20 shlokas
- 1
प्रायणीयायास्तन्त्रं प्रक्रमयति
prāyaṇīyāyāstantraṃ prakramayati
- 2
तत्र यावत्क्रियते तद्व्याख्यास्यामः
tatra yāvatkriyate tadvyākhyāsyāmaḥ
- 3
अग्नीन् अन्वाधायेध्माबर्हिर् आहरति
agnīn anvādhāyedhmābarhir āharati
- 4
सप्तदश सामिधेन्यो नानूयाजसमिधम् उपसंनह्यति यद्य् अनूयाजा न भवन्ति
saptadaśa sāmidhenyo nānūyājasamidham upasaṃnahyati yady anūyājā na bhavanti
- 5
वेदं कृत्वाग्नीन्परिस्तीर्य पाणी प्रक्षाल्योलपराजीं स्तीर्त्वा यथार्थं पात्राणि प्रयुनक्ति स्थालीं कपालानां स्थाने प्रयुनक्ति
vedaṃ kṛtvāgnīnparistīrya pāṇī prakṣālyolaparājīṃ stīrtvā yathārthaṃ pātrāṇi prayunakti sthālīṃ kapālānāṃ sthāne prayunakti
- 6
निर्वपणकाले ऽदित्यै प्रायणीयं चरुं निर्वपति पयसि श्रपयति
nirvapaṇakāle 'dityai prāyaṇīyaṃ caruṃ nirvapati payasi śrapayati
- 7
चतुर्गृहीतान्य् आज्यानि गृह्णाति यद्य् अनूयाजा न भवन्ति
caturgṛhītāny ājyāni gṛhṇāti yady anūyājā na bhavanti
- 8
षड्ढोत्रा प्रायणीयम् आसादयति
ṣaḍḍhotrā prāyaṇīyam āsādayati
- 9
सर्वम् इध्मम् आदधाति सर्वम् औपभृतं समानयते यद्य् अनूयाजा न भवन्ति
sarvam idhmam ādadhāti sarvam aupabhṛtaṃ samānayate yady anūyājā na bhavanti
- 10
आज्यभागांश्चतुरो यजति पथ्यां स्वस्तिं पुरस्ताद् अग्निं दक्षिणतः सोमं पश्चात्सवितारम् उत्तरतो ऽदितिं मध्ये हविषा स्थालीं निष्कासं मेक्षणं च निदधाति
ājyabhāgāṃścaturo yajati pathyāṃ svastiṃ purastād agniṃ dakṣiṇataḥ somaṃ paścātsavitāram uttarato 'ditiṃ madhye haviṣā sthālīṃ niṣkāsaṃ mekṣaṇaṃ ca nidadhāti
- 11
ध्रुवायाः शेषं करोति
dhruvāyāḥ śeṣaṃ karoti
- 12
शंय्वन्ता कृत्स्ना वा
śaṃyvantā kṛtsnā vā
- 13
न यजमानभागम् अवद्यति यदि शंय्वन्ता
na yajamānabhāgam avadyati yadi śaṃyvantā
- 14
अत्र राज्ञो निवपनम् एके समामनन्ति
atra rājño nivapanam eke samāmananti
- 15
ध्रुवाशेषाच्चतुर्गृहीतं पञ्चगृहीतं वा गृहीत्वेयं ते शुक्रतनूर् इति दर्भेण हिरण्यं निष्टर्क्यं बद्ध्वाज्ये ऽवदधाति
dhruvāśeṣāccaturgṛhītaṃ pañcagṛhītaṃ vā gṛhītveyaṃ te śukratanūr iti darbheṇa hiraṇyaṃ niṣṭarkyaṃ baddhvājye 'vadadhāti
- 16
उपकॢप्ता सोमक्रयणी समङ्गा बन्धुमती यथाग्नीषोमीयो बभ्रुर् अरुणा रोहिणी वोपध्वस्ता प्रपीनाथ वा रोहिणी पिङ्गाक्षी बभ्रुलोम्नी श्वित्रोपकाशा पृश्निवाला पृश्निशफैकहायनी द्विहायनी त्रिहायणी वा जूर् असीति ताम् ईक्षमाण एतच्चतुर्गृहीतं जुहोति
upakḷptā somakrayaṇī samaṅgā bandhumatī yathāgnīṣomīyo babhrur aruṇā rohiṇī vopadhvastā prapīnātha vā rohiṇī piṅgākṣī babhrulomnī śvitropakāśā pṛśnivālā pṛśniśaphaikahāyanī dvihāyanī trihāyaṇī vā jūr asīti tām īkṣamāṇa etaccaturgṛhītaṃ juhoti
- 17
अपरं चतुर्गृहीतं गृहीत्वा शुक्रम् अस्य् अमृतम् असीति हिरण्यं घृताद् उद्धरति
aparaṃ caturgṛhītaṃ gṛhītvā śukram asy amṛtam asīti hiraṇyaṃ ghṛtād uddharati
- 18
वैश्वदेवं हविर् इत्य् अभिमन्त्रयते
vaiśvadevaṃ havir ity abhimantrayate
- 19
हविर् असि वैश्वदेवम् इत्य् अवेक्षते
havir asi vaiśvadevam ity avekṣate
- 20
सूर्यस्य चक्षुर् आरुहम् इति सहिरण्येन पाणिनादित्यम् उपतिष्ठते
sūryasya cakṣur āruham iti sahiraṇyena pāṇinādityam upatiṣṭhate

