16 shlokas
- 1
अभ्यन्तरं नखानि निकृन्तते हस्त्यान्य् अग्रे ऽथ पद्यानि सव्यस्याग्रे कनिष्ठिकातो ऽथ दक्षिणस्य
abhyantaraṃ nakhāni nikṛntate hastyāny agre 'tha padyāni savyasyāgre kaniṣṭhikāto 'tha dakṣiṇasya
- 2
स यदाक्ताक्षो भवत्य् अथैनम् एकविंशत्या दर्भपुञ्जीलैस्त्रेधा विभक्तैस्त्रिः सप्तभिः सप्तभिः पावयति चित्पतिस्त्वा पुनात्व् इत्य् एतैर्मन्त्रैर्द्विर् ऊर्ध्वं नाभेर् उन्मार्ष्टि सकृद् अवाङ् अवमार्ष्ट्य् अच्छिद्रेण पवित्रेणेति सर्वत्रानुषजति
sa yadāktākṣo bhavaty athainam ekaviṃśatyā darbhapuñjīlaistredhā vibhaktaistriḥ saptabhiḥ saptabhiḥ pāvayati citpatistvā punātv ity etairmantrairdvir ūrdhvaṃ nābher unmārṣṭi sakṛd avāṅ avamārṣṭy acchidreṇa pavitreṇeti sarvatrānuṣajati
- 3
तं प्राग्वंशं प्रपाद्यात्र दीक्षणीयाम् एके समामनन्ति
taṃ prāgvaṃśaṃ prapādyātra dīkṣaṇīyām eke samāmananti
- 4
ध्रुवाशेषाद् आकूत्यै प्रयुजे ऽग्नये स्वाहेति स्रुवेण चतस्रो दीक्षाहुतीर्जुहोति
dhruvāśeṣād ākūtyai prayuje 'gnaye svāheti sruveṇa catasro dīkṣāhutīrjuhoti
- 5
आपो देवीर् इति स्रुचा पञ्चमीम्
āpo devīr iti srucā pañcamīm
- 6
विश्वे देवस्य नेतुर् इति षष्ठीं द्वादशगृहीतेन स्रुचं पूरयित्वा बिलावकाशां वा कृत्वोत्तमस्रुवे ऽभिपूरयत्य् उपोत्तमे वा
viśve devasya netur iti ṣaṣṭhīṃ dvādaśagṛhītena srucaṃ pūrayitvā bilāvakāśāṃ vā kṛtvottamasruve 'bhipūrayaty upottame vā
- 7
कृष्णाजिनस्य दक्षिणं पूर्वपादम् अन्तर्मांसं परिषीव्यति
kṛṣṇājinasya dakṣiṇaṃ pūrvapādam antarmāṃsaṃ pariṣīvyati
- 8
द्वे वा विषूची मांससंहिते करोति
dve vā viṣūcī māṃsasaṃhite karoti
- 9
इन्द्र शाक्वर गायत्रीं प्रपद्ये तां ते युनज्मीन्द्र शाक्वर त्रिष्टुभं प्रपद्ये तां ते युनज्मीन्द्र शाक्वर जगतीं प्रपद्ये तां ते युनज्मीन्द्र शाक्वरानुष्टुभं प्रपद्ये तां ते युनज्मीन्द्र शाक्वर पङ्क्तिं प्रपद्ये तां ते युनज्मीत्य् अन्तर्वेदि कृष्णाजिनं प्राचीनग्रीवम् उत्तरलोमास्तृणाति
indra śākvara gāyatrīṃ prapadye tāṃ te yunajmīndra śākvara triṣṭubhaṃ prapadye tāṃ te yunajmīndra śākvara jagatīṃ prapadye tāṃ te yunajmīndra śākvarānuṣṭubhaṃ prapadye tāṃ te yunajmīndra śākvara paṅktiṃ prapadye tāṃ te yunajmīty antarvedi kṛṣṇājinaṃ prācīnagrīvam uttaralomāstṛṇāti
- 10
तदारूढे यजमाने पत्न्याः शिरसि जालं प्रतिमुञ्चति
tadārūḍhe yajamāne patnyāḥ śirasi jālaṃ pratimuñcati
- 11
ताम् अहतेन क्षौमेण वाससोर्ध्ववास्येन दीक्षयति
tām ahatena kṣaumeṇa vāsasordhvavāsyena dīkṣayati
- 12
शरमुञ्जानां मेखला त्रिवृद्वेणी कार्या
śaramuñjānāṃ mekhalā trivṛdveṇī kāryā
- 13
ऊर्ग् असीति तया यजमानं नाभिदेशे त्रिः प्रदक्षिणं परिव्ययति द्विर् इत्य् एके पूषा ते ग्रन्थिं ग्रथ्नात्व् इत्य् उत्तरतो नाभेर्निष्टर्क्यं ग्रन्थिं कृत्वा स ते मा स्थाद् इति दक्षिणतो नाभेः परिकर्षति यं द्विष्यात्तं ध्यायेत्
ūrg asīti tayā yajamānaṃ nābhideśe triḥ pradakṣiṇaṃ parivyayati dvir ity eke pūṣā te granthiṃ grathnātv ity uttarato nābherniṣṭarkyaṃ granthiṃ kṛtvā sa te mā sthād iti dakṣiṇato nābheḥ parikarṣati yaṃ dviṣyāttaṃ dhyāyet
- 14
सं त्वा नह्यामीति पत्नीं संनह्यति यथा दर्शपूर्णमासयोः
saṃ tvā nahyāmīti patnīṃ saṃnahyati yathā darśapūrṇamāsayoḥ
- 15
इन्द्रस्य योनिर् असीति त्रिवलिं पञ्चवलिं वा कृष्णविषाणां यजमानाय प्रयच्छत्य् आबध्नाति वा
indrasya yonir asīti trivaliṃ pañcavaliṃ vā kṛṣṇaviṣāṇāṃ yajamānāya prayacchaty ābadhnāti vā
- 16
पत्न्याः शिरसि जालं यथा सुष्ठु कल्पयति
patnyāḥ śirasi jālaṃ yathā suṣṭhu kalpayati

