14 shlokas
- 1
पञ्चदशभिः क्रीणाति सप्तदशभिः क्रीणाति चतुर्विंशत्या क्रीणात्य् अपरिमिताभिः क्रीणाति क्रीणामीत्य् अन्ततो वदति
pañcadaśabhiḥ krīṇāti saptadaśabhiḥ krīṇāti caturviṃśatyā krīṇāty aparimitābhiḥ krīṇāti krīṇāmīty antato vadati
- 2
सम्पाद्य संयत्ते गोर् अस्मे चन्द्राणीति हिरण्यं प्रत्यादत्ते
sampādya saṃyatte gor asme candrāṇīti hiraṇyaṃ pratyādatte
- 3
अस्मे ते बन्धुर् इति शुक्लाम् ऊर्णास्तुकां यजमानाय प्रयच्छति
asme te bandhur iti śuklām ūrṇāstukāṃ yajamānāya prayacchati
- 4
तां वितननकाले दशापवित्रस्य नाभिं करोति
tāṃ vitananakāle daśāpavitrasya nābhiṃ karoti
- 5
शुक्लानाम् आविकोर्णानाम् अमोते द्वे दशापवित्रे भवतो ऽदशाकम् अन्यतरत्
śuklānām āvikorṇānām amote dve daśāpavitre bhavato 'daśākam anyatarat
- 6
उदकेन क्लेदयित्वा कृष्णाम् ऊर्णास्तुकाम् इदम् अहं सर्पाणां दन्दशूकानां ग्रीवा उपग्रथ्नामीत्य् उपग्रथ्य सोमविक्रयिणि तम इति तया सोमविक्रयिणं रराटे विध्यति
udakena kledayitvā kṛṣṇām ūrṇāstukām idam ahaṃ sarpāṇāṃ dandaśūkānāṃ grīvā upagrathnāmīty upagrathya somavikrayiṇi tama iti tayā somavikrayiṇaṃ rarāṭe vidhyati
- 7
स्वजा असि स्वभूर् अस्य् अस्मै कर्मणे जात ऋतेन त्वा गृह्णाम्य् ऋतेन नः पाहीति सोमविक्रयिणो राजानम् अपादत्ते
svajā asi svabhūr asy asmai karmaṇe jāta ṛtena tvā gṛhṇāmy ṛtena naḥ pāhīti somavikrayiṇo rājānam apādatte
- 8
यदि कृच्छ्रायेतापैव हरेत
yadi kṛcchrāyetāpaiva hareta
- 9
इन्द्रस्योरुम् आविश दक्षिणम् इति यजमानस्योरौ राजानम् आसादयति
indrasyorum āviśa dakṣiṇam iti yajamānasyorau rājānam āsādayati
- 10
नीव गृह्णीते
nīva gṛhṇīte
- 11
अध्वर्यव् आशक्तवा इति यजमानः पृच्छत्य् आशकामेत्य् अध्वर्युः कथम् आशकतेति विष्णुं स्तोमम् अरुत्स्महि बृहस्पतिं छन्दांस्य् उत्थाय यजूंषि वि पर्वता अजिहत सुतरणा अपो अतारिषम् इत्य् अध्वर्युः
adhvaryav āśaktavā iti yajamānaḥ pṛcchaty āśakāmety adhvaryuḥ katham āśakateti viṣṇuṃ stomam arutsmahi bṛhaspatiṃ chandāṃsy utthāya yajūṃṣi vi parvatā ajihata sutaraṇā apo atāriṣam ity adhvaryuḥ
- 12
स्वान भ्राजेति सोमक्रयणान् अनुदिशति
svāna bhrājeti somakrayaṇān anudiśati
- 13
रुद्रस्त्वावर्तयत्व् इति सोमक्रयणीम् आवृत्यान्यया गवा निष्क्रीय यजमानस्य गोष्व् अपिसृजति
rudrastvāvartayatv iti somakrayaṇīm āvṛtyānyayā gavā niṣkrīya yajamānasya goṣv apisṛjati
- 14
पृषता वरत्राकाण्डेन सोमविक्रयिणम् अपक्षायं नाशयति
pṛṣatā varatrākāṇḍena somavikrayiṇam apakṣāyaṃ nāśayati

