22 shlokas
- 1
दक्षिणस्य हविर्धानस्य पुरोऽक्षं चत्वार उपरवा भवन्त्य् अवान्तरदेशेषु प्रादेशमुखाः प्रादेशान्तराला बाहुमात्राः संतृण्णा अधस्ताद्विधृता उपरिष्टात्
dakṣiṇasya havirdhānasya puro'kṣaṃ catvāra uparavā bhavanty avāntaradeśeṣu prādeśamukhāḥ prādeśāntarālā bāhumātrāḥ saṃtṛṇṇā adhastādvidhṛtā upariṣṭāt
- 2
अभ्रेर् आदानं परिलेखनं च यूपे व्याख्यातम्
abhrer ādānaṃ parilekhanaṃ ca yūpe vyākhyātam
- 3
पूर्वयोर्दक्षिणं परिलिख्यापरयोर् उत्तरं परिलिखत्य् अपरयोर्दक्षिणं पूर्वयोरुत्तरम्
pūrvayordakṣiṇaṃ parilikhyāparayor uttaraṃ parilikhaty aparayordakṣiṇaṃ pūrvayoruttaram
- 4
एवम् अनुपूर्वाण्य् एषां कर्माणि क्रियन्ते
evam anupūrvāṇy eṣāṃ karmāṇi kriyante
- 5
रक्षोहणो वलगहनो वैष्णवान्खनामीति खनति
rakṣohaṇo valagahano vaiṣṇavānkhanāmīti khanati
- 6
रक्षोहणो वलगहनो वैष्णवान्निष्खिदामीति निष्खिदति
rakṣohaṇo valagahano vaiṣṇavānniṣkhidāmīti niṣkhidati
- 7
बृहन्न् असीत्य् अभ्रिं प्रहरति
bṛhann asīty abhriṃ praharati
- 8
विराड् असीति बाहुम् उपावहरति बाहू वा
virāḍ asīti bāhum upāvaharati bāhū vā
- 9
इदम् अहं तं वलगम् उद्वपामीति पांसून् उद्वपति
idam ahaṃ taṃ valagam udvapāmīti pāṃsūn udvapati
- 10
इदम् एनम् अधरं करोमीत्य् उपरवबिले ऽवबाधते
idam enam adharaṃ karomīty uparavabile 'vabādhate
- 11
निरस्तो वलग इति हरति
nirasto valaga iti harati
- 12
अवबाढो दुरस्युर् इति यत्र खरं करिष्यन्भवति तस्मिन्देशे निवपति
avabāḍho durasyur iti yatra kharaṃ kariṣyanbhavati tasmindeśe nivapati
- 13
एवम् इतरेषु
evam itareṣu
- 14
उत्तरेणोत्तरेण मन्त्रेण बाहुम् उपावहरत्य् उत्तरेणोत्तरेण च छन्दसा निगृह्णाति
uttareṇottareṇa mantreṇa bāhum upāvaharaty uttareṇottareṇa ca chandasā nigṛhṇāti
- 15
गायत्रं त्रैष्टुभं जागतम् आनुष्टुभम् इत्य् आम्नातानि छन्दांसि
gāyatraṃ traiṣṭubhaṃ jāgatam ānuṣṭubham ity āmnātāni chandāṃsi
- 16
विराड् असीति पूर्वयोर्दक्षिणं यजमानो ऽवमृशति सम्राड् असीत्य् अपरयोर् उत्तरम् अध्वर्युः
virāḍ asīti pūrvayordakṣiṇaṃ yajamāno 'vamṛśati samrāḍ asīty aparayor uttaram adhvaryuḥ
- 17
संमृश इमान् आयुषे वर्चसे च देवानां निधिर् असि द्वेषोयवनो युयोध्य् अस्मद्द्वेषांसि यानि कानि चकृम देवानाम् इदं निहितं यद् अस्त्य् अथाभाहि प्रदिशश्चतस्रः कृण्वानो अन्याꣳ अधरान्सपत्नान् इत्य् अधस्तात्संमृशतः
saṃmṛśa imān āyuṣe varcase ca devānāṃ nidhir asi dveṣoyavano yuyodhy asmaddveṣāṃsi yāni kāni cakṛma devānām idaṃ nihitaṃ yad asty athābhāhi pradiśaścatasraḥ kṛṇvāno anyām̐ adharānsapatnān ity adhastātsaṃmṛśataḥ
- 18
किम् अत्रेत्य् अध्वर्युः पृच्छति भद्रम् इति यजमानः प्रत्याह तन्नौ सहेत्य् अध्वर्युः
kim atrety adhvaryuḥ pṛcchati bhadram iti yajamānaḥ pratyāha tannau sahety adhvaryuḥ
- 19
स्वराड् असीत्य् अपरयोर्दक्षिणं यजमानो ऽवमृशति विश्वाराड् असीति पूर्वयोर् उत्तरम् अध्वर्युः
svarāḍ asīty aparayordakṣiṇaṃ yajamāno 'vamṛśati viśvārāḍ asīti pūrvayor uttaram adhvaryuḥ
- 20
संमृशतो यथा पुरस्तात्
saṃmṛśato yathā purastāt
- 21
किम् अत्रेति यजमानः पृच्छति भद्रम् इत्य् अध्वर्युः प्रत्याह तन्म इति यजमानः
kim atreti yajamānaḥ pṛcchati bhadram ity adhvaryuḥ pratyāha tanma iti yajamānaḥ
- 22
रक्षोहणो वलगहनः प्रोक्षामि वैष्णवान् इति
rakṣohaṇo valagahanaḥ prokṣāmi vaiṣṇavān iti

