21 shlokas
- 1
अदित्याः सदो ऽसीति शकटस्य नीडे कृष्णाजिनं प्राचीनग्रीवम् उत्तरलोमास्तृणाति प्रत्तं राजानम् अदित्याः सद आसीदेति तस्मिन्न् आसादयति
adityāḥ sado 'sīti śakaṭasya nīḍe kṛṣṇājinaṃ prācīnagrīvam uttaralomāstṛṇāti prattaṃ rājānam adityāḥ sada āsīdeti tasminn āsādayati
- 2
अस्तभ्नाद्द्याम् इत्य् आसन्नम् अभिमन्त्रयते
astabhnāddyām ity āsannam abhimantrayate
- 3
आसादयतीत्य् एकेषाम्
āsādayatīty ekeṣām
- 4
वनेषु व्य् अन्तरिक्षं ततानेति वाससा पर्यानह्यति
vaneṣu vy antarikṣaṃ tatāneti vāsasā paryānahyati
- 5
उद् उ त्यं जातवेदसम् इति कृष्णाजिनेनोर्ध्वग्रीवेण बहिर्लोम्नापिदधाति तरणिर्विश्वदर्शत इति वा
ud u tyaṃ jātavedasam iti kṛṣṇājinenordhvagrīveṇa bahirlomnāpidadhāti taraṇirviśvadarśata iti vā
- 6
उस्राव् एतं धूर्षाहाव् इत्य् अनड्वाहाव् उपासजति
usrāv etaṃ dhūrṣāhāv ity anaḍvāhāv upāsajati
- 7
धूर् असीति धुराव् अभिमृशति
dhūr asīti dhurāv abhimṛśati
- 8
वारुणम् असीति शकटम् उत्खिदति
vāruṇam asīti śakaṭam utkhidati
- 9
प्रागीषम् अवस्थाप्य वरुणस्योत्तभ्नात्व् इत्य् उपस्तभ्नोति
prāgīṣam avasthāpya varuṇasyottabhnātv ity upastabhnoti
- 10
दक्षिणम् अनड्वाहं युनक्ति
dakṣiṇam anaḍvāhaṃ yunakti
- 11
वारुणम् असीति योक्त्रं परिकर्षति
vāruṇam asīti yoktraṃ parikarṣati
- 12
वरुणस्य स्कम्भनिर् असीति शम्याम् अवगूहति
varuṇasya skambhanir asīti śamyām avagūhati
- 13
प्रत्यस्तो वरुणस्य पाश इति योक्त्रपाशं प्रत्यस्यति
pratyasto varuṇasya pāśa iti yoktrapāśaṃ pratyasyati
- 14
बलीवर्दं चाभिनिदधाति
balīvardaṃ cābhinidadhāti
- 15
एवम् उत्तरम् अनड्वाहं युनक्ति
evam uttaram anaḍvāhaṃ yunakti
- 16
हरिणी शाखे बिभ्रद् अन्तरेषां सुब्रह्मण्य उपसर्पति पलाशशाखे शमीशाखे वा
hariṇī śākhe bibhrad antareṣāṃ subrahmaṇya upasarpati palāśaśākhe śamīśākhe vā
- 17
शकटम् अन्वारभ्य सोमाय राज्ञे क्रीताय प्रोह्यमाणायानुब्रूहि ब्रह्मन्वाचं यच्छ सुब्रह्मण्य सुब्रह्मण्याम् आह्वयेति संप्रेष्यति
śakaṭam anvārabhya somāya rājñe krītāya prohyamāṇāyānubrūhi brahmanvācaṃ yaccha subrahmaṇya subrahmaṇyām āhvayeti saṃpreṣyati
- 18
त्रिर् अनूक्तायां प्रच्यवस्व भुवस्पत इति प्राञ्चो ऽभिप्रयाय प्रदक्षिणम् आवर्तन्ते
trir anūktāyāṃ pracyavasva bhuvaspata iti prāñco 'bhiprayāya pradakṣiṇam āvartante
- 19
अपि पन्थाम् अगस्महीत्य् उत्तरेण राजानं पूर्वाव् अतिक्रामतो यजमानो ऽध्वर्युश्च
api panthām agasmahīty uttareṇa rājānaṃ pūrvāv atikrāmato yajamāno 'dhvaryuśca
- 20
प्रज्वलयन्त्य् अग्नीन् आहवनीये वर्षिष्ठम् आदधाति
prajvalayanty agnīn āhavanīye varṣiṣṭham ādadhāti
- 21
उपकॢप्तो ऽग्नीषोमीयः समङ्गो बन्धुमान्यथा निरूढपशुबन्धे लोहस्तूपरः श्मश्रुलः स्थूलः पीवा
upakḷpto 'gnīṣomīyaḥ samaṅgo bandhumānyathā nirūḍhapaśubandhe lohastūparaḥ śmaśrulaḥ sthūlaḥ pīvā

