16 shlokas
- 1
प्रवर्ग्येण प्रचर्योपसदा प्रचरत्य् उपसदा वा प्रचर्य प्रवर्ग्येण प्रचरति
pravargyeṇa pracaryopasadā pracaraty upasadā vā pracarya pravargyeṇa pracarati
- 2
यद् आतिथ्याया बर्हिस्तद् उपसदां तद् अग्नीषोमीयस्य तत्प्रस्तरपरिधि
yad ātithyāyā barhistad upasadāṃ tad agnīṣomīyasya tatprastaraparidhi
- 3
स्तीर्णं प्रस्तरबर्हिर् उपसत्सु शयाः परिधयः
stīrṇaṃ prastarabarhir upasatsu śayāḥ paridhayaḥ
- 4
उपसदस्तन्त्रं व्याख्यास्यामः
upasadastantraṃ vyākhyāsyāmaḥ
- 5
तस्याम् आज्यं हविः
tasyām ājyaṃ haviḥ
- 6
अग्निः सोमो विष्णुर्देवताः
agniḥ somo viṣṇurdevatāḥ
- 7
उपांशुयाजेन कल्पो व्याख्यातः
upāṃśuyājena kalpo vyākhyātaḥ
- 8
अग्नीन् अन्वाधाय षोडशदारुम् इध्मं संनह्यति
agnīn anvādhāya ṣoḍaśadārum idhmaṃ saṃnahyati
- 9
वेदं कृत्वाग्नीन्परिस्तीर्य पाणी प्रक्षाल्योलपराजीं स्तीर्त्वा यथार्थम् आज्यपात्राणि प्रयुनक्ति स्फ्यं स्रुवं स्रुच आज्यस्थालीं येन चार्थः
vedaṃ kṛtvāgnīnparistīrya pāṇī prakṣālyolaparājīṃ stīrtvā yathārtham ājyapātrāṇi prayunakti sphyaṃ sruvaṃ sruca ājyasthālīṃ yena cārthaḥ
- 10
पवित्रे कृत्वा यजमान वाचं यच्छेति संप्रेष्यति वाग्यतः पात्राणि संमृशति प्रोक्षितेषु वाचं विसृजते
pavitre kṛtvā yajamāna vācaṃ yaccheti saṃpreṣyati vāgyataḥ pātrāṇi saṃmṛśati prokṣiteṣu vācaṃ visṛjate
- 11
स्फ्यम् आदाय स्तीर्णाया वेदेर्लोमभ्यो ऽधि स्तम्बयजुर्हरत्य् उत्तरं परिग्राहं परिगृह्य संप्रैषेण प्रतिपद्यते
sphyam ādāya stīrṇāyā vederlomabhyo 'dhi stambayajurharaty uttaraṃ parigrāhaṃ parigṛhya saṃpraiṣeṇa pratipadyate
- 12
यद् अन्यद्बर्हिषः पत्नीसंनहनाच्च तत्संप्रेष्यति
yad anyadbarhiṣaḥ patnīsaṃnahanācca tatsaṃpreṣyati
- 13
यत्प्राग् आज्यग्रहणात्तत्कृत्वा ध्रुवायाम् एव गृह्णाति
yatprāg ājyagrahaṇāttatkṛtvā dhruvāyām eva gṛhṇāti
- 14
प्रोक्षणीर् अभिमन्त्र्य ब्रह्माणम् आमन्त्र्येध्मं वेदिं च प्रोक्ष्य प्रोक्षण्यवशेषं निनीय पवित्रे अपिसृज्याग्निम् अभिमन्त्र्य पूर्वाम् आघारसमिधम् आधाय ध्रुवां स्रुवं च सादयत्य् एषासदद् इति मन्त्रं संनमति विष्ण्व् असि वैष्णवं धाम प्राजापत्यम् इत्य् आज्यम् अभिमन्त्रयते
prokṣaṇīr abhimantrya brahmāṇam āmantryedhmaṃ vediṃ ca prokṣya prokṣaṇyavaśeṣaṃ ninīya pavitre apisṛjyāgnim abhimantrya pūrvām āghārasamidham ādhāya dhruvāṃ sruvaṃ ca sādayaty eṣāsadad iti mantraṃ saṃnamati viṣṇv asi vaiṣṇavaṃ dhāma prājāpatyam ity ājyam abhimantrayate
- 15
वेदं निधाय सामिधेनीभ्यः संप्रेष्यति नवधेध्मं प्रतिविभज्य सर्वम् इध्मम् आदधाति
vedaṃ nidhāya sāmidhenībhyaḥ saṃpreṣyati navadhedhmaṃ prativibhajya sarvam idhmam ādadhāti
- 16
ओढासु देवतास्व् अग्निम् उपवाज्य स्रुवाघारम् आघार्याग्नीत्परिधींश्चाग्निं च त्रिस्त्रिः संमृड्ढीति संप्रेष्यति संमृष्टे प्रवरं प्रवृणीते यथा महापितृयज्ञे सीद होतर् इत्य् उक्त्वा
oḍhāsu devatāsv agnim upavājya sruvāghāram āghāryāgnītparidhīṃścāgniṃ ca tristriḥ saṃmṛḍḍhīti saṃpreṣyati saṃmṛṣṭe pravaraṃ pravṛṇīte yathā mahāpitṛyajñe sīda hotar ity uktvā

