26 shlokas
- 1
चिद् असीति सोमक्रयणीं संशास्ति
cid asīti somakrayaṇīṃ saṃśāsti
- 2
मित्रस्त्वा पदि बध्नात्व् इति दक्षिणे पूर्वपादे बध्नाति
mitrastvā padi badhnātv iti dakṣiṇe pūrvapāde badhnāti
- 3
पूषाध्वनः पात्व् इति नयति यत्र सोमो ऽबद्धाम् अकर्णगृहीतां बद्धां वा कर्णगृहीताम्
pūṣādhvanaḥ pātv iti nayati yatra somo 'baddhām akarṇagṛhītāṃ baddhāṃ vā karṇagṛhītām
- 4
तस्या वस्व्य् असीत्य् एतैर्मन्त्रैर्दक्षिणेन पूर्वपादेन षट्पदान्य् अनुनिक्रामति
tasyā vasvy asīty etairmantrairdakṣiṇena pūrvapādena ṣaṭpadāny anunikrāmati
- 5
बृहस्पतिस्त्वा सुम्ने रण्वत्व् इति सप्तमं पदम् अभिगृह्णाति
bṛhaspatistvā sumne raṇvatv iti saptamaṃ padam abhigṛhṇāti
- 6
तस्मिन्हिरण्यं निधाय पृथिव्यास्त्वा मूर्धन्न् आजिघर्मीत्य् एतच्चतुर्गृहीतं जुहोति
tasminhiraṇyaṃ nidhāya pṛthivyāstvā mūrdhann ājigharmīty etaccaturgṛhītaṃ juhoti
- 7
अपादाय हिरण्यं परिलिखितम् इति स्फ्येन पदं परिलिखति यावद्घृतम् अनु विसृतं भवति तूष्णीं विषाणया चानुपरिलिख्यास्मे राय इति स्थाल्यां पदं निवपति
apādāya hiraṇyaṃ parilikhitam iti sphyena padaṃ parilikhati yāvadghṛtam anu visṛtaṃ bhavati tūṣṇīṃ viṣāṇayā cānuparilikhyāsme rāya iti sthālyāṃ padaṃ nivapati
- 8
पदायतने सहिरण्यौ पाणी प्रक्षाल्य त्वे राय इति पदं यजमानाय प्रयच्छति
padāyatane sahiraṇyau pāṇī prakṣālya tve rāya iti padaṃ yajamānāya prayacchati
- 9
तोते राय इति यजमानः पत्नियै
tote rāya iti yajamānaḥ patniyai
- 10
माहं रायस्पोषेण वियोषम् इति पत्नी प्रदीयमानं प्रतीक्षते
māhaṃ rāyaspoṣeṇa viyoṣam iti patnī pradīyamānaṃ pratīkṣate
- 11
सं देवि देव्योर्वश्या पश्यस्वेति सोमक्रयण्या पत्नीं संख्यापयति
saṃ devi devyorvaśyā paśyasveti somakrayaṇyā patnīṃ saṃkhyāpayati
- 12
उन्नम्भय पृथिवीम् इति पद उदपात्रं निनीय त्रैधं पदं प्रतिविभज्य गार्हपत्यस्य शीते भस्मनि तृतीयम् उपवपत्य् आहवनीये तृतीयम्
unnambhaya pṛthivīm iti pada udapātraṃ ninīya traidhaṃ padaṃ prativibhajya gārhapatyasya śīte bhasmani tṛtīyam upavapaty āhavanīye tṛtīyam
- 13
प्रतिषिद्धम् एकेषाम् आहवनीये
pratiṣiddham ekeṣām āhavanīye
- 14
तृतीयं पत्नियै प्रयच्छति तत्सा गृहेषु निधत्ते
tṛtīyaṃ patniyai prayacchati tatsā gṛheṣu nidhatte
- 15
सूर्यस्य चक्षुर् आरुहम् इत्य् अत्रादित्योपस्थानम् एके समामनन्ति
sūryasya cakṣur āruham ity atrādityopasthānam eke samāmananti
- 16
अपि पन्थाम् अगस्महीति परिश्रितेन शकटेन छदिष्मतोद्धृतपूर्वफलकेन राजानम् अच्छ याति
api panthām agasmahīti pariśritena śakaṭena chadiṣmatoddhṛtapūrvaphalakena rājānam accha yāti
- 17
उत्तरेण राजानं शकटं मुखेन प्रतिष्ठाप्यामात्यो ऽसीत्य् अभिमन्त्रयत आस्माको ऽसीति वा
uttareṇa rājānaṃ śakaṭaṃ mukhena pratiṣṭhāpyāmātyo 'sīty abhimantrayata āsmāko 'sīti vā
- 18
अंशुना ते अंशुः पृच्यताम् इत्य् अंशून्समुद्वपति
aṃśunā te aṃśuḥ pṛcyatām ity aṃśūnsamudvapati
- 19
उत्तरेण राजानं चर्मणि क्षौमं वासो ऽहतं महद्द्विगुणं चतुर्गुणं वा प्राचीनदशम् उपरिष्टाद्दशम् आस्तीर्याभि त्यं देवम् इति तस्मिन्सहिरण्येन पाणिनातिच्छन्दसर्चा राजानं मिमीत एकैकयाङ्गुल्या प्रसारितया
uttareṇa rājānaṃ carmaṇi kṣaumaṃ vāso 'hataṃ mahaddviguṇaṃ caturguṇaṃ vā prācīnadaśam upariṣṭāddaśam āstīryābhi tyaṃ devam iti tasminsahiraṇyena pāṇināticchandasarcā rājānaṃ mimīta ekaikayāṅgulyā prasāritayā
- 20
सर्वास्व् अङ्गुष्ठम् उपनिगृह्णाति
sarvāsv aṅguṣṭham upanigṛhṇāti
- 21
यया प्रथमं न तया पञ्चमं तयैव दशमम्
yayā prathamaṃ na tayā pañcamaṃ tayaiva daśamam
- 22
पञ्चकृत्वो यजुषा मिमीते पञ्चकृत्वस्तूष्णीम्
pañcakṛtvo yajuṣā mimīte pañcakṛtvastūṣṇīm
- 23
प्रजाभ्यस्त्वेति परिशिष्टान् अंशून् उपसमूहति
prajābhyastveti pariśiṣṭān aṃśūn upasamūhati
- 24
समुद्गृह्य वाससो ऽन्तान्प्राणाय त्वेति क्षौमेणोष्णीषेणोपनह्यति
samudgṛhya vāsaso 'ntānprāṇāya tveti kṣaumeṇoṣṇīṣeṇopanahyati
- 25
व्यानाय त्वेत्य् अनुशृन्थति
vyānāya tvety anuśṛnthati
- 26
प्रजास्त्वम् अनुप्राणिहि प्रजास्त्वाम् अनुप्राणन्त्व् इत्य् अवेक्ष्यैष ते गायत्रो भाग इत्य् एतैर्मन्त्रैर् अभिमन्त्रयते
prajāstvam anuprāṇihi prajāstvām anuprāṇantv ity avekṣyaiṣa te gāyatro bhāga ity etairmantrair abhimantrayate

