥ
- 27
भञ्जनः क्षीरपर्णी स्यात्सविता च विकीरणः
सूर्याह्वश्च सदापुष्पो रविर् आस्फोटकस्तथा
तूलफलः शुकफलो विंशतिश्च समाह्वयः
bhañjanaḥ kṣīraparṇī syātsavitā ca vikīraṇaḥ
sūryāhvaśca sadāpuṣpo ravir āsphoṭakastathā
tūlaphalaḥ śukaphalo viṃśatiśca samāhvayaḥ
- 28
अर्कस्तु कटुर् उष्णश्च वातजिद्दीपनीयकः
शोफव्रणहरः कण्डूकुष्ठक्रिमिविनाशनः
arkastu kaṭur uṣṇaśca vātajiddīpanīyakaḥ
śophavraṇaharaḥ kaṇḍūkuṣṭhakrimivināśanaḥ
- 29
शुक्लार्कस्तपनः श्वेतः प्रतापश्च सितार्ककः
सुपुष्पः शङ्करादिः स्याद् अत्यर्को वृत्तमल्लिका
śuklārkastapanaḥ śvetaḥ pratāpaśca sitārkakaḥ
supuṣpaḥ śaṅkarādiḥ syād atyarko vṛttamallikā
- 30
श्वेतार्कः कटुतिक्तोष्णो मलशोधनकारकः
मूत्रकृच्छ्रास्रशोफार्तिव्रणदोषविनाशनः
śvetārkaḥ kaṭutiktoṣṇo malaśodhanakārakaḥ
mūtrakṛcchrāsraśophārtivraṇadoṣavināśanaḥ

